2009年12月11日星期五

Round 1, eat!! (東京和食)

星期六,翻風,一個不留神好容易病倒。目標本是「一門」,但係要到九時後才有位,於是將晚餐分開兩個回合,首回合是時代廣場的「東京和食」。

與平日人車爭路嘅日子不同,是晚銅鑼灣無論係人或車都少咗好多,相信原因是有唔少人湧到灣仔一帶睇東亞運動會開幕。七點幾,應該全場滿座,竟然順利地找到位子。要到大約八時多,人們才絡繹不絕到來。


先來小吃,打頭陣嘅係牛油果軟殼蟹手壽司($64六件),用軟殼蟹做壽司,好少會整得難食的。壽司上一塊牛油果,入口清香軟腍,軟殼蟹炸得香脆,味道也不錯;



雜錦天婦羅($68)有炸蝦、冬菇、茄子、蕃薯、薄荷葉、金菇三文魚及魷魚等。看到吸油紙上一點大一點小的油漬,唔會有什麼高期望。天婦羅入口都不太油膩,炸蝦嘅粉漿則上得比較厚,水準是中規中矩的;




吉列豬肋骨串($52)炸得甘香鬆脆,吉列粉不厚,肉汁豐富,味道可口。

吃過了香口嘢之後,以數款齋菜類清一清腸胃。日式沙律($48)嘅材料先放入瓶子裡,加入salad dressing後封好蓋再搖勻才食用,故dressing會平均佈滿材料上。蔬菜嘅配搭以淺色為主(可能深色蔬菜價錢會較為貴),凍凍地都幾爽口;



豆腐蕃茄($39正式名字已忘記了),是簡單地將豆腐及蕃茄切片,上面灑上芝麻等調味料。入口冰涼中帶一點芝麻香,蕃茄新鮮甜美,豆腐滑溜有豆香,令筆者留下深刻印象。



加州卷($60六件)是壽司上灑上芝麻及蟹子,中間夾著青瓜及蟹柳,做法大路,沒有什麼特別。

主菜是釜飯($58),一分鐘嘅沙漏有gimmick,看著沙粒逐漸由沙漏嘅上方流到下方,令人殷切盼望。至於味道,老實說,十分普通,個人還是比較喜歡以類似手法做嘅煲仔飯;

最後友人點了一客燒豬肋骨($48),原本應該嫩滑嘅豬肋骨肉,不單止肉質鞋口,而且要費一點勁才能骨肉分離,証明火喉不足,肉汁流失也不少,令人失望 。太座斷言她弄的豬肋骨也過之而無不及,筆者親嚐過,並無花假,點頭稱是。

埋單共銀四百八十蚊,平均每人一百六十蚊,不算貴,但是水準參差,一邊食,一邊期待著次回合「一門」。

味道:3 (以5分最高)
環境:4
服務:3
衛生:3
價錢:3

用餐日期:2009年12月5日


地址:銅鑼灣勿地臣街1號時代廣場食通天13樓

沒有留言:

發佈留言

Related Posts with Thumbnails