第二輪晚餐 (IL Meglio)

星期日晚，雲層稍為收歛。在父母家裡吃過晚飯之後，收到友人J嘅邀請，與阿madam到尖沙咀諾士佛臺一帶fine dining。雖然已吃得七、八成飽，再輕嚐淺嚼多一點都歡迎，加上太座冇反對，便加入她倆嘅飯局。


一路走著，友人J被印在透明玻璃上嘅Ristorante Venezia字樣吸引，事緣月前她與madam一起到威尼斯旅遊，有機會在一小店一嚐極品意粉，故希望可以舊夢重溫。

首先登場嘅係一系列麵包($58)，baguette外表香脆，內裡烘得鬆軟。尤其喜歡其新鮮蕃茄榨成嘅醬汁，少少酸辣，十分醒胃。

隨之而嚟嘅係beef carpaccio ($112)。Carpaccio相傳係威尼斯嘅人發明嘅特式食品，泛指薄切嘅生牛肉或魚肉作為頭盤奉上。此頭盤除了生牛肉之外，佐以牛油果及火箭菜。生牛肉蘸了些橄欖油，入口鮮美，兼有橄欖油嘅香味。新鮮嘅牛油果入口有溶化嘅感覺，獨特嘅濃郁香味也令人難忘。友人J令點了grilled zucchini ($88)，筆者未有品嚐，不作評論。

吃了前菜之後，進入吃pasta 嘅階段，筆者先淺嚐risotto gamberi($178)。Gamberi者，蝦也。蝦肉稍微燒香，入口爽脆，從身體嘅反應亦可知蝦肉新鮮而非雪藏品。意大利飯中混有不少香菇絲，咬落爽滑清香。Risotto不太creamy，粒粒分明，入口結實但又唔硬，用意大利話形容叫做al dente，要做到al dente，煮飯嘅時間控制要十分準確，時間太短，飯粒中間依然硬，太長又會煮得太腍，冇晒texture。

另一款pasta係seafood linguini($172)。同樣地linguini軟硬度剛好，達到al dente嘅級數。海鮮有青口及帶子，友人J話帶子經過薄煎，仍帶有鮮甜味。筆者試了一隻青口，味道也不錯。加上新鮮蕃茄醬吊味，食得滿心歡喜。

太座先前已吃得飽了，故只能吃一份chocolate pudding($62)。蛋糕烘得鬆軟，充滿朱古力嘅甜香。流沙朱古力餡不會太甜，入口柔滑。暖暖嘅朱古力醬加上雲呢拿雪糕，一冷一熱，太座吃個不亦樂乎。

友人J及madam皆各自嗌了一杯house red($68一杯)及expresso($40 single；$45 double)，連加一共銀九百八十蚊。因筆者與太座均半力出擊，算作一人，故平均每人三百二十幾蚊。

行文至此，筆者要討論嘅事尚未完結。服務一欄值得深入探討。第一，餐廳以Ristorante Venezia 自居，當然要與真正嘅比一比。在威尼斯，在一般餐廳飲水，一嚟可以叫bottled water，要收費；又或者係tap water，是免費的。這裡沒有tab water供應，皆因冇filter，咁白開水都有啩，如果冇又試問點樣沖調凍飲呢？筆者相信高級餐廳都有tab water供應；第二，筆者一干人俱以為麵包是complimentary的，一如外地餐廳一樣，從不知道麵包係要收費的。要收費都唔緊要，請事先講清楚。冇理由在桌上放下一些我地冇order而又要收費的東西。服務一欄，無可避免要扣分，反應此店嘅小家作風。不過，論食物質素是高水準的，拿4分十分公道。


味道：4 (以5分最高)
環境：4
服務：2
衛生：4
價錢：3

用餐日期：2009年6月28日

地址：尖沙咀諾士佛臺8號地下

不需勞動嘅勞動節 (Ristorante Simpatico)

