留不住溫度 (住吉日本料理店)

星期六，新一年嘅第二天，一個矇矓下雨夜。新居還是一片混亂，那裡有心情留在家中食飯呢？參考網上嘅資料，位於銅鑼灣威菲路道嘅Jacky's Kitchen受到不少好評。沒有事先籌劃，沒有位子是意料中事。就在隔壁，開了一間日本料理，是否與多年前結業的「利休」屬同一個舖位，筆者記不得。

微風冷雨夜，客人稀疏。安頓過後，店員隨即端來兩碟餐前小食，是一些蘋果等切粒，加一點芥辣、糖及醋等，吃落是冰涼醒胃的。

天氣無疑是凍了一點，但筆者並無排除冷盤。打頭陣嘅係蕎麥麵什菜沙律 ($50)。蔬果算是新鮮選料，不過可能放得耐咗一啲，流失了部份水份，食落沒有預期般爽脆。最奇怪的是，沙律上殘留了一些冰塊，一遇上室溫便逐漸溶掉，沖淡了食材本身嘅新鮮味，而且食落變得水汪汪般，大打折扣。要令食材保持低溫，並不是求其用冰冷凍便可過關的。沙律dressing調配本來可以，可惜也是被食材上嘅溶冰水沖淡了。蕎麥麵嘅口感同樣被溶冰水影響，沒有什麼彈性。是完全不合格嘅出品。

吃過失望嘅冷盤之後，便是軟殼蟹牛油果卷 ($120)。先不論味道，單憑外表，心裡暗自涼了半截。包在壽司卷上嘅牛油果肉一夾起便散開，望落是將切得不公整嘅牛油果肉東拼西湊的鋪在壽司卷上。飯嘅握得不那麼緊密，亦冇帶醋酸嘅米氣。筆者相信炸軟殼蟹嘅味道，各食店嘅分別都不會太大，壽司卷嘅決勝間取決於師傅做卷嘅功力。明顯地，這壽司卷也是被比下去的。

豬扒蛋飯 ($70)係太座嘅選擇。很多年前公仔箱做過一齣卡通片叫「伙頭智多星」，片中主角「味吉陽一」最拿手嘅菜色便是豬扒蛋飯。這裡嘅蛋飯，沒有打開碗蓋便如壓力煲湧出嘅蒸汽，更加冇令「味王」口生金光嘅味道。不知何故，飯只是微暖而已，溫度未如陳奕迅那首「沙龍」般留得住。縱是豬扒炸得不差，肉汁豐富，蛋亦香甜嫩滑；不熱嘅食物，味道及感覺已經不是那回事了。

最後是燒池魚 ($130)，是廚師推介之一。魚身上灑滿了鹽，沒有半分油膩，不過一點也不入味。魚肉嫩滑，但味道是非常之清淡，只有近魚肚位才有魚鮮夾雜一點魚腥味。若非筆者好魚，相信大早已經放棄了。池魚還是比較適合做刺身；燒魚的話，還是魚脂豐富如鰻魚或鯖魚比較好。

可能是晚客人不多，或者是見太座粗身大細，服務是預期以外的殷勤。當筆者拍照時，店員也主動幫手將杯碟擺好，方便拍照。「服務」一欄，是值得加分的。洗手間十分整潔，沒有一堆堆用過嘅廁紙；洗手間地下也合理地保持乾爽，衛生也值得加分的。

埋單共銀四百零七蚊，平均每人二百多一點，收費合理。不過其食物既然留不住溫度，所以也留不住筆者。

味道：2 (以5分最高)
環境：3
服務：4
衛生：4
價錢：3

用餐日期：2010年1月2日

地址：天后威非路道11號地下A舖

於小店歡送09 (菖蒲亭)

星期四，大除夕，辛勞了一年，嚟到這一天，是終結，也是開始。天氣有點凍，風亦頗大，太座想慰勞一下大家，想食好一點。大時大節，出外食飯，要麼就是明俾人斬到一頸血，要麼便是提前不知多少天預約。事前沒有安排，臨急臨忙醒起這店，便匆匆的打電話，幸好二人位不需怎麼特別安排。約定七時半，早了十分鐘到達。

