住家菜 (滋味一方)

星期一，據太座講於西營盤附近有一間小店，以所有食品不含味道作招徠。趁友人J到那一帶睇醫生，順道與她一起晚膳。


此店雖是小店格局，但佈置一點都不馬虎，燈火通明，光鮮企理。座位編排有點狹窄，未能滿足如筆者身形般對空間嘅要求。餐牌一物二用，係印刷精美嘅宣傳單張。餸菜款式多樣化，其中特別附調不含味精、晚晚不同款嘅「媽咪靚湯」，單以材料論，有花膠、螺片、猴頭菇、玉竹、黨參等，材料豐富，只要望一望都覺得好味。消費滿二百蚊，仲送滋味雞(例牌)。

大家為了有免費雞食，所以點菜都比較進取。結果三個人，叫了五餸一湯。

豉汁帶子蒸豆腐 ($62) – 蒸嘅時間耐咗，所以帶子變得有點老。不過帶子肉也算是清甜，豆腐清香之餘也滑溜，豆豉汁濃淡適中，恰恰將各種食材嘅味道發揮出來，比日前於大坑「民聲」所食嘅同類菜式更加好；

潮式欖菜四季豆 ($48) – 是功夫頗多嘅一道菜，欖菜與豬肉刴得幾幼細，與四季豆炒勻之後撈飯食，味道帶有少許鹹香，直教筆者食慾大振；

泰式芝麻醬燒骨 ($68) – 以厚肉排入饌，配合帶有酸味嘅醬汁，排骨被醃得鬆軟，毫不費勁便能骨肉分離；

滋味雞(例牌) (免費，原價$48) – 亦是此店嘅招牌菜之一，肉質可稱得上嫩滑，就算雞胸部分都唔會太鞋口。雞肉帶點微鹹，但又不致於鹽焗雞那個程度，這丁點鹹味與雞肉味產生意想不到嘅化學作用，令雞味更突出。是值得加獎嘅一道菜；

腐乳炒通菜 ($38) – 腐乳份量輕微，僅令通菜有鹹香味，基本上保持主要食材嘅原味；

沙參玉竹猴頭菇螺片竹絲雞 ($38) – 無論材料及火喉都十足，難怪湯水鮮甜味美，根本唔需要落味精，味道已經十分好了。筆者覺得這裡嘅老火湯不容錯過。

總括來說，食品烹調以清淡為主，就算要落調味料，都係以輕為主軸。從筆者飯後嘅生理反應，亦相信這裡嘅食品冇添加味精。

服務員嘅態度友善，間中都有笨手笨腳嘅情況，只要不常發生，亦無傷大雅。飯後更免費奉送羅漢果茶或洛神花茶，為晚膳添上完美句號。

埋單共銀二百九十蚊，平均每人九十七蚊，各人都捧著大肚子回家。
 
味道：4 (以5分最高)
環境：3
服務：3
衛生：4
價錢：4

用餐日期：2009年5月11日

地址：西環皇后大道西306號地下

西環爐瑞燒 (本陣)

星期六，天氣還是十分潮濕。筆者與太座為響應地球環保日，於晚上八時半至九時半關燈，所以結伴出外用膳。太座話好耐冇食過日本菜了，還利用網上搜尋引擎搵到一間位於西環七號差館斜對面嘅「本陣」。

此食店以港式經營，有一般日式食品供應，如壽司、魚生及爐端燒等。舖面大約可以容納三十人，但樓底頗高，唔覺太侷促。在星期六晚生意都不俗。筆者與太座冇預約，服務員問介唔介意坐吧枱，當然歡迎之至啦，因為可以第一手問師傅邊種食品最好最抵食。

難得冇揸車，太座提議喝點清酒。筆者自問唔係飲酒專家，問服務員有乜好介紹，她說house sake係日本盛，質素不俗。筆者聽從其建議，點了一支三百毫升庄凍飲($88)，與爐端燒一冷一熱，效果應該唔錯。此清酒水準幾好，清新嘅米香味直撲入鼻，清酒中還有一點甘甜味。我們首先品嚐嘅係數款串燒，之後係壽司及魚生。

燒鹿兒島黑豚($55)/牛舌($25) – 簡單的用鹽、黑椒吊味，外表燒得香脆，剛好封住肉汁。一咬入口，肉汁傾瀉而出。不過牛舌有點燒燶了，使那部分味道變苦，係失手之作。

燒鵝肝($98)/日本蠔($26) – 係咁多款串燒中最令人留下深刻印象。鵝肝用料唔算頂級，鵝肝中有點根，不過師傅火喉控制技術高超，使鵝肝表面煎得香脆之餘，內裡如豆腐般滑，當然鵝肝嘅氣味永遠那麼突出。同樣高超嘅技術也表現在燒蠔上，蠔嘅表面亦是煎得香脆，一咬入口，蠔肉中帶奶白色嘅肉汁唧出，肉質鮮嫩無渣，感覺偏向爽口。

煙肉露筍($24) – 外表切得很有心思，由長至短排列。露筍唔會因為燒得耐而變得乾癟，仍保持鮮嫩，露筍本身亦無渣，選料一點也不馬虎。

燒羊架($64) – 令一款重點推介，首先選料上乘，肉質十分嫩滑，幾乎像5A和牛般，而且羊肉味濃郁，配合師傅嘅手勢，有串燒香味之餘還保留豐富肉汁。

燒飯團($30) – 外表燒得脆卜卜，如食煲仔飯焦一般，不過味道偏鹹。

魚生 – 經師傅介紹，是晚嘅油甘魚腩($70)及鱲魚($65)來貨比較好，食落果然冇花假。油甘魚腩油脂甘香，魚肉嫩滑如豆腐般。鱲魚肉質煙韌鮮甜，與油甘魚肉嘅香滑係截然不同嘅風味。

壽司 – 同樣係師傅介紹，嗌了一客北海道海膽壽司($100)及BB吞拿魚腩壽司($60)。海膽係太座嘅至愛，當師傅放緊海膽於飯團上，太座不斷輕聲說放多一點，師傅果然亦從善如流。海膽十分鮮甜，BB吞拿魚腩也很嫩滑，比起成年吞拿魚腩少了一份魚脂味，用壽司嘅方法食合適，如食魚生的話，還是toro好。

埋單合共七百七十五蚊，平均每人三百八十八蚊，如此質素十分超值。

味道：4 (以5分最高)
環境：4
服務：3
衛生：4
價錢：4

用餐日期：2009年3月28日

地址：西環皇后大道西356號俊庭居地下2-3號舖