2009年12月11日星期五

入冬預演 (金海閣海鮮火鍋專門店)

星期三晚,南華大戰科威特,估唔到香港仲有咁多人睇波,適逢快活谷賽馬,令銅鑼灣嘅交通幾乎癱瘓,幸好趕及參與太座嘅例行超聲波檢查。陪同她的還有她剛從英國回港探親嘅摯友,恰巧地她也是有咗之人。一起檢查,一起分享懷孕經驗,太座樂在其中。檢查完畢之後,一行人一起晚膳。太座見有涼意,便急不及待的想食火鍋,在冇人反對嘅情況下,大家去了登龍街嘅「金海閣」。


都唔係第一次嚟幫襯了。幫襯此店嘅原因,一來用料比較新鮮,二來有三百二十蚊現金劵及波士頓龍蝦贈劵。自從於舊舖對面開了間上樓舖之後,筆者都會選新舖,因為地方比較寬敞。是晚新舖已滿座,惟有番去舊舖。




湯底選了淮山豬骨杞子湯,貪其夠鮮味,食物灼完之後唔駛點任何調味料已經夠晒味。食材方面,首先有薄切象拔蚌片,一物二用,可以當刺身般生食,又可以稍為灼一灼先食,各有風味。筆者較為喜歡生食,象拔蚌片入口爽脆鮮甜,非新鮮貨是不能有此味道及口感的;




除了象拔蚌,還點了海蝦。所謂海蝦,只不過係在海水中養殖嘅蝦而已。論鮮味,與真正野生海蝦冇得比,少了一份鮮甜,又少了一份海水味。還好,這海蝦蝦膏甚多,而且上枱時仲係好生猛,是合時令之選;




波士頓龍蝦是贈劵換領的,要了兩隻。同樣地即叫即開,還曉郁的,証明新鮮,不過諗落都幾核突,所以古人才有「君子遠庖廚」之說。入口果然肉質爽脆,龍蝦鮮味濃郁。




肉類只點了牛柳粒一款,太座及其摯友不吃牛,此牛柳粒便成了筆者及令一位友人嘅囊中物了。此店嘅牛柳粒,筆者認為是城中數一數二的,甚至比上環「英記」嘅牛頸脊更好。此牛柳粒入口鮮美,肉質嫩滑,而且脂肪分佈平均,故有濃郁嘅牛肉味,加上豬骨湯底本身嘅鮮甜,比其他什麼雪花肥牛、和牛等等徹底地比下去。每次幫襯此店,這是必定會點嘅火鍋料。



其他火鍋必吃物如餃子、肉丸、蔬菜及金菇都有落單。這裡嘅墨魚滑,太庭是十分欣賞的,口感彈牙,也有墨魚肉香;



蟹黃蟹肉餃是比較特別嘅餃子,以蟹肉為主要餡料,放了幾粒蟹膏,灼熟之後咬開餃子皮,蟹膏溶掉了,滲入蟹肉裡,特別香氣四溢,是推介之一。


湯底過鹹了


用tempo盒裝巾,幾落本


是晚各人食得都幾盡慶,唯一是湯底是過鹹了,加幾次水才可以溝淡鹹味。原價九百二十蚊(波士頓龍蝦免費),用了三百二十蚊現金劵,折合六百蚊。一行四人,折實後每人只需付出一百五十蚊,物超所值。撇開現金劵,每人是二百三十蚊,比一般聯營火鍋店貴,但一定食唔到如這裡般質素。
 
味道:4 (以5分最高)
環境:3
服務:3
衛生:3
價錢:4
 
用餐日期:2009年10月21日
 
地址:銅鑼灣登龍街31-35號

沒有留言:

發佈留言

Related Posts with Thumbnails