三名大肚之人聚首一堂 (泰爽甜)

星期三，太座好友P到新居拜訪，分享懷孕嘅經驗。正考慮如何安頓兩名大肚婆，加一名大肚公嘅吃飯問題，忽然想起舅仔日前提起電氣道街市嘅泰國菜館，在沒有反對嘅情況下，三人行便朝街市進發。

位處於熟食中心，衛生情況稍欠妥善是預計之內，最担心反而係濕滑嘅地面，三個人，五條命，是一步一步，顫顫驚驚的。舖位不大，只有幾張枱。其中一張大枱被一班外形豪邁嘅中年漢佔據著，一邊飲酒，一邊猜枚，聲量比其外形更加「豪邁」。

由泰藉人士主理，取名「泰爽甜」，筆者感到好奇，似乎泰國菜與甜味唔係太有關聯，最多是形容蝦肉爽脆鮮甜而已，有點是為了食個「泰」而已。再望一望周圍，原來森美小儀都推介這裡。筆者一向都唔係太相信名人效應，原因好簡單：口味各人不同，你認為好食並不代表啱佢口味。食嘢，只有忠於自己條脷罷了。

三個人，嗌四樣嘢。大肚婆需要葉酸，一碟綠色嘅餸必不可少，便先來一碟馬拉盞炒芥蘭。馬拉盞不是呈蝦糕狀，而是像蝦干般有大有細的。吃落鹹香味足夠，菜亦是爽脆多汁。

之後是筆者到泰國菜館必點嘅柚子蝦沙律，這裡嘅柚子肉不是搣成一粒粒嘅果肉，而是一「楷楷」的，感覺是做得比較匆忙。柚子味道過於酸澀，幸好椰絲下得頗慷慨，吃落是啖啖嘅椰香，算是一點補償。蝦肉也算爽脆，但當然是食唔出什麼鮮味了。

大家原以為菠蘿炒飯是用菠蘿盛載著的，結果與一般炒飯無異。論香氣雖仍聞得到淡淡嘅菠蘿香，但總比用菠蘿裝載的遜色一點。炒飯本身濕了一點，不過炒得十分均勻，有洋蔥粒及肉鬆吊味，味道不太濃，十分易入口。

最後是泰式燒雞，外皮是燒得有點微焦，可是吃落非但沒有苦澀味，還有一點椰子嘅甜味，原來是經過椰奶醃浸過的，而且有一種沙爹嘅香味。這種烹調手法實在出色。打開雞肉至骨，是剛好的熟，所以肉質嫩滑 ；亦可能浸過椰奶，效果有如敷過 mask般，只是說笑，作不得準。這一道菜，是筆者嘅推介菜。

大家吃得飽飽的，但代價只是二百一十蚊，友人P初時還以為聽錯了。待回過神之後，友人P決定萬歲，筆者與太座不需付出分毫。後來翻查網上其他評論，可堪一試嘅菜色還真不少，值得找一個時間再嚟一次。

味道：4 (以5分最高)
環境：2
服務：3
衛生：3
價錢：4

用餐日期：2010年1月6日

地址：北角電氣道229號電氣道市政大廈2樓C1舖

茹毛飲血 (琼姐泰式私房菜)

星期日，氣溫十幾廿度，是最舒適嘅溫度。一踏入十二月，太座便要忙於為身邊嘅至親安排生日飯局，是晚便是為筆者補祝及岳母預祝生日。

太座早前於網上搜集資料，發現這間泰式私房菜。此店位於登龍街嘅一幢舊樓裡，沒有升降機，只有一列長長的、殘舊的樓梯，感覺像「禁鐘仔」。上到一樓分岔左右，左邊是掛著出入平安嘅木門，右邊坐著一名非中國藉男子，狠狠地抽著煙，後來發現此人正是「瓊姐」嘅大廚。

店內是簡陋的放了幾張摺枱，廚房在大門邊，沒有花巧。六點幾到達，只有筆者一行六名顧客。負責招呼的是一名曉聽廣東話嘅泰藉女士，除了招呼我們，還要照顧一名細路，相信是其家人，成個畫面很有「家庭」feel。

