三名大肚之人聚首一堂 (泰爽甜)

星期三，太座好友P到新居拜訪，分享懷孕嘅經驗。正考慮如何安頓兩名大肚婆，加一名大肚公嘅吃飯問題，忽然想起舅仔日前提起電氣道街市嘅泰國菜館，在沒有反對嘅情況下，三人行便朝街市進發。

位處於熟食中心，衛生情況稍欠妥善是預計之內，最担心反而係濕滑嘅地面，三個人，五條命，是一步一步，顫顫驚驚的。舖位不大，只有幾張枱。其中一張大枱被一班外形豪邁嘅中年漢佔據著，一邊飲酒，一邊猜枚，聲量比其外形更加「豪邁」。

由泰藉人士主理，取名「泰爽甜」，筆者感到好奇，似乎泰國菜與甜味唔係太有關聯，最多是形容蝦肉爽脆鮮甜而已，有點是為了食個「泰」而已。再望一望周圍，原來森美小儀都推介這裡。筆者一向都唔係太相信名人效應，原因好簡單：口味各人不同，你認為好食並不代表啱佢口味。食嘢，只有忠於自己條脷罷了。

三個人，嗌四樣嘢。大肚婆需要葉酸，一碟綠色嘅餸必不可少，便先來一碟馬拉盞炒芥蘭。馬拉盞不是呈蝦糕狀，而是像蝦干般有大有細的。吃落鹹香味足夠，菜亦是爽脆多汁。

之後是筆者到泰國菜館必點嘅柚子蝦沙律，這裡嘅柚子肉不是搣成一粒粒嘅果肉，而是一「楷楷」的，感覺是做得比較匆忙。柚子味道過於酸澀，幸好椰絲下得頗慷慨，吃落是啖啖嘅椰香，算是一點補償。蝦肉也算爽脆，但當然是食唔出什麼鮮味了。

大家原以為菠蘿炒飯是用菠蘿盛載著的，結果與一般炒飯無異。論香氣雖仍聞得到淡淡嘅菠蘿香，但總比用菠蘿裝載的遜色一點。炒飯本身濕了一點，不過炒得十分均勻，有洋蔥粒及肉鬆吊味，味道不太濃，十分易入口。

最後是泰式燒雞，外皮是燒得有點微焦，可是吃落非但沒有苦澀味，還有一點椰子嘅甜味，原來是經過椰奶醃浸過的，而且有一種沙爹嘅香味。這種烹調手法實在出色。打開雞肉至骨，是剛好的熟，所以肉質嫩滑 ；亦可能浸過椰奶，效果有如敷過 mask般，只是說笑，作不得準。這一道菜，是筆者嘅推介菜。

大家吃得飽飽的，但代價只是二百一十蚊，友人P初時還以為聽錯了。待回過神之後，友人P決定萬歲，筆者與太座不需付出分毫。後來翻查網上其他評論，可堪一試嘅菜色還真不少，值得找一個時間再嚟一次。

味道：4 (以5分最高)
環境：2
服務：3
衛生：3
價錢：4

用餐日期：2010年1月6日

地址：北角電氣道229號電氣道市政大廈2樓C1舖

鳳舞九天 (鳳城酒家)

星期四，天陰有雨。幾天之前才約定嘅飯局，預祝友人牛一。同是北角人，友人竟然未去過北角「鳳城」。經一致決議，還友人這個心願。


「鳳城」嘅名字如雷貫耳，係本地數一數二、碩果僅存嘅傳統中菜館，尤以順德菜著名。事前筆者都有做過吓資料搜集，綜合必食之名物，可惜被公事纏身，冇預先訂菜。一行五人，找位子沒有難度，全舖座位大約半滿。雖則係平日，經營嘅困難程度可見一斑。眾友人皆因看過筆者拙作，均詢問筆者有什麼必食之選。可幸得服務員協助，點選名菜冇有怕，還介紹抵食配搭，不費筆者一點勁。