店子是地鐵站出口後嘅街角，由日本藉師傅主理。地方不大，節日裡有更多客人，顯得更加狹小。店員見太座腹大便便，便安排了近走廊嘅座位，方便太座出入。安頓後，店員隨即簡介是日精選。筆者本來想吃一點刺身，可是店員說臨近除夕，日本魚市場提早收市，刺身質素不是最好的。也罷，還有其他美食。

先來一杯巨峰提子果酸梳打，入口冰涼，有濃烈巨峰提子嘅酸甜味。太座則是白桃果酸梳打，也相當美味。是除了凍啤酒以外，最佳伴炸物嘅飲品。

前菜是厚燒玉子，煮得稍稍老了一點，不過入口軟滑，蛋香充沛，鹹甜味適中，而且做得比較乾身，比起「一門」嘅濕漉漉，這裡嘅玉子無疑是勝一籌的。

沒有刺身，代之而來是燒物。太座不喜食鱔，但對鰻魚卻情有獨鍾。這一道燒鰻魚，份量雖然不多，但鰻魚肉甘香豐腴，配合一點甜的燒汁，是絕佳嘅配搭。

燒鰻魚之後，便是店員介紹的鹿兒島幸福麥豚串燒。此豚肉肥瘦均稱，脂肪與瘦肉層層相間，故入口充滿豬肉嘅甘香，毫無懸念。這裡嘅串燒充分發揮了此豬肉嘅特質，肉汁固然保留了下來，肉質是鮮美嫩滑的；一丁點嘅黑椒，更能引出豬肉鮮味。

筆者對天婦羅情有獨鍾，縱然口瘡未完全康復，也要照食如儀。這款海老天婦羅，用的是新鮮海蝦，加上蕃薯及南瓜。等了好一陣子，天婦羅才呈現眼前。看其外表，上麵漿嘅功夫真是麻麻地，時厚時薄，而且還偶爾掉下一大塊炸麵漿，似乎師傅不是這一方面嘅專家。幸好，海蝦鮮甜味十足，而且蝦頭附近膏甚多，食落寧舍香口，是整個蝦頭也可以食落肚。

要裹腹，麵食是少不得。太座至愛是稻庭湯烏冬，此烏冬質地幼滑如絲，很對辦。味道欠缺了一點麥氣，比起位於圓方嘅「稻庭」，是稍稍遜一籌。

最後是拉麵沙律，是這裡的名物。各食材雪得冰凍，但無半點倒汗水，一讚。拉麵十分彈牙，入口隱約有小麥香氣。混和了自製沙律醬，既有芝麻香，也有酸甜味，味道豐富。蔬菜也很新鮮爽口，深得筆者嘅心，估唔到最後一道沙律，會令人留下如此深刻印象，是必吃之物。

十多二十名人客，由兩名店員負責招呼，繁忙時段有點顧此失彼，但均能仔細為客人講解。服務一欄，是值得較高嘅分數。

食店沒有趁火打劫，仍舊收平日價錢，有良心。駛費六百多元，平均每人大約三百二十蚊。在居酒屋食飯，沒有喝酒，也要這般價錢。加上節日考慮，也可說是物超所值吧。見坐在吧枱邊嘅日藉人士，皆要了一客關東煮。其後到來嘅熟客，也有相同嘅要求，是首個沽清嘅菜色，想必是得意之作。下次再來，一定要試。

味道：4 (以5分最高)
環境：2
服務：4
衛生：4
價錢：4 (以節日計)

用餐日期：2009年12月31日

地址：鰂魚涌涌芬尼街26-28號海暉大廈G&H舖

日式聖誕大餐 (本陣)

星期五，聖誕節，天氣灰暗。度過了一個寧靜嘅平安夜，是晚與外家一起食飯，除了歡度佳節之外，以慰勞岳母在搬家一事中幫了個大忙。

此店是太座所選，是西環同名食店嘅姊妹店。年前吃過了那分店，其串燒是頗不俗的。今次試食新店，看一看水準能否保持。

店舖屬新派裝修，堂座空間感十足。右面是刺身吧枱，左面大約有八張方枱，可自由組合成長方枱。往內走是三格四人廂座。一台酒櫃放在當眼位置，是居酒屋顯示實力嘅途徑之一 (雖然此店非純粹居酒屋)，日本清酒大約有三數十款之多，都頗鼎盛，但場面冇較早前試食嘅「鳥羽」咁壯觀。

