這一刻，我們沉默了(越南人)

星期五，太座入院了，亦預示了小女於母體內，經過差不多十個月嘅發育之後，已經按奈不住要走出來望一望呢個世界。一班太座嘅摰友於晚上嚟到醫院，希望以第一身與太座一起經歷呢個重要一刻。可是，對第一胎嘅孕婦嚟講，整個生育嘅過程是漫長的。過了探訪時間，太座未有進一步嘅動靜，筆者與友人只好離開醫院，往東大街祭五臟廟。

Madam好像是第一次嚟到東大街食嘢，顯得格外興奮。至於筆者及另一友人J，已留下不少腳毛，所以選擇權落在Madam身上。這次中選的是位於「安利」舊舖位嘅一間越南菜館。

時值差不多九點鐘，大家已餓得剩下半條人命。約略看來餐牌之後，便飛快地點了幾款比較容易烹調嘅菜色。香茅豬扒檬粉外表似模似樣，豬扒味道可口，肉質鬆軟。其實要令豬肉鬆軟，一點也不難，不需要用梳打粉，只要用生粉及生抽去醃，肉質便自自然鬆軟之餘，又不失彈性。至於檬粉質素普通而已；香茅雞翼與豬扒同樣地可口，也不錯。

肉燥紅米飯雖然做法簡單，但不知為何弄得水汪汪的，而且肉燥一點也不香，只有肥膩嘅份兒。原意是畫龍點睛的一塊煎蛋，做得馬馬虎虎，既不熱，也神秘地濕漉漉的，是一大敗筆；

越式春卷同樣是乏善可陳，春卷皮十分韌，也不可口，就算餡料豐富也是枉然，欠佳嘅春卷皮，已失去其神髓；最後是蒸粉皮，該是如薄膜般、呈半透明嘅粉皮，變得厚墊墊的。望上去，心已涼了半截。筆者與J有密契地相視一刻，再埋頭苦吃，心想如不是餓得瘋了，決不會在這裡浪費quota。

埋單每人五十二蚊，價錢雖相宜，但叫筆者回頭，難矣。

味道：2 (以5分最高)
環境：3
服務：3
衛生：3
價錢：3

用餐日期：2010年1月15日

地址：筲箕灣東大街55號地下

食甜品度元宵 (天后甜品)

食完雲南米線之後，當然要食番啲甜品啦，順便食湯圓應吓節。此店在街角位，地方「的適」，但甜品選擇算多樣化。湯圓欠奉，幸好還有糖不甩充數。太座與筆者選了榴槤大小西米、蘆薈西米露以及糖不甩。


榴槤一向不是筆者那杯茶，太座則視之如珍寶。據太座嘅評價，這甜品唔夠凍。另外榴槤汁底雖然「杰」，但唔係因為榴槤料足，而是似西米煮耐咗、混合埋啲榴槤汁，食落像米漿一般。唔知係咪榴槤唔當造，成個甜品又唔香，榴槤又唔夠多，評分甚低，不會再光顧；

至於西米露亦同樣冇香味，味道淡如水，筆者求其吃完了事；

糖不甩水準以下之作，糯米粉同生粉嘅比例控制得唔好，所以黏口又唔彈牙。

再睇番有關食評，原來此店以「榴槤椰果冰」最好味，希望同太座再去試一試，不用再失望而回。

兩人共消費六十多元，與一般新式甜品店大同小異。

味道：1 (以5分最高)
環境：3
服務：3
衛生：3
價錢：3

用餐日期：2009年2月9日

地址：天后電氣道83-87號利景閣4號舖

食湯圓前先醫肚 (味皇小廚餐廳)

日前經網上搜尋器推介「福元湯圓」，專程到附近一帶搵食。當然湯圓只是甜品，唔能夠(其實係唔足夠)裹腹。太座話近近地醫咗肚先，筆者路經此店，見一個叫沙田雞粥加蠔油撈粗套餐大約三十蚊，好似好抵食，就行咗入去。