叫了一個價值大約七百五十蚊嘅四人餐，包括雞燉翅、蝦多士、乳豬雙拼、炸子雞及鮑片扒時蔬，再加映上湯炸粉果共六道菜。

首先出場係雞燉翅。燉翅精粹不在用什麼翅，而係用什麼雞。此盅燉翅火路十足，燉湯十分清甜，亦不肥膩。翅實質上係翅裙，有少許翅針，以前是商家視之作魚唇。入口爽滑。太座試了一口燉雞，雞肉已燉得入口即溶，可以想像雞味已全走進燉湯裡。燉湯份量也不少，可裝滿六個碗。

乳豬雙拼係生腸拼海蜇。筆者早已聽聞「鳳城」嘅乳豬很出色，食落亦沒有令筆者失望。皮脆肉嫩，脆皮唔會界口。不過脂肪略厚，食多幾件都幾滯肚；海蜇爽脆，以少許麻油點綴，生色不少。生腸又大又爽，味道雖淡但香口，唔會如一般街邊賣嘅生腸有點異味。後來才知道生腸是這裡名物之一，今次真係有口福。

蝦多士以原隻蝦開邊，加上麵包底落鑊炸。雖冇用蝦膠釀嘅蝦多士咁多巧夫，但用原隻蝦有原隻蝦嘅鮮味，係另一番風情。嫌多士底索滿油太肥膩嘅話，齋食蝦都不失原來風味。

炸子雞係鳳城嘅另一名物。要食到好味嘅炸子雞，本地有不少地方都做得到，不過水準唔係咁穩定。相反，鳳城嘅炸子雞長年都保持水準。外表炸得金黃，咬落皮薄十分香脆，唔會因皮太厚，炸完之後有少少界口。雞腿附近肉質嫩滑唔再講，連最難整嘅雞胸肉質結實但一點都不鞋口。雞味是淡了一點，但考慮到係出自農場飼養雞，這般肉味已算有交代的了。

上湯炸粉果嘅主角 – 粉果餡料豐富，薄粉果皮炸成金黃色，浸過上湯之後，入口感覺煙韌得嚟有少少脆，感覺似食緊湯圓嘅外皮一樣。

筆者相信鮑片扒時蔬並冇用上名貴嘅鮑魚作食材，材料有冬菇、罐頭鮑(？)及生菜煮成。菜式一般，沒有什麼特別值得討論。

可能係顧客唔多，又或者劉華嘅宣傳廣告奏效，服務員態度殷勤，冇其他老字號茶樓嘅服務員嘅「傲骨」。

埋單九百三十多元，平均每人大約一百九十蚊。牛一嘅友人自然唔駛科款，其餘四人分担，都係每人二百三十蚊。相信多啲人嚟食嘅話，平均消費會更加低。

味道：4 (以5分最高)
環境：3
服務：4
衛生：3
價錢：4

用餐日期：2009年4月23日

地址：北角渣華道62-68號高發大廈地下及1樓

粗粗地，幾好味 (壹麵館)

星期四，踏入搬屋倒數兩天，繼續要做「無飯」夫婦。

住在北角嘅食友，一定會去過和富道一帶嘅食肆。「阿鴻小吃」加冕之後，人潮比以前更洶湧。在依然寒冷嘅周四晚，人流是小了很多。「阿鴻小吃」店外亦只是三五人。不過，是晚嘅主角是其鄰居「壹麵館」。

一入到店內，除了店員，竟一名顧客也沒有。未嘗不好，店員可專心為筆者提供服務。與太座、舅仔及其女友四個人，各點了麵食、小食及甜品。

吃其招牌撈麵，又怎少得清湯。這清湯據講係用雞、豬骨等材料餚製而成。飲落似雞湯多一點，有雞肉鮮甜味，不似加添了味精。

撈麵款式有多款，除咗餸菜不同之外，麵條也有多款選擇，其中最出位是其自家製特粗麵，其闊度是平常粗麵嘅三、四倍。以一點豬油、香蔥、芝麻令麵條吃起來更加香，麵條本身嘅質地亦有咬口。特粗麵以較大嘅表面面積，蘸上更加多嘅醬料，所以吃起來份外感受到油嘅甘香。

