2009年12月12日星期六

慳家晚餐 (民聲冰室)

星期五,天氣逐漸變得明朗,太座與madam於銅鑼灣shopping。madam月前閱讀有關「民聲」嘅拙評,希望可以親身一試,於是一行三人,踏上往大坑嘅征途。




月前嘅初體驗,筆者還歷歷在目。「日落西山」之景,印象難望。由於時值炎夏,筆者要求到店內就坐,在服務員稍作安排之下,不需等多久便能入席。餐牌還是老樣子,一大塊橙色膠板上寫滿了各種菜式,總數大約廿來款。三個人,四樣餸,其中兩樣係之前食過想再回味。當然在漸入盛夏之時,冰凍飲品唔少得,一支啤酒、檸七是必需的。



鹹蛋蒸肉餅 ($45) – 此處肉餅有兩大特色,其一係高,其二係滑。肉餅高身,筆者猜想可能與控制蒸肉餅嘅火力有關,但實際上與一般扁平肉餅有何優勝之處,是否受熱更均勻,抑或較容易熟等,思前想後,也得不出所以焉。可以肯定的是肥肉比例比一般多,水份充足,故才會有肉質嫩滑嘅效果。「肉山」上嘅鹹蛋黃亦不能錯過,入口除了有鹹蛋黃嘅鹹香之外,蛋黃亦不是蒸得死實,軟綿綿的十分討好。可惜始終非健康食品,經太座「強烈」勸籲後,只食了一半便放棄了;



口水雞 ($56) – 於本地食雞,筆者永遠唔會講雞味,因為有雞味嘅雞「幾希」矣。但求雞肉嫩滑已經心滿意足了。口水雞嘅質素冇令筆者失望,雞肉嫩滑有彈性。味道方面,則稍欠口水雞應有嘅層次感。只能食得出甜味,辣味甚微,更枉論「辣中帶香、香中帶麻」嘅境界。不過以雞嘅本質來說已相當不俗;



帶子蒸豆腐 ($45) – 上一次光顧時,豆腐蒸得比較老咗啲,入口唔係咁滑。今次情況改善了。帶子肉亦保持鮮甜爽脆,配以豆豉、香蔥、蒜蓉等調味料,令本來味道單調嘅豆腐變得豐富起來;



豆豉鯪魚油麥菜 ($48?) – 鯪魚非碎上,而是整條放在油麥菜上,好似菜還菜、魚還魚,各自為政。不過,油麥菜冇想像中咁「油光滿面」,入口亦爽甜;

在小本經營,但客似雲來嘅小店作客,服務員跟單有甩漏在所難免,空間亦不求充足。以「服務」、「環境」嘅低評分來總體評定對此店之好惡,只可說是瞎子摸象。

加三大碗白飯,共銀二百五十蚊,平均每人八十三蚊。不足一百蚊嘅價錢,可以食得到比一般花百幾二百蚊嘅餐廳更好味嘅食物,是抵食之選。

味道:4 (以5分最高)
環境:2
服務:3
衛生:3
價錢:4

用餐日期:2009年6月19日

地址:大坑浣紗街16號地下

沒有留言:

發佈留言

Related Posts with Thumbnails