沒有揸車，是難得開懷暢飲嘅時候。是晚選了一支可暖飲嘅越之關吟嚷，精米度是55%，味道清新，有淡淡嘅米香，口感亦細滑。一支750ml，大約是四百多嘅價錢。肯定是貴了一點 (印象中一般純米吟嚷大約是百幾二百蚊便有交易了)，佳節當前，放肆一點也可以吧。

先來一客辣酒煮花螺，辣油落得唔夠本地薑那麼狠。入口只是輕微有點辣而已，到喉唔到肺，食得唔過癮。清一清喉嚨後，大餐正式開始，首先是味道較淡的刺身與壽司。

刺身拼盤有基本嘅八爪魚、三文魚、吞拿魚、鰤魚、帶子等。吞拿魚是云云刺身中最差，魚肉紋路不明顯，食落一點也不肥美；鰤魚肉尚算甘香豐腴，但也不是最好嘅水準。蝦反而不錯，味道鮮甜；鱲魚肉爽脆，與鰤魚肉嘅甘香，各善勝長。當然，吃過北海道魚市場生劏即食剛從海裡捕獲嘅海鮮，是沒有任何地方可以代替的。

 

壽司只吃了兩款：牛油果軟殼蟹壽司是香港人其中嘅至愛，軟黏嘅牛油果加上香脆嘅軟殼蟹，將不同口感享受共冶一爐。壽司握得結實，不會一挾即散；鰻魚卷以紫菜包裹著飯及鰻魚肉，鰻魚肉充滿魚油嘅甘香，照燒汁份量適中，頗惹味。

燒油甘魚頭是半份上的。可惜的是這魚頭並冇想像中肥美，近頭頂嘅肉有點鞋口。

串燒類點了四款，分別是雞腎、雞軟骨、露筍煙肉卷及牛舌。水準是與西環分店一樣的出色。每款肉類俱能用猛火封住肉汁，外表則燒得香脆，在面頭加上適量嘅鹽和黑椒，帶出食材本身嘅肉味。露筍煙肉卷包得論盡一點，奉上時已經有些散「修修」了，比起西環分店或「鳥羽」用竹簽整齊地串起，這裡明顯遜色了。最後添加了一客燒鰻魚飯團，外表是一層被燒成了鍋巴，包著內裡香糯嘅飯團，中間的還吸收了鰻魚油嘅肉汁，食落多了一分甘香。

作為一間綜合式日本料理，也要試一試其他菜色。鐵板燒類首先是清酒煮蜆。清酒嘅酒氣已過，剩下嘅液體只有鹹味冇米香，失色一籌；蜆肉質素也是一般，不見得特別鮮甜，而且有一點韌，再遜一籌。另外也點了一客薄切牛肉及厚切牛肉粒，叫了五成熟，看其色澤明顯地過了火位。味道方面，筆者已戒吃牛肉，無從品評。再嚟一客炒青菜，食材配料是炒得幾均勻，也夠火喉，不錯。

此店最弱一環是炸物，首先是蔬菜天婦羅，包括了南瓜及蕃薯。食材本身是不錯的，而且厚身一大片，入口是一股清甜味入侵口腔中。奈何麵漿上得很厚，而且炸得一點也不香脆，是師傅嘅基本功出咗問題。再嚟是燒豆腐，同樣地豆腐本身十分滑溜，可惜外頭嘅炸皮既厚且淋，毫無欣賞價值。縱使食材優質，但配上拙劣嘅烹調功夫，糟蹋了良好嘅食材。

麵食類選了兩款截然不同嘅風格，第一是稻庭湯烏冬。稻庭烏冬嘅特點是麵身較幼細，入口特別幼滑如絲。此烏冬形神俱似，比下去嘅原因，是入口少了一股麥氣；另一款是血池拉麵，還特別吩咐了加辣。結果，眾人皆評之為微辣而已，有愧於「血池」之名喎！