配料有駝鳥肉，肉質有彈性，不過食落有部份肉塊留有十分輕微嘅苦味，是用梳打粉鬆肉嘅緣故？還是其他嘅原因？

炆豬肉只有五舊，可是筆者很眼利的看到宣傳海報上有七舊肉，唔見咗那兩舊去咗邊？豬肉是半肥瘦，炆得頗入味的。只得五塊，對裹腹嘅作用有限。

同樣地，燒腩仔撈粗也只得五塊薄薄的燒腩肉。腩肉是肥瘦相間的五重天，脆皮不怎麼的香脆，但整體上是肉味甘香鬆軟的。舅仔最不幸，點了鵝腸撈粗，鵝腸不肥不香，撈在一堆特粗麵中，眨眼間都分不出是配料還是麵條。以份量計，食得最唔飽便是這鵝腸撈粗了。

 

一碟簡單嘅菜心，加了特製沙茶醬，味道嘅變化頓時豐富起來。份量亦稍嫌少咗啲。

魷魚牛栢葉是材料及醬料分開上的，初時以為是食材醬汁撈在一起的。味道普通平淡，全賴蔥花及芝麻調劑一下。魷魚肉質是爽滑的；筆者不食牛，無從了解牛柏葉嘅質素如何。

店員十分積極這裡嘅甜品，既然嚟到，冇理由唔試吓。首先是腐竹白果薏米 (加蛋)，薏米份量不少，亦有咬口；腐竹糖水亦很足料，沒有完全溶入糖水中，不是稀「了了」的，可惜腐竹質素不大好，飲落豆味欠奉；店員經常強調嘅溏心蛋，是如實地做得到，效果亦相當唔錯，如果換了一些有更多蛋味嘅蛋 (如CP蛋)，會更加吸引。

糖不甩是剛做好的，入口仍感燙熱。水準是合格分數以下，糯米毫不煙韌，一咬即斷，糯米粉亦沒有加入薑汁，食落除了表面沾上嘅薑汁外，毫無薑味可言，令人失望。

四個人食飯，埋單一百九十二蚊，平均每人四十八蚊。食得飽，不純是因為那碗撈粗，是需要額外東拼西湊才能填滿各人嘅胃納。單單一碗麵，是不能滿足普通成年人嘅要求。

味道：4 (以5分最高)
環境：2
服務：3
衛生：3
價錢：2

用餐日期：2009年12月17日

地址：北角和富道93號銀輝大廈地下

紅豆冰變壞了 (祥利冰室)

星期天，雨停止了，但天還是陰陰的。人體內嘅生理時鐘亦攪亂了，所以筆者與太座瞓到一點幾先起床。


梳洗完畢已差唔多兩點鐘，仲差半個鐘就可以食下午茶。利用網上搜查器，發現電器道附近有一間歷史悠久嘅茶餐廳，紅豆冰係其中嘅名物。太座一聽到紅豆冰便雙眼發光，於是便驅車前往。

舖面除了堂座之外，還有閣樓座位，係一派舊式茶餐廳格局。到達時只是兩點四，仲差十分鐘先到下午茶時間，不過服務員話不要緊，時間只差少少，都幫我地落單。太座嗌了一份豬扒麵餐轉紅豆冰，筆者則叫了雞蛋鹵水牛展治烘底及奶茶。

豬扒麵用上福字麵，故味精感覺比較少，湯亦相對清淡。豬扒醃得相當鬆但唔化，並非用梳打粉嘅效果，外表煎得金黃，咬落亦肉汁豐富，相當對辦。

三文治以炒蛋及牛展作配搭，對筆者嚟講係新嘗試。蛋炒得香滑，鹵水牛展亦醃得入味，肉質亦唔韌。鹵水汁被烘底麵包吸收，很美味。

奶茶冇叫減奶，但水吧出手亦唔重。奶茶香滑，入口良久齒頰亦冇奶茶遺下嘅鞋口感。始終茶餐廳有一定歷史，茶胆顯然亦係經過千錘百鍊的。

紅豆冰賣相不俗，所用嘅紅豆亦大大粒，可惜入口有一股變壞嘅酸味，太座即時向服務員提出，經調查發現師傳早一晚煮完紅豆之後冇將之放進冰箱以致變壞了。太座唯有轉凍華田。

豬扒麵餐廿四蚊，凍飲加二。雙拼三文治餐二十蚊，轉牛展加兩蚊，烘底再加一蚊。共銀四十九蚊，平均每人二十四蚊。


味道：4 (以5分最高)
環境：3
服務：3
衛生：2
價錢：3

用餐日期：2009年3月29日

地址：北角電氣道120號地下

香軟鹵水鵝片 (阿鴻小吃)