對於已懷孕嘅太座，行一列不長不短嘅樓梯已經是很大嘅運動量，吃一個椰青是無可厚非的。椰青雪得冰涼，入口清甜，用一支鐵匙可以很輕易地刮出椰肉，而且是嫩滑無比的。眾人吃得很開心，更期望隨之而來嘅菜色。

首先出場是冬蔭公，是一邊為湯鍋加熱一邊吃的。冬蔭公香料豐富，香茅、南薑、檸檬葉是不缺的。味道是酸中帶辣，十分醒胃，加上是滾住食的，吃了之後有一股暖氣由丹田升起。配料方面，鮮蝦一環是失色一點，size比較細之餘，全無蝦肉鮮味；一則湯料濃烈，影響味覺判斷，更重要嘅原因是用了冰鮮蝦。在本地食冬蔭公，筆者幾時都講首選西貢嘅「旺泰特食」，這裡可說是二、三名的了。

之後是數款小食，首先是炸蝦餅。據網上評價是必吃之物，外表炸得十分金黃，咬落蝦膠十分彈牙，而且不怎麼油膩。網上評論時真時假，這次是信得過的，不愧為這裡嘅招牌菜。

以幾乎同樣嘅材料，只是用雲吞皮包著蝦膠，便成了炸蝦角。這款小食比炸蝦餅更香口，薄薄的如咖哩角一般，十分香脆可口。蝦膠份量當然比蝦餅少得多，吃了幾巡，也不覺太滯肚。個人口味而言，筆者較喜歡更有份量嘅蝦餅。

泰式鳳爪是每次到泰國菜館食飯，幾乎必點嘅項目。光睇表面，平平無奇，原來是一道頗辛辣嘅菜色。鳳爪爽脆是合乎預期的，最好是配菜除洋蔥、生菜之外，還有鮮甜嘅蕃茄，蕃茄既酸且辣，感覺特別。

主菜先有黃咖哩雞，配以蒜蓉包。黃咖哩嘅特色是除了加入椰奶外，還會加入椰漿，故辣味會被溝淡，味道辣中帶甜，用來點蒜蓉包吃就最美妙了。份量比預期少了些，味道亦正宗，不過咖哩汁不是很濃稠 (註：濃稠嘅原因是加了椰漿)，與標準嘅黃咖哩有點距離。雞肉沒有鮮味，是用冰鮮雞嘅代價，不過在黃咖哩嘅襯托下，雞肉反而顯得比較嫩滑，真神奇。

除了咖哩雞，還有泰式燒雞。單看外表，雞皮燒成金黃色，單吃雞皮，味道帶一點甜，也算可口。可惜，材料局限了味道嘅發揮。雞肉味幾希，肉質亦普通。眾人都是一舊起、兩舊止，只得筆者比較好狀態，吃了七、八成。

雞之外也有豬肉，這道泰式燒豬頸肉，燒肉嘅火喉不俗，保留了豬肉內嘅肉汁。由於豬頸肉嘅含脂肪量比較高，需要點些辣醬汁中和一下。簡單的魚露，再加一點辣椒仔，鹹中帶辣，很美味。

要論最令人失望嘅菜色，非此烤烏頭莫屬了。這是需預訂嘅菜色，聞說是此店名物之一。抱了一點期望。烤魚來到了，是肚內塞了香茅等香料一起烤的。夾起一塊肉來吃，不太熱，已隱然察覺有點不妥了，而且肉質是極其鬆散，口感像很杰嘅漿糊，哪是魚肉應有嘅質地呢？將魚身切開，赫然發現烏頭根本並未烤熟，中間嘅肉仍有血水滲出。於是急忙將事情通知店員，一輪道歉聲中，拿了魚翻烤。翻烤嘅結果，當然是一條熟透了、普通不過嘅魚。入口既無魚味，也無烏頭應有嘅豐腴肉質，只得放棄了。