星期五，勞動節公眾假期。難得五月天都仍然天朗氣清，不到郊外走一走實在對不起自己。天色咁好，最適宜望遠啲，要望得遠，當然要站得高，於是筆者與太座往太平山走一轉。


自從有了山頂廣場之後，食肆多咗好多，今次筆者與太座決定响和煦嘅陽光下，歎番一個豐盛嘅「下午茶」，所選嘅食肆Simpatico以意國南方風味為賣點。南意風味與北意嘅主要分別係北意味道比較濃厚，所以比較喜歡用芝士岡酪；南意則比較清淡，喜用蕃茄及橄欖，比較原汁原味。

我們在門外輪候了一會，服務員忙得團團轉。筆者見室外有幾張閒置嘅座位，問點解唔安排我們入座，服務員話恐怕我們受不了陽光，所以冇安排。你唔問，又點知我們介意呢？其實筆者與太座正想一邊進食，一邊享受陽光。結果，我們被安排到露台嘅座位，還可遠眺南區景色。

豐富嘅下午茶全是自選菜式，形容為下午茶，只是時間而已。「下午茶」包括薄餅及沙津，每人各自嗌了一杯飲品。

意式風味薄餅 Capricciosa ($134)：這裡嘅薄餅係明乎其實嘅薄，這亦是意式薄餅嘅特式，不像美式般有所謂厚批及薄批。薄餅底烘得十分脆，比一般食到嘅更脆。據說係搓麵粉嘅時候用了有汽嘅礦泉水，當中嘅二氧化碳可令薄餅更加脆。不過火喉控制有點偏差，有小部份薄餅身烘燶了，食落有點苦。薄餅料有蘑菇粒、意大利肉腸、火腿、橄欖等。正如前文所說，南意食品味道比較輕，所以薄餅唔係用咗好多芝士做底，不過各有風味。

蘑菇菠菜沙津 Spinici ($57)：簡單嘅沙津以菠菜為主體，配以切了片嘅蘑菇及炸得香脆嘅煙肉粒，清淡之餘又不失香口感。沙津只輕微的用橄欖油及黑醋吊味，十分輕巧，也頗醒胃。

太座選了意大利汽酒Prosecco ($80/杯)作飲料。太座對酒精類飲品一向麻麻，唯獨對香檳情有獨鍾。下午茶飲香檳好像過於奢華，於是以比較便宜嘅prosecco代之，效果都不俗。此酒以同名葡萄釀製，入口都幾滑，口感比近年大賣嘅MC dry，不過在陽光底下只有很少細細嘅泡泡從杯底升起，視覺上少了一分享受了。至於筆者只揀了西柚汁($46/杯)，健康飲食。

連加一服務費，共銀三百四十九蚊，平均每人一百七十五蚊。總體嚟講，食物、環境不錯，服務就唔係咁貼心了。

味道：4 (以5分最高)
環境：4
服務：2
衛生：4
價錢：2

用餐日期：2009年5月1日

地址：山頂山頂道118號山頂廣場1樓19-21號店

差別就是那兩杯水 (Pizza Express)

星期三，與一班朋友預祝聖誕節。因早前嘅安排有點倉卒，幾間心儀嘅食府都爆滿，幸好太座呢一期想食薄餅，在眾多連鎖薄餅店中，Pizza Express可謂表表者。

預訂了七個座位，亦強調有大肚婆在其中，需要大一點的空間，結果只是安排了近窗嘅圓枱。一來位置小，不方便太座出入，二來枱嘅面積實在太細了，直徑大約只有一米，那能容得下七份餐具及菜色呢！友人與店員一番交涉，不得要領，也只好硬著頭皮坐下去。及至餐廳經理察覺安排不善，才安排一張長枱。

大家參與了點菜環節，各自點了心頭好，首先出場是麵包類前菜。

焗四色芝士麵包($49)，是將一份蒜蓉包，鋪上四種芝士，包括 gorgonzola、emmental、gouda及 mozzarella 一起烘焗。所以食落既有芝士嘅乳酪香，也有mozzarella 嘅藕斷絲連。要分得出味道是那款芝士，筆者尚未有這般嘴尖，麵包烘得鬆軟可口，倒是無容置疑的。