星期四，天氣陰晴不定，人亦變得懶散。筆者與太座一家兩口子，嫌在家玩煮飯仔煩，還是外出用膳罷了。


家在港島區，生活費支出比九龍高，可幸家在北角區，附近特式食肆都不少，這算是付出較高昂生活費嘅少少回報。此食店雖然舖面小小，但廣為人知，好多知名人士都有嚟過，兼且讚不絕口，蔡瀾仲將此店列為一百五十間經常幫襯嘅食肆之一。究竟此店有乜嘢魔力，筆者與太座一於探求一下。

舖面大約可容納三十多人，雖然如此，不過就筆者觀察，生意冇乜受到影響。因為此店以鹵水食品聞名，好多人都會選擇外賣。筆者到達時，需要輪候十五分鐘。

菜式有頗多選擇，以潮州鹵水食品為主。筆者與太座點了三樣招牌菜，分別係南乳炆齋(俗稱粗齋)、去骨鴨舌及蔡瀾(即豬油)撈麵。當中出了一點意外，蔡瀾撈麵變成鵝片豬脷撈粗加蛋，太座一時唔為意嚐了一口，呢次與豬油撈麵無緣，唯有等下次。

粗齋南乳味、鹹淡適中，材料豐富，計有紹菜、枝竹、金針、雲耳、冬菇、雪耳等，仲有切成心形嘅紅蘿蔔，十分別致。各款材料唔會炆得糜爛，還保留咬口。

去骨鴨舌係一款冷點，鴨舌去骨後配以麻醬，入口又香又爽，最適宜佐酒。太座則認為用鹵水比較好。

蔡瀾撈麵變成撈粗，初時有啲失望，但試了之後原來水準亦唔差。首先鵝片嫩滑，鹵水醃得入味，其香味在口中不斷滲出嚟，水準之高，不比城中數一數二嘅潮州打冷店如尚興遜色。豬脷也炆得十分腍，鹵水味亦滲入每一條纖維中，可惜呢份豬脷唔見有最嫩嘅脷尖，有少少遺憾。粗麵撈得均勻，麵條有嚼勁，還有一股豬油香味，是故筆者與太座食得乾乾淨淨。

粗齋及去骨鴨舌各四十五蚊一碟，鵝片豬脷撈粗加蛋四十八蚊，共銀一百三十八蚊，平均每人六十九蚊。

如前文所講，蔡瀾撈麵變成撈粗，傳遞出錯，本要扣分，不過埋單之時，正在舖面忙得團團轉嘅老闆誠懇地講咗聲多謝，算是互相抵消。

味道：4 (以5分最高)
環境：3
服務：4
衛生：4
價錢：3

用餐日期：2009年3月26日

地址：北角和富道84-94號銀輝大廈地下4號舖

慶祝太座考取特許財務策劃師牌照 (Henry's Kitchen)

呢一日係值得高興嘅一日，因為太座幾經努力，終於成功考取獲國際認可嘅特許財務策劃師嘅牌照。筆者第一時間得悉此喜訊後，立即提議食啲好嘢。今次嘅食肆係位於太座辦公室附近嘅「Henry’s Kitchen」。


從店外內望，燈光調較得比較柔和，情調十分溫馨，適合與知己良朋共膳，當然與愛人於情人節食晚飯亦係一個唔錯嘅選擇。由於筆者公司於當日較早前舉行開市拜神儀式，肚子塞得滿滿的，所以只能與太座食一些比較簡單嘅菜式。

首先呈上兩款湯，鮮帶子南瓜忌廉湯嘅南瓜味唔明顯，不過就帶有帶子嘅鮮味，少許甜甜的，水準已經唔錯，如果南瓜味再突出多少許，令南瓜同帶子嘅味道互相輝映，那就更好，當然講與實行嘅難度係兩碼子嘅事，筆者猜想要在其中拿捏得準確，已經是另一番功夫；至於焗海鮮周打湯嘅海鮮配料亦鮮甜，湯底偏向creamy，符合筆者愛吃creamy嘢嘅口味，酥皮層層包著湯碟，十分鬆化可口，蘸上周打湯，還有一陣牛油香味。