既有肉，也要菜。一碟椒絲炒通菜，菜炒得剛熟，食落爽甜。簡單嘅炒菜，反而煮得更好。

最後是一道蝦醬炒飯，用來炒嘅係煮起無耐嘅飯，所以炒得比較濕。雖然下了辣椒、洋蔥等配料，但炒得不是太香，感覺是不夠鑊氣，更大原因是飯氣吸收了大量熱力，故唔夠熱將鑊氣迫入食材裡。蝦肉算是彈牙，但不是新鮮蝦，難言有什麼鮮甜味。

一餐生日飯，乘興而去，敗興而返，價錢雖然不貴，人均消費唔駛一百五十蚊，但價錢已不是議題之一了。見其他論者是讚多過彈，夾硬要解釋，可能是日筆者運氣不佳吧。
味道：3 (以5分最高)
環境：2
服務：3
衛生：2
價錢：4

用餐日期：2009年12月13日

地址：銅鑼灣登龍街20-22 號1樓 (上樓梯後分岔口轉左)

份量十足 (曼谷泰國菜館)

星期三，下了一、兩陣雨，為炎熱嘅都市稍為降吓溫。是一個在家附近搵食嘅日子，原本嘅目標尚未正式營業，只好行遠少少，食一頓泰國菜。

還記得十多年前仲係學生哥嘅時候，泰國菜不如現在開得成門成市。想食泰國菜就只有九龍城嘅「黃珍珍」，已經是不得了嘅事情。現在競爭何止激烈，水準亦提高了不少。此店在三處地方開業，顧客都唔少，生意不俗。筆者與太座一坐低，服務員便拿來蝦片($10)作小食之用(後來埋單先知蝦片唔係免費嘅)。唔好睇少呢個蝦片，絕唔係超市貨色，味帶微辣，以醒胃為主。蝦片炸得金黃鬆脆，十分可口。

簡簡單單的先嚟一個柚子沙津($60)。沙津附以數隻中蝦，頗大堆頭。蝦肉爽脆，味道亦甜美，看身體嘅反應猜測，可歸納為新鮮類。柚子肉酸中帶一點澀味，需有其他香料減輕部份澀味，可惜已不能力挽狂瀾；

另一道餸係鹹魚炒芥蘭($48)，但餐牌上卻寫上了芥蘭炒鹹魚。需知道前者以芥蘭為主、鹹魚為副，後者則反之。故技術上嚟講可說是貨不對辦，不過筆者當然唔係無是生非嘅人。講番碟菜，也是大大碟，芥蘭爽甜，但鹹香欠奉。再吃一口鹹魚肉，只帶微鹹，全無香味，無怪乎整碟菜沒有鹹香；

主菜香芋焗飯($60)。望落雖少，但食過才知份量比想像中多。芋頭切成粒，增加飯香，芋頭本身也焗得腍，食落滿口芋頭清香及豬油嘅甘香。當中也有幾隻蝦，同樣地蝦肉爽甜，美中不足之處係其中一隻蝦還未挑乾淨蝦腸，一條黑色嘅物體突出嚟，不合衛生。

太座嗜甜，叫了一杯特別飲品黑芝麻珍珠冰($10)。芝麻甜香濃郁，且珍珠不只是一般魚腸粉做成，咬落是有點甜味的。太座十分滿意，筆者則兼甜了點。

此餐共費二百零七蚊，平均每人一百零三蚊，份量十足，適合大夥兒，味道只是合格而已。要食好味泰菜，目前筆者只有入西貢一途。

味道：3 (以5分最高)
環境：3
服務：3
衛生：2
價錢：4

用餐日期：2009年7月15日

地址：北角英皇道433-437號珠璣大廈地下

午市飯餐好抵食喎 (金枕頭泰國餐廳)

星期四，太陽毫不吝嗇其熱力。繼早一晚食完泰國菜之後，是日晏晝同事提議試一間抵食泰菜館嘅午市套餐，一試也無妨。


這裡嘅午市套餐款式數目驚人，由A至Z，除咗跳了三、兩個英文字母，都有超過廿款選擇。價錢由廿五蚊至三十二蚊不等。再加三蚊仲可以飲椰汁紅豆冰，三十蚊有找，十分吸引。

由於早一晚食咗泰菜，是日對泰菜嘅興緻略減，沒有pad thai或泰式炒河，點了簡單的咖哩牛腩飯。咖哩呈黃色，但唔似泰國嘅黃咖哩，又唔似用咖哩胆開成。有點微辣，椰汁比例比較多，故食起來特別香口惹味；牛腩炆得腍，但保持肉質結構，冇被梳打粉洗禮嘅痕跡，十分美味可口；紅豆冰對筆者嚟講太甜，但紅豆大大粒有咬口，也不錯。