牛油果雞肉焗麵包條($56)除了雞肉及牛油果外，麵包上還可以找到車厘茄。此配搭對筆者嚟講是頗「特別」的，特別在配料與麵包有點格格不入。食起上嚟亦幾論盡，經常是天一半、地一半，料有料食，包有包食嘅情況。

反而伴隨著沙律嘅焗麵包球，簡簡單單的，沒有什麼配料，光是蘸上一些牛油，又或者是香草汁/蕃茄醬，已經很美味了。

沙律點了兩款，前者是牛油果雞肉沙律($105)。同樣的配料，相比起焗麵包，將雞肉及牛油果造成沙律，效果是自然很多。牛油果肉軟腍香滑，生菜嘅爽甜及沙律菜嘅芳香，是不錯嘅配搭；雞肉凱撒沙律($102)嘅醬料份量剛好，不會令沙律太過酸。

最後一款前菜是焗蘑菇($68)，在蘑菇上釀上mozzarella、白汁及香草汁，不能裹腹，但細細件容易入口，未待筆者拍照，大家已清了一半。入口感覺是濃郁嘅香草味及淡淡嘅芝士味，蘑菇始終不是菌王，其味道是比下去了。伴碟嘅焗麵包球更受歡迎，從圖中剩餘數量可知一二。

意粉類有點了三款，先是大蝦海鮮意粉($105)，配料有蝦、蜆、青口及魷魚。筆者一向對海鮮嘅新鮮度比常人敏感，是晚除了魷魚以外，沒有吃下其他海鮮。魷魚肉幾爽口，味道淡薄；意粉煮得可算挺身，唯韌度不足，感覺是意粉本身嘅麵粉質素問題。

之後是白汁肉醬千層寬麵($105)，層次做得分明，而且寬麵不是坊間一般煮得太軟，有足夠嘅韌度，切一格放在碟上，還能大致保留原先嘅層次；parmesan芝士味道濃郁，接著是蕃茄醬嘅酸甜，再下一層是肉醬嘅鮮美，繁花似錦，層出不窮，是不錯嘅水準。

意式野菌螺絲粉($105)用了意大利野菌加了一點松露油製成，螺絲粉軟韌度嘅控制比之前嘅意粉好，而且入口有菌香。大致相同嘅食材及配料，在Tuscany也試過，水準是兩碼子嘅事。沒有未入口已芳香撲鼻嘅松露香，也沒有porcini嘅濃郁菌香，這便解釋了為何前者索價幾乎只是後者嘅四份之一了。

打開門叫做Pizza Express，薄餅是少不了嘅選擇。先由馬上諾薄餅 La Marzano ($118)開始。配料有意大利肉腸、燈籠椒及紅洋蔥，是那波里薄餅底。餅底是鬆軟有餘，香脆不足。比印象中Pizza Express應有嘅水準差了。另一款是帕爾馬薄餅($130)，特色是配料用上意大利風乾火腿，餅底加了迷迭香。火腿大概是風乾了九個月，故肉味呈淡香。餅底加了香料，入口味道更豐富，而且鬆脆度是預期嘅水準，比起前者無疑是傻勝了。

最後以甜品點綴，計有朱古力蛋糕($55)及芝士蛋糕($60)，兩者皆有XTC gelato配襯，為是晚飯聚劃上句號。

整晚飯局，筆者只喝了兩杯水。第二杯水也是筆者出聲，店員才為筆者添加的。食至尾聲，其中一名店員以機械式的口吻問是晚食物是否滿意，眾人也只是「行貨」地點了點頭而已。沒有人性化嘅服務，只有公式的詢問客人意見是徒然。客人早已在心中留下了不能磨滅嘅分數。

是次人均消費是一百六十蚊，可算抵食之選。

味道：4 (以5分最高)

環境：3

服務：1

衛生：3

價錢：4

用餐日期：2009年12月23日

地址：太古太古城高安閣G517號舖

祝太座生日快樂 (The Mistral)