湯之後以素菜打頭陣，先嚟焗菠菜芝士釀意大利珍寶蘑菇。主要材料係意大利珍寶菇，即是portabello，在菇瓣上加上菠菜蓉、椒絲、紅蘿蔔絲、芝士等。Portabello香氣馥郁，咬入口香味已經於口腔中四方八面傾瀉出來，最難得嘅係芝士嘅奶味亦十分突出，雖然以芝士入饌，但芝士那種筆者認為較霸道嘅氣味並沒有淹蓋portabello嘅香氣，兩者於筆者口腔內平分春色，係筆者是次推介；

凱撤沙律很多地方都有得食，但係沙津汁唔係過酸就係過辣，此沙津醬汁恰如其分，在提升食慾之餘亦將味覺嘅官能刺激減到最低，亦是一個令筆者印象深刻嘅菜式。

是晚嘅主角以紅酒汁伴鵝肝意大利扁麵，可惜與前者相比有點失色。首先係鵝肝，外皮冇錯係煎得香脆，最大敗筆係當中有一大條根，大煞風景，撇除呢樣，整件鵝肝都係十分嫩滑如豆腐般。筆者偏愛食比較硬身嘅意粉，貪其較有口感。此處扁麵煮嘅時間稍為耐咗少少，於筆者眼中還有進步空間，但太座就十分滿意扁麵嘅軟硬度。

食完之後，筆者本已塞得滿滿嘅肚子幾乎要炸開一樣，但係呢次係一次愉快嘅體驗。兩人共花費四百五十元，為香港經濟略盡棉力。


味道：4 (以5分最高)
環境：4
服務：4
衛生：4
價錢：4

用餐日期：2009年2月12日

地址：北角宏安道18號9號鋪地下

食湯圓前先醫肚 (味皇小廚餐廳)

日前經網上搜尋器推介「福元湯圓」，專程到附近一帶搵食。當然湯圓只是甜品，唔能夠(其實係唔足夠)裹腹。太座話近近地醫咗肚先，筆者路經此店，見一個叫沙田雞粥加蠔油撈粗套餐大約三十蚊，好似好抵食，就行咗入去。

除咗叫咗上述套餐之外，太座還點了鴨胸冬菇蕃茄湯麵。太座嘅選擇唔錯，一碗大既廿蚊，用料也算得上豐富，配合蕃茄湯底，有冇落味精不能確定，但就算有份量應該也很輕微。

至於筆者叫嘅套餐，有數處不足。首先粗麵嘅鹼水味未能完全清走，而且麵條有點煮得過火，使麵條黏黏的，破壞口感；

雞粥中嘅粥「水了了」，完全唔綿，火路不夠，米粒仲係呈現粒狀，係粥與湯飯之間嘅物體。雞皮鮮黃色，十分唔自然，有如塋光，有點恐怖，可能打針過度啩。

兩人共花費大約五十元，太座嘅評價肯定比筆者高出很多。

味道：2 (以5分最高)
環境：3
服務：3
衛生：3
價錢：3

用餐日期：2009年2月4日

地址：北角電氣道260號地下

過年之後 (金祥排骨麵大王)

經過幾日公眾假期密集式嘅飲飲食食之後，腸胃功能嘅發揮可謂七七八八，人亦變得懶散了許多，已經唁想在家中做任何事，亦唔想再到外面大吃大喝。所以太座建議到屋企附近嘅小食館解決呢個晚餐。


Openrice嘅搜尋功能，為我地搵食提供咗一個好方便嘅平台。按入我地想食乜嘢嘅資料，不一會就能列出一張清單。此店位於電車路一條橫巷，位置人流稀疏，招牌亦唔突出，如果冇openrice都唔會專程嚟試食。看舖頭外嘅宣傳介紹，呢度嘅拿手菜色係排骨麵同埋菜肉雲吞麵，太座與我分別order呢兩款。