同事話這裡嘅夜市小菜更出色，有機會要試一試。奈何筆者家在北角，一南一北，如果不是工作需要，真是大纜都扯唔埋。如果住响附近嘅話，必定會幫襯夜市。

味道：4 (以5分最高)
環境：3
服務：3
衛生：3
價錢：4

用餐日期：2009年7月16日

地址：粉嶺一鳴路23號牽晴間G2舖

做咗大半日泰仔 (旺泰特食)

星期天，做咗大半日泰仔。首先與友人J到旺角打泰拳，倦極；其後入再到西貢與V會合，刷一餐泰國菜。做完運動，出了一身汗，再享受美食，一樂也。


一提起食泰國菜，筆者嘅第一選擇必然係位於西貢嘅「旺泰特食」。在西貢有兩間同名嘅店舖，一間位於萬年街，另一間位於西貢大廈地下巷內，筆者嘅心頭好係後者。幫襯了呢間舖頭已好幾年了，平均一年都會幫襯幾次，尤其係住在西貢區嘅V，連老闆都認得她。

眾人一坐下，服務員便遞上餐牌。不過對J及V嚟講，睇餐牌係多餘的。老闆親自落單，J及V以準確嘅泰文一一講出想食嘅菜式，老闆初則詫異，繼而露出會心微笑。三人行，六款餸，每人再加一個椰青。椰青清甜多汁，椰青肉亦香爽，是消暑佳品，也能中和辣味。

鹹魚炒芥蘭 – 通常用馬拉盞或蝦醬炒，今次特別少少，用鹹魚炒。芥菜配上鹹魚，效果一樣出色。芥菜爽脆，加上鹹魚嘅鹹香，增加味道嘅層次感；

生蝦 – 以新鮮蝦開邊再用冰保持鮮味，加上蒜片及椒絲，蘸上特製嘅酸辣醬，蝦嘅鮮味、蒜片香味、酸辣味混成一體，味道層次豐富，筆者都忍唔住食了一隻再一隻；

柚子沙津 – 論街外嘅柚子沙津，不是太酸，就是味道過於濃烈，與沙津這稱呼格格不入。這裡嘅柚子沙津，酸、甜、辣、香皆比較含蓄，唔會給味蕾太大負荷。除了柚子肉之外，還有椰絲、香蒜、蔥頭等香口東西，難怪乎入口能感到多種香味交融；

冬蔭公 – 這裡嘅冬蔭公可說是全港數一數二的了。一來冬蔭公嘅酸辣剛好，而且香料選用一絲不苟，香茅、指天椒、檸檬葉、乾蔥頭、南薑、芫茜等一樣都冇少，而且份量十足。味道結構十分豐富，層次分明，不是一般只識落辣油、檸檬汁嘅可比擬。另外，冬蔭公裡有一隻開邊大蝦連殼一起煮，酸辣香嘅湯底之中有一絲蝦嘅鮮甜；

蝦醬炒飯 – 飯身乾爽，炒得粒粒分明，配以蛋香、肉鬆香及蝦醬嘅鹹香，加一片臘腸，感覺一流；

黃咖哩雞 – 黃咖哩一點也不辣，其特式係咖哩醬配以蛋花做汁，既有咖哩香味又有蛋香味，無論係豬、牛、雞也好，通通淪為配角。雖有蝦醬少飯在前，但不叫白飯送咖哩汁簡直暴殄天物，最後V叫了一碗白飯，大家一起分享當前美食。