星期日，天際披上一層薄紗。暑熱是減少了，但風仍是和暖的。又是一年一度為太座慶祝生日嘅日子，選擇在Mistral慶祝係因為月前與為兩老慶祝父親節，於海景軒午膳，太座路經Mistral，被濃烈嘅煎鴨肝味吸引，心生一試之念頭。當然，有折扣優惠劵也是一個重要因素。

Sunday brunch由十一時半開始，至下午兩點半。筆者與太座準時到達，buffet bar上嘅食物亦已經準備就緒。先談環境，是蠻有特色的，而且地方闊落，不走高檔次，食得自然，唔會有有局促嘅感覺，但有點嘈，筆者想晚市嘅聲浪可能會輕一點。對於有小朋友嘅家庭嚟講，這裡另闢一室作兒童遊樂地方，小朋友食完嘢可以走入去玩，父母不須因為要忙於照顧子女而未能享用食物。環境一欄值得給予高分數。

食物嘅種類多元化，單以cold cuts嚟講差不多有十款選擇，包括牛肉(ox tongue)、豬肉(speck ham、巴馬火腿、莎樂美)及駝鳥肉類。cold cuts嘅質素比未轉廚之前嘅Sabatini遜色，但亦可歸納為高水準，加上陣容大，這比前者又勝一籌。麵包嘅選擇寥寥數款，但質素是有保証的。見有食友提及這裡嘅grissini，筆者也有試過，未如食友描述般鬆軟香脆，有點失望。其他嘅麵包則鬆軟有加，配合各種款色嘅芝士，如parmesan, gorgonzola, fortina等，明知會容易飽肚都再添一片。其他嘅意式食物如beef carparccio、薯仔沙律、各類蔬菜沙律等亦不錯；必備嘅生蠔是即點即開的，入口香滑鮮美，未吃主菜已飽了幾分。

太座不能食生冷嘢，只有集中火力食煎鴨肝。未見其貌，先聞其味，教人垂涎三尺，初初煎出嚟嘅鴨肝比較有心機，外表煎得香脆，鴨肝亦滑溜，至後來人客多了，order量也多了，煎嘅水準亦下降了。

食意大利餐，意粉與薄餅少不了，意粉選了linguini配鹹魚及磨菇，口感不差，意粉軟硬度是合格有餘，當然比起Sabatini、Angelini等，還有一點點嘅距離。薄餅餅身夠晒薄，係正宗嘅南意風格，不過有點兒太乾身，忘記吩咐多一點芝士及茄汁，令其更加juicy。

Grilled sirloin steak - 唔係即叫即製, 冇牛味

sea bass - 老過我塊皮

主菜嘅選擇也多，太座與筆者各自點了燒鱸魚及燒西冷牛扒。服務員冇問要幾多成熟，已感不妙。不一會主菜已呈眼前，其速度更叫筆者詫異。牛扒係大約七成熟，肉汁豐富，沒有流失，但牛肉味欠奉。燒鱸魚嘅味道更差，燒得過了火，肉質十分粗糙，完全是一件失敗嘅主菜。在buffet bar上嘅食物水準是不錯的，但main course嘅質素太令人失望，拉低了整體食物嘅評分。

喜歡香檳嘅食友，這裡有prosecco任飲，味道不比一般香檳差的。最後一杯香濃嘅latte，暫時忘卻主菜嘅不佳。

Sunday brunch每人四百六十八蚊，用了七五折優惠劵，連加一服務費每人四百蚊有找。平心而論，這裡嘅食物是有質素的，但作為慶祝太座生日嘅飯局，心裡總是有一點遺憾。
 
味道：3 (以5分最高)
環境：4
服務：4
衛生：4
價錢：4
 
用餐日期：2009年9月27日
 
地址：尖沙咀麼地道70號海景嘉福酒店B2層

時光荏苒，已經一年了 (Tuscany by H)

星期天，結婚一周年，充沛嘅陽光中還有一絲涼意。

近日為覓新居而奔波，事情到了這天終於解決了。半個月之前已訂了位，可惜實在為太多事而操心，冇時間與餐廳manager傾一傾personalized menu，結果變成a la carte。幸好得太座體諒，亦吃得很滿意。

