2010年12月27日星期一

結婚兩周年(Robuchon a Galera)

星期五,天色十分好。筆者請了一天假,與太座過大海輕鬆一吓。當然輕鬆嘅方法並非過過手癮,而是口癮。今次嘅主角係今年澳門米芝蓮三星食肆,位於葡京嘅盧貝松。

是兩星期前作出的安排,有Gaddi's的珠玉在前,背負Robuchon嘅大名,令人期待。預約了十二時半午飯時段,準時到達。位於集酒色財氣於一身、但顯得老態龍鍾嘅葡京,一間講求優雅的法國餐廳,有點格格不入。餐廳主調色是藍色,是高貴典雅嘅象徵。論環境,沒有Gaddi's的華麗,空間感亦因樓底嘅限制,有所欠缺。細看之下,餐具是Christofle,可是滿臉風霜,在這種級數的餐廳,是有點出人意表。
事先做了一點資料搜集,對所想吃的東西已略知一二。不過,食法國餐沒有酒,不完滿,沒有駕車之憂,可以放肆一點。一名操法國口音的領班推著一車各式各樣的葡萄酒,向我們逐一介紹。太座喜愛口感較dry的香檳,聽從領班之介紹,一人一杯Arlaux Brut N.V.。酒香清新,帶一點麵包香,氣泡細密而長久,入口順滑,是不錯嘅介紹。
麵包籃新鮮出爐,有五、六款提供,熱辣辣,差不到那裡去。不過有點烘得過了火,表層不夠鬆脆,比Gaddi's是起碼遜一籌;牛油在餐車上呈柱狀,由服務員於客人前用刀片刮在牛油碟上。香味十分淡,入口亦沒有預期之牛奶酥香,整體來說,是有一些失望。
未上頭盤,先來一客醒胃的青蘋果mousse,雪得冰凍一點,令青蘋果的清新更加突出。除了青蘋果蓉之外,原來還將西芹切成細細粒,可口非常,亦為之後的大餐作了最好嘅準備。


Les crustacés

 太座與筆者都係揀了一客三道菜嘅午市套餐,包括前菜或餐湯,主菜一道,可選魚或肉,最後以甜品或芝士作結。太座點了海鮮湯(Les crustacés)作前奏。入口便有清甜可口嘅感覺,但清甜之中有胡椒的一點香辣,只是一丁點,令腸胃添一分暖和,ready for the next course;

L'œuf de poule japonais
筆者的前菜是釀菌(L'œuf de poule japonais),在菌上主要釀了慢煮日本蛋,口感是出奇的creamy,味濃而不溜,嫌味太濃的,呷一口伴碟的火箭菜,平衡得恰到好處。溫度是微微凍了一點,可能是三、兩度,可以好一點。

La caille
主菜方面,太座要了烤鵪鶉(La caille),鵪鶉肉固然是嫩滑無比,表層蘸上焦糖烤焗,加一分甜香;最重要是嫩滑的鳥肉與釀在鵪鶉內的鵝肝是出奇地合襯,一時也攪不清到底是鵪鶉肉滑如絲,還是鵝肝的細緻;鵝肝肥美無根,齒頰留香。伴碟的薯蓉也是不容錯過的。
L'agneau
筆者一如之前在Gaddi's嘅選擇,點了羊鞍肉(L'agneau)。論羊鞍嘅質素,是幾乎沒有可以挑剔之處;火喉剛好,肉色呈嫩粉紅,肉質幼滑。嗜羊嘅筆者,嫌羊鞍肉嫩滑之餘,羶味不足。相比起Gaddi's(詳情見另文),不可說遜色,但是少了一份驚喜。
dessert trolley
女性恩物
飽嚐美食後,又是最令女士們神魂顛倒的甜品時間。dessert trolley一出,琳瑯滿目,相信沒有一位正常嘅雌性物體可以抗拒的。款款甜品皆做得十分美侖美奐,種種皆想試一口,可惜每個午餐只可選三款而已。萬個不願,也要做痛苦嘅決定。側聞鄰桌點了拿破崙蛋糕,服務員手起刀落。裂帛般的聲音,光是此也可知此甜品是必食之選。另外是選了苞芙及朱古力撻,也是可口非常,是女士們嘅天堂。