筆者食過嘅泰國菜館不多，唯只有此地才能叫筆者一來再來。由於食品由泰國人主理，充滿泰國地道色彩，亦只有此地味道最接近泰國當地味道。味道一欄，是滿分了。由於係半街邊檔，唔係所有座位都有冷氣，所以環境及衛生會較為遜色一點。

六餸加三個椰青，共銀三百二十一蚊，平均每人一百零七蚊。味道出色，一百蚊左右就吃得飽飽，實在經濟抵食。


味道：5 (以5分最高)
環境：2
服務：3
衛生：2
價錢：4

用餐日期：2009年5月17日

地址：西貢福民路58-72號高富樓地下15號舖

浪子心聲 (金不換泰國餐廳)

星期三，北大人影響力漸降。是次飯局是餞別太座嘅摯友，聯同摯友嘅中學同學，一王三后嘅配搭，於利舞台食泰國菜。


大家都是已婚人士，暢談婚後生活，與及御夫之道。當然，這切身話題，筆者有利益衝突，不便發表偉論。話題漸漸轉到男人嘅嗜好，三位女士向筆者垂詢。男人嗜好(唔計不良)，不外乎車、表及音響。筆者年少時，也沉迷這些玩意，所費不菲。但認識太座後，培養了對美食嘅追求。車、表等價錢可以很驚人，而且買入後有很多雜資，是會弄窮人嘅玩意。至於食，或豐或儉，都可以有出色嘅美食，而且駛費是一次性，冇手尾跟。是故，「食」是不會食窮人的。

言歸正傳，食泰國菜，筆者首推西貢大廈內嘅「旺泰特食」。至於港島區，「金不換」可謂穩陣嘅選擇。此店位處利舞台，佈置光鮮，格調優雅，走中上檔次。是晚點了幾款經典泰式食物，首先是柚子沙律($70)。

椰絲份量比較少，少一點濃烈感，但這正正配合沙律應有嘅清新怡人。柚子肉清甜多汁，粒粒飽滿，食落還有淡淡嘅椰香，十分出色；

生蝦刺身($95)去殼開邊，加一粒蒜子及辣椒仔，味道刺激，振奮食慾，缺點是蝦肉冇用冰保鮮，亦失去用冰保持蝦肉爽脆嘅功效；泰式鳳爪($58)酸辣度稍嫌不足，而且醃得唔夠耐，筋腱部位較難咀嚼。



炸蝦餅($65)外表炸得金黃，但食落不覺太油膩，油溫控制得宜。蝦餅心放了一些東西，從味道上不能找出其身份，筆者估計是蝦羔之類嘅物體；

主菜方面，計有帶子珊瑚蚌炒西蘭花($100)，整碟餸炒得濕咗啲，乾身一點會更好。用料方面，帶子、珊瑚蚌入口爽脆，是合格的，西蘭花綠中帶黃，不是開到快凋謝嘅貨尾，同樣是滿意的；

鹹魚炒通菜($52)炒得亦爽甜，鹹魚粒亦撈得十分均勻，不會一時鹹過頭，一時全無鹹香味；

海鮮玉子豆腐($68)以紅椒、墨魚、粟米仔、蝦仔等切成碎粒，加一個薄茨煮成。筆者覺得茨汁是重手了，破壞了玉子豆腐外層嘅炸麵皮。豆腐本身則嫩滑，啖不出黃豆香；

芋頭肉碎炒飯($65)顏色豐富，有青豆嘅綠、粟米嘅黃、胡蘿蔔嘅紅，亦聞得到冬菇及芋頭嘅香氣。味道具有層次感，固然有冬菇嘅香，也有芋頭嘅甜，加上醬汁嘅甜，共冶一爐。芋頭切得較為大粒，但食落有令一種風味。

服務是有求必應，啤酒倒了出來，發覺一點都不凍，要求換凍一點的，爽快應承。冷氣不夠，即時調較至合適溫度。灌了兩支啤酒，連加一共銀七百一十蚊，平均每人一百八十蚊有找，是滿意嘅一餐。

味道：4 (以5分最高)
環境：4
服務：3
衛生：3
價錢：4

用餐日期：2009年11月4日


地址：銅鑼灣波斯富街99號利舞臺廣場6樓C-D店