早來了半個鐘，是晚市最早到嘅一枱人。稍為安頓之後，店員奉上餐牌之餘，亦順道介紹special menu 及其tasting menu。琳瑯滿目，一時不知點樣揀，只好by elimination去作決定。首先，太座懷孕，避開海鮮類；另外，筆者戒吃牛肉，可選的只餘下豬羊雞等。最後是沙律、意粉、烤豬肉各一。店員亦將上菜嘅次序簡介給筆者，經同意後才一一上菜。

晚餐由bread basket 開始，有四款麵包。除了plain bread之外，還有grissini、其餘兩款名稱不詳。Grissini是摸上去熱辣辣，入口香脆，芝士味恰到好處，一邊搣一邊吃，唔駛三兩下已經掃光。另外一款是烤餅，混有橄欖片，比grissini嘅味道更濃烈，十分香口。其他麵包皆烘得鬆軟，但暫且擱下，留待稍後會有更好嘅發揮。

前菜是rocket salad ($148)，果如其名，全是火箭菜，加了幾粒鮮甜多汁嘅蕃茄仔。火箭菜故然有其獨有嘅清新芳香，沙律dressing味道特別醒神，與一般的dressing有所不同。究其所以，原來用了陳年balsamic vinegar，配合parmesan cheese切片，味道層次感頓時豐富起來。


Pasta揀了是日special menu 內的 home-made fettuccine ($328)，闊條麵中加了porcini mushroom 及黑松露醬。此店嘅pasta一向是出名的，是晚一會果然名不虛傳，造得很有咬口，冠之以al dente，當之無愧；porcini切片，煮得剛好，咬落爽脆，隱發鮮菌香味；精華部份當然是黑松露醬汁，黑松露嘅香味，無須多講，與porcini嘅香味交錯，合譜完美嘅樂章，配上闊身嘅fettuccine，麵條身上蘸滿醬汁，固然好吃，以麵包做媒介，也是一件人間美食，飯後良久仍齒頰留香。索價超過三百蚊，有點嚇人，但吃過以後，那有抗拒嘅理由。再來十次，也會毫不猶疑落order。

主菜是慢煮豬架($368)，豬肉是用上了西班牙的black Iberian pig，常見是用嚟做風乾火腿。此豬脂肪分佈平均，肉味香濃，是本地豬不能比擬的。看其橫切面，外表蓋著一層芝士，烤得香；內裡白中帶一點粉紅，火喉控制一流。咬落是肉汁豐富，肉質嫩滑，伴上切粒鮮菌嘅醬汁，味道更加多元化。連著骨的肉，筆者當然不會放過，也顧不了什麼儀態，徒手張口便齒開。幸好是意大利餐，冇咁拘謹，如果換了是法國餐，便「有辱國體」了。

飯後甜品，太座要了朱古力蛋糕配以開心果雪糕($128)，筆者是朱古力奶凍($98)。朱古力蛋糕其實是心太軟，督開香軟嘅蛋糕表面，熱騰騰嘅朱古力漿緩緩流出。蛋糕入口香濃但不太甜，加上熱朱古力漿，有幸福嘅感覺；奶凍上加了忌廉泡沫，當中藏有杏仁脆餅粒及latte gelato，縱然已飽了八、九分，三扒兩撥，也清理得一乾二淨。
最後以一杯香濃嘅cappuccino ($42)作結，完滿地完成整個晚餐。

服務非常好，餐廳嘅manager會逐一詢問意見。店員亦十分醒目，十分留意客人動靜，只要客人舉頭一望，店員已站在面前，準備接order。見太座大肚，坐得不甚舒適，未出聲已即時拿了cushion。凡此種種，是值得一個滿分嘅服務評級。埋單一千二百多，平均每人超過六百蚊，以這樣嘅水準，這樣服務質素，絕對物有所值。年底外家一系列生日飯，此店是必然是心水選擇之一。

味道: 5 (以5分最高)
環境: 4
服務: 5
衛生: 5
抵食: 5

用餐日期：2009年11月22日


地址：中環蘭桂坊德己立街58-62號地下