只是服務員大意了,事後才知有雪糕可供選擇,太座氣惱不已,「敦促」筆者一定要反映。除了在顧客意見卡反映之外,「服務」一欄也扣了一分。
飯後糖果偏甜
一系列偏甜嘅糖果,令味蕾有點吃不消;反而一杯看似普通嘅咖啡,只是呷了一小口,咖啡豆嘅甘香於口腔中躍然而出,良久還感覺到此香味如針般激烈地刺激著口腔中每一寸。令沉寂於筆者體內多年的咖啡癮再一次喚醒,是一生人總要有一次嘅體驗。

午市嘅3-course set是十分抵食的($398 + 10% service charge)。因為飲了香檳,每人再加多二百蚊,這種級數,都唔算貴。在此謝過多年來贊助不少嘅賭客。

整體來說,其三星級地位,撇開上述小瑕疵,也是有其原因,筆者亦相信晚市會是另一光景。如果這裡有三星,Gaddi's至少都要有三星了。


味道:4.5 (以5分最高)
環境:4
服務:4
衛生:5
價錢:5

用餐日期:2010年12月3日

地址:澳門新口岸葡京路2-4號葡京酒店第四期3樓


2010年10月5日星期二

太座生日快樂2010 (Gaddi's)

星期六,國慶翌日,秋風漸起,悶熱天中帶有一絲爽意。也就是這一天,為太座預備了一頓盛宴。

去年於 Tuscany by H 吃了一頓令人愜意的意大利餐之後,今年再接再厲,到此城中頂級法國餐廳慶祝生日。預約於兩星期前已進行,雖然歷史超過五十年,但一點也不落伍。只消在網上按幾下鍵盤,預約手續便成,簡單方便。晚宴前一晚,餐廳給了一個溫馨提示,亦詢問客人有冇特別要求,十分貼心。

筆者無論性格或動作都比較「豪邁」,要求工整的傳統法式晚宴,與筆者好像有點格格不入。不過,為尊重餐廳別的客人,也是餐廳的其中一個要求,是晚筆挺的西服少不了。在半島酒店正門進入,是一派歐陸色彩濃厚嘅佈置,太座正躊躇餐廳的正確位置,筆者指一指旁邊嘅通道,沒有色彩班斑斕嘅霓虹燈,也沒有浮誇的擺設,餐廳嘅招牌是含蓄地掛在一旁。不過,招牌的藍色地毯,獨立的古老升降機,隱隱然散發出貴族般的優雅。

踏入升降機,雖只是一層之遙,但時間像溜得特別慢,以為咁唔好彩,碰上升降機故障,升降機門徐徐打開。享受一頓法式晚宴,兩、三個鐘少不了,慢速的升降機,好像又變得理所當然。

在門前店員稍為核對一下資料後,便被引領進這個華麗的大廳。高高嘅樓底,配上大吊燈,如一的藍地毯,桌子之間合適嘅距離,喁喁私語,不失私隱。每張桌子都擺放一套洋燭台,浪漫滿溢,果然繼承了法國人嘅浪漫。吹毛求疵的,是洋燭台有點變了形,左右不對稱,一雙洋燭不是筆直的聳立著。這個級數嘅餐廳,比分自然要嚴謹,0.5分就此扣了。

有live band及舞池,歌喉比「巨聲」好得多

是晚滴酒不沾,只點了清水,但這水卻殊不簡單,後文再交代。服務員先端上兩款牛油,分別是有鹽及無鹽的。味道呈淡乳香,入口滑溜,絕對不能錯過。配合無限量供應之包點,具畫龍點晴之效。可供任點的餐前麵包有四款,款款精緻,筆者貪心,四款也試過,麵包不僅密度高,而且鬆軟非常。想吃多一點,但恐防眼闊肚窄,也就放棄了。

點菜是頗令人費神之事,尤其是Gaddi's嘅餐牌,林林總總,款款都想試,幸得服務員為每款菜作詳細介紹,兼且會予拿不定主意的客人加入一點適當的個人意見。這些表現,不是對每款菜色了然於胸是不能做到的。筆者為自己點了四道菜,太座則點了三道。

筆者嘅頭盤是水煮帶子配魚子 (lightly-poached scallops with Oscietra caviar in a bouillabaisse dressing)。水煮帶子,火喉拿揑得恰到好處,用餐刀切開,感覺到「黏」刀嘅感覺,原來除了鮑魚可以溏心外,帶子也可以。旁邊加了幾片薄塊,是龍蝦湯之精華,中間的帶子,釀滿了矜貴的鱘魚子,有淡而長久嘅鹹香。