排骨即係豬扒，有一層薄麵漿放落滾油炸。麵漿唔會太厚，唔會好似炸一團麵粉般，豬扒本身亦冇用梳打粉醃鬆嘅痕跡，肉質保持適當嘅彈性同埋肉汁；

至於菜肉雲吞嘅雲吞皮比較厚身，接近傳統北方餃子嘅風格。麵條粗粗的一定可以醫飽個肚。

嗜辣的不妨盡享這裡提供嘅辣椒油、豆辦醬同埋辣椒粉，加在上海麵中撈埋一齊食非常可口。

單拼麵廿四蚊一碗。雙拼(排骨加雲吞)廿七蚊一碗，如果兩個人一齊食，分別嗌單拼再撈埋一齊食更加化算。

味道：4 (以5分最高)
環境：3
服務：3
衛生：3
價錢：3

用餐日期：2009年1月30日

地址：北角錦屏街21號地舖

芝麻湯圓寧舍唔同 (福元湯圓)

此小店在筆者家左近，在區內頗有口碑，尤以芝麻湯圓最耍家。是晚專程造訪，太座要了一碗喳喳，筆者則叫了鴛鴦湯圓。

這裡嘅喳喳味道不是很甜，嗜甜者可能未必啱口味，不過材料就認真豐富，除咗一般嘅紅綠豆、芉頭、西米之外，特別之處就係有薏米同埋眉豆，喳喳加咗薏米之後，整個糖水頓時變得有咬口得多，咁多豆類在一起，亦無怪乎喳喳嘅營養價值咁高；

鴛鴦湯圓有芝麻及花生餡，其中以芝麻令筆者留下深刻印象，芝麻十分香口，一咬穿湯圓皮就感到有一股芝麻香氣傾瀉而出，不似一般坊間貨色，只有甜而沒有香味。花生餡亦做得十分仔細，花生粒唔會太大，夾雜白芝麻，亦是另一番味道。據太座所說，是晚嘅湯圓皮不是太煙韌，比平時遜色了一點。筆者覺得這亦無傷大雅。


價錢十分合理，喳喳十一蚊一碗；鴛鴦湯圓十四蚊一碗。下次再光顧時會淨選芝麻湯圓。
 
味道：5 (以5分最高)
環境：3
服務：3
衛生：3
價錢：4

用餐日期：2009年2月5日

地址：北角炮台山福元街7號利都樓地下I-1舖

份量十足 (曼谷泰國菜館)

星期三，下了一、兩陣雨，為炎熱嘅都市稍為降吓溫。是一個在家附近搵食嘅日子，原本嘅目標尚未正式營業，只好行遠少少，食一頓泰國菜。

還記得十多年前仲係學生哥嘅時候，泰國菜不如現在開得成門成市。想食泰國菜就只有九龍城嘅「黃珍珍」，已經是不得了嘅事情。現在競爭何止激烈，水準亦提高了不少。此店在三處地方開業，顧客都唔少，生意不俗。筆者與太座一坐低，服務員便拿來蝦片($10)作小食之用(後來埋單先知蝦片唔係免費嘅)。唔好睇少呢個蝦片，絕唔係超市貨色，味帶微辣，以醒胃為主。蝦片炸得金黃鬆脆，十分可口。

簡簡單單的先嚟一個柚子沙津($60)。沙津附以數隻中蝦，頗大堆頭。蝦肉爽脆，味道亦甜美，看身體嘅反應猜測，可歸納為新鮮類。柚子肉酸中帶一點澀味，需有其他香料減輕部份澀味，可惜已不能力挽狂瀾；

另一道餸係鹹魚炒芥蘭($48)，但餐牌上卻寫上了芥蘭炒鹹魚。需知道前者以芥蘭為主、鹹魚為副，後者則反之。故技術上嚟講可說是貨不對辦，不過筆者當然唔係無是生非嘅人。講番碟菜，也是大大碟，芥蘭爽甜，但鹹香欠奉。再吃一口鹹魚肉，只帶微鹹，全無香味，無怪乎整碟菜沒有鹹香；

主菜香芋焗飯($60)。望落雖少，但食過才知份量比想像中多。芋頭切成粒，增加飯香，芋頭本身也焗得腍，食落滿口芋頭清香及豬油嘅甘香。當中也有幾隻蝦，同樣地蝦肉爽甜，美中不足之處係其中一隻蝦還未挑乾淨蝦腸，一條黑色嘅物體突出嚟，不合衛生。

