2009年12月12日星期六

游走於碧波中,沉醉於佳餚裡 (祥記飯店)

星期四,秋意漸濃。又是生日飯局,為十月頭嘅生日之星一同慶祝。太座係生日之星之一,友輩都睇吓太座有乜好提議,太座是次嘅選擇係灣仔嘅「祥記」。


入夜後,灣仔變得五光十色,於駱克道兩旁,上夜班嘅女士們皆打扮得花枝招展,碧波蕩漾,如不是微涼嘅風提醒,會誤以為還是盛夏。春光雖無限,但筆者因泊車緣故誤了不少時間,餓得實在有點發茅,無暇理會。於布滿脂粉氣嘅駱克道走了幾分鐘,再行大約十幾級樓梯,便到達「祥記」。

舖面比想像中細得多,大大小小嘅枱大約只有十張。之前太座研究過這裡嘅特色菜,已預先訂了片皮鴨及紅燒元蹄。除此之外,還點了幾款頭盤及主菜。首先出場係韓國肉素鵝,韓國肉有點似蒜泥白肉,以蒜粒、椒粒泡製而成嘅醬汁,灑在白花花嘅白肉上,白肉香而滑,一點也不肥膩,是出色嘅餐前菜;素鵝是用煙燻的,入口帶一點甜味,煙燻嘅香味亦不是太過火,恰到好處,妙極。



主菜是幾味是店嘅拿手菜,首先是蔬菜類上枱。麵豉油麥菜,以麵豉及羌絲炒菜,十分惹味,先聲奪人,油麥菜也是鮮甜爽脆,又添幾分;



干煸四季豆也是川菜中經常會食嘅菜色,這四季豆炒得均勻,但肉粒是鹹了少許,要佐以白飯為佳;



肉類以山東燒雞打頭陣,這味燒雞,用料雖不是新鮮雞,但處理手法上乘,入口雞肉除了燒得鬆化之外,醬汁嘅烹調也是高水準,在冇雞味嘅冰鮮雞嘅先天局限之下,為此菜再譜上富層次嘅味道,是筆者推介嘅菜色之一。之前筆者曾在泰豐廔食過此菜,也冇此處弄得咁好食。



紅燒元蹄是令人期待的,當服務員端上時,眾人莫不暗自「嘩」了一聲。大大隻的,恐防會食不完,不過這個担心原來是多餘的。在濃重嘅醬汁烹調之下,元蹄盡收其精華。如啫哩般的肥肉,入口甘香豐腴,而瘦肉亦炆得軟腍,當然最好味的還是連在豬骨上嘅肉塊。骨頭人怕啃,尤其是豬頭骨,但此人間美食,相信沒有人可以抗拒的。





片皮鴨是肥瘦適中的,燒得亦不俗,只是近尾部有點過了火。入口不是滿口油的,感覺不是一般的肥膩;皮烤得香脆,鴨肉亦鬆軟,味道甘香。用來包鴨肉嘅皮是烤烘嘅版本,是正宗嘅製法,不是馬馬虎虎隔水蒸出來嘅麵粉皮。加入大蔥、青瓜及一片烤鴨,用烤餅卷起來吃,不一會已殺得片甲不留。剩下嘅鴨殼用嚟炒鴨絲,味道普通。



最後一味賽螃蟹,蟹肉份量十足,毫不吝嗇,而且蛋白是炒得剛好,既香且滑,佐以一點醋,無論在蟹肉份量上式或烹調技術上均無可挑剔之處,是筆者令一推介菜色。

所知嘅名菜還有不少,但眼闊肚窄,各人已塞得滿滿的。一共有八個人參與飯局,但埋單都只是一千三百二十蚊,平均每人一百六十五蚊,如此高水準嘅菜色,如此大眾化價錢,又夫復何求?

味道:4 (以5分最高)
環境:3
服務:3
衛生:3
價錢:4

用餐日期:2009年10月8日

地址:灣仔駱克道75號地下

沒有留言:

發佈留言

Related Posts with Thumbnails