太座嘅頭盤是其中一款signature dish龍蝦雲吞 (roasted lobster ravioli in its own bisque with herb puree)。龍蝦肉固然爽脆鮮甜,廚師嘅功夫顯露在醬汁中,以龍蝦湯肴製,配上菠菜茸 (非餐牌所寫之香草茸,可能大廚臨陣轉章啩?),儘管完成了雲吞,也不禁以麵包去蘸畢之。

筆者比太座多一道菜,就是這味龍蝦湯 (creamy lobster soup with sliced poached lobster)。服務員甫打開蓋著碟嘅金屬蓋,濃烈鮮味即時四射。配合這股濃烈氣味,味道一定是對應地濃郁吧,入口卻意外地清甜。當然,這裡的龍蝦湯沒有如凡品一般,微微有白酒的苦澀;也沒有煮得過了火,如沙紙般鞋口的龍蝦肉。

主菜方面,筆者是乳飼烤羊 (roasted milk fed Aveyron lamb with gratinated potatoes and Provencale vegetables)。烤羊是筆者最愛的菜色,在家中、在外頭都吃過不少。可以說,這烤羊是令筆者最難忘之烤羊。首先,選料上乘,阿維朗之羊肉,脂肪分佈十分平均,故入口是啖啖甘香豐腴;肉質幼細非常,彷彿在每條肌理中都洋溢著羊肉之酥香。大廚嘅烤羊功夫一流,表面是煎得甘香,但只是一層之隔,已經是medium rare,像是將兩種唔同生熟羊肉貼在一起,不愧是煮羊高手,也是Gaddi’s的signature dish。Side dish係gratinated potatoes,無論賣相、氣味一流,但真的已擠不進肚裡了。


太座之燒乳豬拼血腸 (grilled suckling pig with poached loin and home-made sausage, calvados jus),是服務員介紹的,是不錯嘅意見。燒得金黃的外皮,味道香脆可口,肉質嫩滑如豬頸肉。

羊肉及豬肉有幾嫩滑?是筆者及太座事後不需用牙簽或牙線清理牙縫可知一二。

吃得有點過了火,筆者以生果配雪笆 (citrus fruit salad with mint, pink grapefruit-vanilla sherbet)中和。果肉包括橙、柚子、西柚等,上面放上雪芭,用乾冰保持冰凍,最後淋上薄荷汁,令感覺更加冰涼。果肉粒粒結實多汁,味道鮮甜;雪芭甜而不膩,減輕胃部壓力;

太座要的是mascarpone mousse with caramel ice cream,忌廉芝士打得起泡,細密如絲。焦糖濃而不膩,伴碟嘅烘麵包,正好用好「清理」碟內的焦糖。還有精緻的petit four作結,每件也做得一絲不苟,打從生理到心理都十分滿足。食物質素、烹調技巧皆無懈可擊,「味道」一欄那有不滿分之理。

太座生日快樂

服務十分妥貼。每一位服務員對餐牌瞭如指掌,是基本要求,難得的是每一位都有足夠的知識,能蠻有信心地為客人提供合適的建議,是專業的表現。離開餐廳、在升降機等待時,華藉領班從老遠趕到店前送行,「服務」一項也「只能」給予滿分。

未論及價錢,先回應前文提到的清水。不是賣廣告,比起什麼乜乜能量水,這清水更清純,代價就是每支(大約750毫升),盛惠八十五蚊。全程喝了三支水,也就是二百五十五蚊。可想而知,這頓晚餐消費不菲。不過,連太座也同意,這裡是值得一來再來的。

味道:5 (以5分最高)
環境:4.5
服務:5
衛生:5
價錢:5
 
用餐日期:2010年10月2日
 
地址:尖沙咀彌敦道19-21號半島酒店1

2010年2月28日星期日

大叔送車(警官餐廳 - 鄧兆堅堂)

星期六,小女第一次正式去街街,為嘅係添置BB車。作為太座其中一位吊兒郎當嘅好友,升格為叔父輩嘅大叔對小女愛護有加,想也不想便淘腰包送小女嘅第一部車。幾個大唔透,一邊睇說明書,一邊即席安裝及練習操作,一番功夫之後,已經是八時多。晚飯地點,想空間大一點,好讓有位置給BB車,便想起了這裡。