除咗叫咗上述套餐之外，太座還點了鴨胸冬菇蕃茄湯麵。太座嘅選擇唔錯，一碗大既廿蚊，用料也算得上豐富，配合蕃茄湯底，有冇落味精不能確定，但就算有份量應該也很輕微。

至於筆者叫嘅套餐，有數處不足。首先粗麵嘅鹼水味未能完全清走，而且麵條有點煮得過火，使麵條黏黏的，破壞口感；

雞粥中嘅粥「水了了」，完全唔綿，火路不夠，米粒仲係呈現粒狀，係粥與湯飯之間嘅物體。雞皮鮮黃色，十分唔自然，有如塋光，有點恐怖，可能打針過度啩。

兩人共花費大約五十元，太座嘅評價肯定比筆者高出很多。

味道：2 (以5分最高)
環境：3
服務：3
衛生：3
價錢：3

用餐日期：2009年2月4日

地址：北角電氣道260號地下

叉燒都有「五重天」? (蓮香居)

星期四，下了幾陣雨，掃走部份暑氣。太座為近日嘅腸胃問題到西環一位中醫師求診，中醫建議要食比較清淡嘅食物。筆者與太座隨後於西環會合，路經電車路嘅「蓮香居」，心裡有一試嘅念頭。


「蓮香居」與位於中環擺花街附近嘅「蓮香樓」本是同根生，可惜族人爭奪家產見報，不勝唏噓。是晚光顧，此居比彼樓嘅樓面更大，有兩層樓之多。不過樓底較矮，人多熱鬧起來，嘈音之大及雜亦唔係容易忍受。餐牌上嘅菜式與老店無異，一些傳統菜式如金錢雞、雞蛋焗魚腸等都有供應。可惜太座消化系統仍不是十分強壯，幾乎所有招牌菜都生人勿近，結果點了三餸一湯。

叉燒都有「五重天」, 如燒肉嘅話就一流, 叉燒則太膩了

揀剩嘅肥豬肉

蜜汁叉燒係筆者嘅主意，事前亦知道叉燒並不是新、老店嘅招牌菜，只是筆者近日興起叉燒專題研究，故一到粵菜館，幾乎都會點此燒味。一瞥之下，份量十足。再細看之下，問題便來了。叉燒切得太厚，而且厚薄不一，平均每片差不多有一厘米厚，部分更超過半寸之譜，此其一；其二係豬肉並不是脢頭位，而是五花腩肉，肥肉及瘦肉相間，足有五層之多，故筆者稱之為「五重天」，用五花腩做燒肉就一流，用嚟做叉燒就太過油膩了。結果，千挑萬揀，咬剩肥膏大半碟。見隣枱點了同樣食物，要用茶浸數遍才進食，一趣也。

醬燒骨係太座特地為筆者這種食肉獸而點的，外形有點似東坡肉，也是肥肉與瘦肉相間，論選材今次是對辦的。服務員用刀切開之後，瘦肉是白雪雪的，入口有少許鞋口，豬肉亦唔夠入味，油膩感頗重，用嚟送飯，飯粒沾滿了豬油，仲以為去咗「大榮華」食豬油撈飯添。同樣菜式，老店能做到入口肥而不溜，豬肉炆得鬆軟，水準有相當距離喎。

金銀蛋莧菜係為太座而選的，水準正常，冇乜嘢可以講。唯一要稱善就係老火湯(木瓜花生煲豬展)，火喉十足，味道鮮甜，雖有味精疑雲，但已經係全晚比較合心意嘅食品了。

服務員基本禮貌可以，但點菜時會可能會遇到「極力」介紹貴價菜嘅服務員，當然筆者及太座有自己嘅想法，不受影響。

共銀二百五十蚊，平均每人一百二十五蚊，不算貴。本是同根生，為店名嘅擁有權對薄公堂，對外來客嚟講，佢地係用眼去辨認老字號食店，但對飲食有要求嘅朋友係用鼻及脷去辨認的。筆者嘅鼻同埋脷都投中環老店一票。


味道：2(以5分最高)
環境：2
服務：4
衛生：3
價錢：3

用餐日期：2009年6月25日

地址：上環德輔道西46-50號2-3樓