見眾人還有食之空間，便加了一客shabu shabu。看其陣容相當，有兩隻大虎蝦、三文魚腩、大帶子等，收五百幾蚊，是有理由的。用料頗新鮮，就算是非筆者所好嘅熟三文魚腩，也不顯得特別腥；虎蝦大隻之餘，內裡蘊藏了不少蝦膏，但食嘅時候要相當小心，因為蝦腸是未挑乾淨的。

食得有八、九分飽，餐廳經理奉送一客自家製嘅芝士蛋糕。食落帶一點檸檬香味，味道不錯；但聲言是自家製，稍欠特色，有負「自家製」之名。

服務員十分勤力，但不太醒目。好似拿shabu shabu用嘅鍋時，是連湯一起奉上。鍋本身已經有一定重量，加上湯更加沉重。看其步履不太穩，驚打番之餘也有一點滑稽，何不放上鍋之後才加湯呢？另外，碟經常放在枱與枱嘅交接位。此交接位不平，弄得碟子如騎馬般跳下跳下。以上小節是經驗不足，需要鍛鍊。

埋單共銀二千六百廿五蚊，六個人平均大約四百四十蚊。有刺身、鐵板燒、shabu shabu及吟嚷享受，食材質素雖不是最好，也要這般價錢。

味道是介乎於 3 與 4 之間，故給予 3.5分。總評有點頭痕，是「不過不失」及「值得一試」之間。基於比正常優勝嘅服務水準及出色嘅串燒，故最終撥歸於「值得一試」之列。

味道：3.5 (以5分最高)

環境：4

服務：3

衛生：4

價錢：3

用餐日期：2009年12月25日

地址：北角炮台山木星街3號澤盈中心地下B號舖

西環爐瑞燒 (本陣)

星期六，天氣還是十分潮濕。筆者與太座為響應地球環保日，於晚上八時半至九時半關燈，所以結伴出外用膳。太座話好耐冇食過日本菜了，還利用網上搜尋引擎搵到一間位於西環七號差館斜對面嘅「本陣」。

此食店以港式經營，有一般日式食品供應，如壽司、魚生及爐端燒等。舖面大約可以容納三十人，但樓底頗高，唔覺太侷促。在星期六晚生意都不俗。筆者與太座冇預約，服務員問介唔介意坐吧枱，當然歡迎之至啦，因為可以第一手問師傅邊種食品最好最抵食。

難得冇揸車，太座提議喝點清酒。筆者自問唔係飲酒專家，問服務員有乜好介紹，她說house sake係日本盛，質素不俗。筆者聽從其建議，點了一支三百毫升庄凍飲($88)，與爐端燒一冷一熱，效果應該唔錯。此清酒水準幾好，清新嘅米香味直撲入鼻，清酒中還有一點甘甜味。我們首先品嚐嘅係數款串燒，之後係壽司及魚生。

燒鹿兒島黑豚($55)/牛舌($25) – 簡單的用鹽、黑椒吊味，外表燒得香脆，剛好封住肉汁。一咬入口，肉汁傾瀉而出。不過牛舌有點燒燶了，使那部分味道變苦，係失手之作。

燒鵝肝($98)/日本蠔($26) – 係咁多款串燒中最令人留下深刻印象。鵝肝用料唔算頂級，鵝肝中有點根，不過師傅火喉控制技術高超，使鵝肝表面煎得香脆之餘，內裡如豆腐般滑，當然鵝肝嘅氣味永遠那麼突出。同樣高超嘅技術也表現在燒蠔上，蠔嘅表面亦是煎得香脆，一咬入口，蠔肉中帶奶白色嘅肉汁唧出，肉質鮮嫩無渣，感覺偏向爽口。

