2009年12月11日星期五

就是少了一份認真 (稻菊日本料理)

星期日,天朗氣清,秋郊一流。第四百篇食評,所寫嘅地方要特別一點。


如果有人問最好嘅幾間日式食肆,「稻菊」想必是榜上有名,其tempura更是城中知名的。此晏晝飯局是太座好友阿P給太座預備嘅生日飯,筆者則不請自來,也無相干。

餐廳光線柔和,座位嘅空間、佈局都令人坐得十分舒服自然,能營造出食日本菜應有嘅氣氛。Lunch set 有多款shusi、便當、tempura、shashimi定食選擇。筆者點了特上天婦羅定食($320)、阿P則是雜錦天婦羅定食($260),太座則是天婦羅蕎麥麵定食($160),阿P還點了名物海胆天婦羅($100 兩件)。



食天婦羅,最好當然是坐在吧枱上,由師傅即叫即炸,便是最新鮮滾熱辣的了。未有此安排,是打了折扣的。特上天婦羅定食與雜錦天婦羅定食只是天婦羅蝦及shashimi嘅份量不同而已。





先嚟沙律,冰涼可口,蔬菜鮮甜味美,為之後嘅美食揭開序幕。筆者嘅定食有三文魚吞拿魚hamachi 刺身,雖不是最好嘅材料,但入口也是鮮美,三文魚則較差,魚油香味淡而且有根,以這般級數嘅餐廳,係不應有嘅瑕疵。




接著便是主角出場了,一大碟剛炸好嘅天婦羅,有蝦、茄子、甜蕃薯、南瓜、蓮藕、魚仔等,份量豐富。脆漿薄薄的上了一層,上漿功夫對辦。蝦肉爽脆,但少了一分鮮甜;蔬菜類清甜味美,除了茄子及兩塊類似炸洋蔥嘅物體之外,其他的入口感覺不太油膩。味道不錯,可惜,這還不是最頂級嘅天婦羅。見吸油紙上一點大一點小嘅油漬,就會明白為何被譽為全城最好嘅天婦羅,摘星不成,只被列為米芝蓮推介餐廳。




另上嘅海胆天婦羅,海胆以紫菜包裹著,之後上漿落油炸。外表炸得金黃可口,而且漿不厚,內裡啖著有微溫嘅新鮮海胆,益發其鮮甜味道,令人有驚喜。不過,筆者還是覺得食海胆,就是甚麼也不攪,即開即食原汁原味,已經是最好了。

服務比較幼嫩,雖不是頂級嘅酒店,但安排上屢有缺失。剛巧港鐵主席一家人來午膳,就是因為安排失誤,未用膳便敗興而回。服務員亦在不適當嘅時候替人客執拾枱面,令阿P多次在講得興高采烈時被打斷,十分無癮。除了領班之外,其他人對餐牌認識一知半解。好似太座問餐牌上嘅寫著「炸物」,即是有什麼,換來是啞口,要查問一番。在高級食肆,出現這種情況,令人費解。



用膳完畢後,見天婦羅吧枱上有兩名本地師傅駐守,其技術是無從稽考,但儀容給人嘅感覺不是最乾淨的。日式烹調,一在食材新鮮,二貴乎認真,一絲不苟,這是日本人嘅民族性,體現在烹調、顧客服務上,缺一不可。從三文魚刺身嘅肉根,油紙上嘅油漬,再到服務員嘅粗疏,皆是缺乏認真嘅表現。可能是午市關係,把關有點鬆懈,又或者是本地青年人對工作冇上一代咁認真。如屬後者,這是社會問題了。

說實話,味道、服務各方面是不差的。但正因為來之前有期望,落得與期望有出入,內心是有一點失落。評分雖中上,但文末的「喊」面,正反映了筆者飯後嘅心情。

用了八五折優惠劵,共銀九百四十一蚊,平均每人三百一十四蚊。

味道:4
環境:4
服務:3
衛生:4
價錢:4

用餐日期:2009年10月18日

地址:尖沙咀麼地道69號帝苑酒店1樓

沒有留言:

發佈留言

Related Posts with Thumbnails