太座嗜甜，叫了一杯特別飲品黑芝麻珍珠冰($10)。芝麻甜香濃郁，且珍珠不只是一般魚腸粉做成，咬落是有點甜味的。太座十分滿意，筆者則兼甜了點。

此餐共費二百零七蚊，平均每人一百零三蚊，份量十足，適合大夥兒，味道只是合格而已。要食好味泰菜，目前筆者只有入西貢一途。

味道：3 (以5分最高)
環境：3
服務：3
衛生：2
價錢：4

用餐日期：2009年7月15日

地址：北角英皇道433-437號珠璣大廈地下

踏破一雙鐵鞋，原來近在咫尺 (青藏牛肉麵)

星期三，秋風起，空氣亦隨之變得污濁。於優閑雜誌數度介紹這店，位於北角錦屏街，筆者與太座曾兩次從頭到尾走遍此街，除了一些食店及車房之外，此店芳蹤杳然。是日，筆者「的」起心肝再一次由網上地圖考察一下，原來要到此店並非從錦屏街進入，其位置其實是香花徑樓梯旁，要從書局街進入。結果到了第三次，才能一睹此店風采。

店舖面積細小，只能容納大約二十人堂食。燈火通明，廚房也不是很大，偏安一隅。點菜紙上有三十款食品，加上牆上幾味後加的，大約三十五款。廚師看來是外省人。

筆者點了青藏羊肉麵($29)，湯底是用牛骨餚製的，入口充滿牛骨嘅鮮甜味，味精筆者想唔多唔少都會有，但如果去過青藏一帶嘅朋友，可能都會發現當地一般廚師落味精都幾狠的，所以此湯底是輕手了；羊肉放上幾片，不多，但肥瘦適中，啖啖都傳來陣陣嘅羊羶味，吃羊不吃羶，是不過癮的。麵條可選拉麵、扁麵或刀削麵。筆者點了刀削麵，粗粗的幾條，口感一流，只嫌少了點，可能是快樂不知時日過，好味嘅東西總會嫌小。看來，拉麵或扁麵份量會多一點，感覺食得會飽一點。

太座點了三絲涼麵($29)，有蕃茄、青瓜、胡蘿蔔絲，配上冷拉麵，最重要嘅係其沾醬，帶一點醋酸及蒜頭嘅香辣，酸辣度是恰到好處，並不辛辣，十分醒胃。以為此涼麵是川菜，估唔到在這打著「青藏」旗號嘅食店會做得如此出色，令人一試難忘，是筆者嘅推介。

除了麵食之外，此店仲有串燒供應。筆者試了鹽燒羊肉串($10)及汁燒青菜($20)。羊肉串十蚊串，但份量真係少咗啲，可以一口食得晒，水準卻不俗的。至於汁燒青菜，也是份量偏少，不過菜本身已是清甜，加上甜醬汁燒過後，味道更加有層次感，所以份量方面雖唔係咁滿意，但筆者認為也是值得一試的。

最後是甜品出場，首先選了豆沙鍋餅($33)，此滬菜與青藏菜看來是兩碼子的事。可是此店卻能做出不比本地任何滬菜館遜色的豆沙鍋餅。此鍋餅是即叫即做，有點費時，但食落是熱辣辣的。外表雖然望落有點煎得過火，但這不是煎燶咗，而且金黃色嘅外皮一點油膩感覺也沒有，可見油溫嘅控制是一流的。豆沙甜而不漏，筆者極滿意。

再來是酒釀丸子($18/碗)，也是用了點時間處理嘅甜品。丸子口感煙韌，亦有淡淡嘅桂花香，酒味若有若無，可以濃一點。但有時太濃嘅酒會令整個甜品變得有一點酸，很難拿捏得準。

埋單共銀一百三十九蚊，平均每人六十九個半。此店食物份量雖然偏少，但貴精不貴多，以上幾款食物都是水準之作。如要取捨的話，燒得好嘅串燒店比比皆是，來到此，可以不吃。店子小，服務態度當然是誠懇有禮的，是恰到好處的貼心。

味道：4 (以5分最高)

環境：3

服務：4

衛生：4

價錢：2

用餐日期：2009年10月22日

地址：北角錦屏街27A號地舖