煙肉露筍($24) – 外表切得很有心思，由長至短排列。露筍唔會因為燒得耐而變得乾癟，仍保持鮮嫩，露筍本身亦無渣，選料一點也不馬虎。

燒羊架($64) – 令一款重點推介，首先選料上乘，肉質十分嫩滑，幾乎像5A和牛般，而且羊肉味濃郁，配合師傅嘅手勢，有串燒香味之餘還保留豐富肉汁。

燒飯團($30) – 外表燒得脆卜卜，如食煲仔飯焦一般，不過味道偏鹹。

魚生 – 經師傅介紹，是晚嘅油甘魚腩($70)及鱲魚($65)來貨比較好，食落果然冇花假。油甘魚腩油脂甘香，魚肉嫩滑如豆腐般。鱲魚肉質煙韌鮮甜，與油甘魚肉嘅香滑係截然不同嘅風味。

壽司 – 同樣係師傅介紹，嗌了一客北海道海膽壽司($100)及BB吞拿魚腩壽司($60)。海膽係太座嘅至愛，當師傅放緊海膽於飯團上，太座不斷輕聲說放多一點，師傅果然亦從善如流。海膽十分鮮甜，BB吞拿魚腩也很嫩滑，比起成年吞拿魚腩少了一份魚脂味，用壽司嘅方法食合適，如食魚生的話，還是toro好。

埋單合共七百七十五蚊，平均每人三百八十八蚊，如此質素十分超值。

味道：4 (以5分最高)
環境：4
服務：3
衛生：4
價錢：4

用餐日期：2009年3月28日

地址：西環皇后大道西356號俊庭居地下2-3號舖

累積了幾代人經驗嘅燒雞翼 (鳥羽名古屋料理)

星期三，寒冷天氣警告生效，氣溫一下子急跌多度，偶一不慎是很容易出事的。

第一次獲雜誌社之邀請往此新店試食，感覺很新奇。既然是一次比較認真嘅試食體驗，筆者也來一次比較認真及詳盡嘅食評吧！

此店是居酒屋格局，由於樓面面積細，分上下兩層。下層是獨立廂房及塌塌米，上層是堂座。洗手間設計新穎，門鎖以按鈕操作，稍一不慎，可能出現尷尬場面。上層嘅牆架上放滿了琳瑯滿目的瓶裝saki，大大話話有二百幾款，望上去十分壯觀。這些 saki 不只是擺設，而且是零售的 ($78)。只要顧客喜歡，便從架上拿下來俾錢便可，有gimmick。

煮食地點也是上下兩層，上層是位於角落嘅吧枱，主要是做酒吧及串燒的；下層嘅廚房比較大，大約四百方尺，一般煮物都是在這裡預備的。廚房由日藉師傅領軍，據說此師傅祖宗三代都係在日本「鳥羽」嘅地方做雞食品，而且此師傅在大學專修味噌一科，日本人嘅認真及對食物研究之專，又一次體現出來。

未正式試食之前，先來一客前菜。這前菜以青瓜伴牛舌，加一點芝麻及味粉，既香且帶一點辣，襯在涼凍嘅青瓜上，十分開胃。可惜筆者已戒吃牛肉，如果唔係牛舌不一會一定冇得剩。

嚟到居酒屋，又怎可以冇 saki 呢！這 saki 名為「夢工房」，店員介紹話味道偏甜，適合用嚟中和食串燒時比較厚重嘅味道。筆者一聞之下，單憑氣味已經有甜味。食友求知慾強，希望試一試凍飲同熱飲嘅分別，這時暖酒器便大派用場了。

這暖酒器附設溫度計，顧客可從中控制 saki 嘅溫度。熱飲嘅感覺與凍飲完全不同，感覺比較dry，少一分甜味，多一分酒精香味。熱飲saki，溫度不宜太高，大約四十度左右便可，否則酒精也給揮發掉了。

閒談間，各項試菜款式陸續上場，先是胡麻豆腐。外表做得很精緻，是以胡麻(即芝麻)加入黃豆中製作而成，所以入口已能感受到陣陣芝麻嘅芳香。不過，針冇兩頭利，芝麻味是蓋過了本質不濃嘅黃豆味；至於質地方面亦冇普通豆腐般滑溜，是特別，但筆者覺得不那麼討好。

接著便是日式雜燴おでん，有免治雞肉串、烚蛋、魚蛋、蘿蔔等。主要係試一試以秘製味噌做出嚟嘅醬汁。先講雞肉，除了免治肉之外，還混合了雞軟骨，令雞肉串更有咬口。味噌醬鹹中帶微甜，呈紅褐色，屬於赤味噌類，與落在味噌湯中、略帶黃色嘅白味噌不同。

八丁味噌雞翼是該店重點推介嘅菜式，以赤味噌配合不同份量嘅胡椒、味粉等醃料，分大、中、小辣燒成。據說雞翼是來自巴西嘅春雞。不過，在風味十足的調味料「干預」之下，老實說，除了肉質有彈性之外，雞味有什麼不同是冇可能食得出的。不過，以大辣嘅雞翼，配一支冰凍嘅 Asahi，這就是居酒屋無敵配搭。

令一道以味噌做嘅菜是汁煮鯖魚。味噌嘅味道與先前的略有不同，筆者猜想是不同配方所致。鯖魚嘅味道過得去，近魚肚位置有一點腥，是美中不足之處。鯖魚肉質肥美，基本上以這種高魚脂嘅魚入饌，豈有不好食之理！不過，筆者還是覺得鯖魚是簡單的鹽燒最能帶出魚肉嘅甘香豐腴。

主理人不虧是在大學專修味噌，其味道變化層出不窮。在八丁味噌茄子上，味噌變成甜醬般，與蒸得軟腍嘅茄子肉一起吃，茄子肉索滿醬汁，好似正在吃豬腸粉一般。

天扶良豆腐做得也不錯，麵漿是薄薄的一層，內裡嘅豆腐十分香滑，也是加上赤味噌一起吃，是不俗嘅小吃。

這一款連名字也忘記了，是將豆腐炸成金黃色，裡面釀上溫泉蛋，都幾花功夫的。溫泉蛋做到了溏心嘅效果，可惜雞蛋本身毫無蛋味，有形無實，是比較失色嘅一道菜式。

除了上述煮物之外，筆者同時嘗試了幾款串燒。首先是露筍豬肉卷，露筍由短至長順序排烈，以薄切豬肉卷著露筍一起燒。豬肉切得十分薄，刀功有番咁上下，而且肉質肥瘦適中，能在遇熱時迫出豬油，吃起來更加甘香，肉味豐富。

之後兩款串燒比較僻，分別是燒雞頸肉及雞籮柚。平時食雞是不會食呢兩個部位，主要原因是本地雞有好多受到人造荷爾蒙或藥物污染，脂肪多嘅地方(如籮柚)或打針嘅地方(如雞頸)都避得就避。雞頸肉嘅肉質比其他嘅部位嫩滑，不是一隻固執嘅雞 : D；雞籮柚是預期之中嘅肥美。做串燒嘅師傅嘅手藝不錯，燒物皆做到外邊一片金黃香脆，內裡仍保持相當肉汁。

最後是燒雞肉串，材料除了是免治雞肉外，也混有雞軟骨，吃起來更有咬口；除此之外，也加了冬菇碎及洋蔥碎等香口之物，無怪乎啖啖雞肉之中傳出陣陣菌類嘅幽香。

最後嘅最後，食友想試多一點麵粉類食物，便叫了一乾一濕嘅配搭。蕎麥麵與烏冬皆有咬口，麵質不錯。烏冬嘅湯底也很清香，估唔到居酒屋嘅麵食也有相當水準喎。

店員服務殷勤有禮，可能是試食嘅緣故。再細問其中一位正在執拾中嘅年輕小妮子，她對這服務性職位抱著十分正確嘅態度，令筆者十分滿意。這5分服務評級，除部分反映了當晚嘅服務水準外，也當作一種鼓勵。

是晚試食費用全免，以餐牌上嘅價錢作參考，一般消費大約百零二百蚊左右(不連酒水)，是正常居酒屋嘅收費水平。

味道：4 (以5分最高)

環境：4

服務：5 (試菜嘅水準，開業後水準有待確定)

衛生：4

價錢：3

用餐日期：2009年12月16日

地址：銅鑼灣駱克道489號駱克駅21樓