嚟這裡打波就試得多,食飯都係第一次。樓底甚高,就算小女喊得聲嘶力竭,也不很應聲,不是太騷擾其他人。食物水準沒有什麼驚喜,但是考慮到價錢,又確算不俗。最有印象的是雪菜肉崧豆腐(正確名字已記不起),豆腐是十分滑溜,而且味道不太濃烈,伴著白飯一起吃最好;


排骨醃得入味且夠晒耐,骨肉輕易分離。選用了肉排,一層肥一層瘦的,既甘香且肉質有彈性;


霸王雞上放滿了椒絲、韮黃等,這般做法,味道是不能傳到雞肉上的。幸好雞肉尚算嫩滑,入口出奇的有一點雞味。


土魷蒸肉餅瘦肉比較多,缺少咗豬肉嘅甘香味,此空白被魷魚及香菇填補了。由於少了肥肉,吃起來也冇咁滑;


印象中梅菜蒸鯇魚是上了年紀嘅男士恩物,感覺老積。其實好吃的不比梅菜扣肉差。火喉上是差了一點,梅菜嘅甜香味沒有完全迫入鯇魚肉裡;


金銀蛋浸莧菜正常水準,沒有什麼特別。

平均消費是一百蚊一個人,有這樣大嘅場所,減少對其他人嘅影響,是有BB嘅家庭嘅選擇之一。

味道:3 (以5分最高)
環境:4
服務:3
衛生:3
價錢:4

用餐日期:2010年2月6日

地址:銅鑼灣鴻興道28號警官俱樂部2樓

2010年2月19日星期五

防空洞裡嘅派對 (Crown Wine Cellars)

星期六,中秋節假期,亦係太座好友P小姐嘅大喜日子。一對新人揀了這裡作結婚派對場地,事緣新郎哥就是在這裡第一次為P小姐慶祝生日,十分有心思。這裡只招待會員,主打係飲吓酒之類嘅聯誼地點,亦備有食物供應。餐廳前身係防空洞,所以入到裡面絕對收唔到電話,一定唔會被電話滋擾。防空洞旁另闢一間玻璃屋,在陽光燦爛嘅日子,樹影婆娑,也是幾寫意的。




用膳嘅地方唔大,主人家只招待最熟絡嘅好朋友共三十人參與這個午間宴會。未上菜,有麵包供客人享用。一款是普通純烘麵包,另一款是提子包,皆烘得外表香脆,內裡鬆軟,尤其是搽麵包嘅牛油,有淡淡嘅奶香,入口creamy,筆者禁不住連食了幾片包。



前菜筆者與太座分別選了野菇泡沫湯(cuppucino)及蕃茄蝦沙律。湯以野菇為主,配以忌廉底及些少黑松露碎,所以服務員端來時已經聞到一股清香。湯不很杰,就個人口味而言,以上文食材入饌,湯水以濃杰為佳。太座嘅沙律各種食材皆新鮮貨色:蔬果爽甜,蝦肉亦鮮甜有彈性。


前菜及主菜以意粉作間場,用橄欖油,加上香草及野菇炒香而成。意粉入口軟硬適中,意粉心是剛好煮熟了,al dente!份量雖然小,但清清地,為跟著嚟嘅主菜做好準備,是不錯嘅安排。
 


主菜有三種選擇,筆者點了燒安格斯牛柳,太座不吃牛,於是點了燒三文魚柳。牛柳大約四安士,伴以火箭菜、豆角、烤薯等。烤薯加了一點黑椒及鹽一同烤,鹹中猜薯仔嘅甜味,十分可口,其他伴菜也是新鮮味美。至於主角燒牛柳,雖然橫切面呈粉紅色,有點overdone (事前亦冇問要幾多成熟),食落感覺鞋口。幸好先用猛火燒了一片,成功鎖住肉汁,牛肉鮮味不致大量流失。太座嘅魚柳反而冇想像般鞋口,冇期望反而喜出望外。

特別訂做嘅結婚蛋糕 - 非此店出品

甜品有fruit tarts焗草莓芝士蛋糕,當然也有應節嘅月餅。Fruit tarts平平無奇,芝士蛋糕則口感細滑,芝士味雖不濃烈,但味道細水長流,香味縈繞於口腔中。咖啡雖香但有點變質,可能是over-roasted嘅緣故。

服務員態度殷勤,不是叫到先做嘢那一種。用餐途中不斷添補麵包給賓客。要挑剔嘅話,服務員嘅服飾俾人感覺殘舊,而且於比較當眼處處理食剩嘅食物,於這般級數嘅私人會所,是有點不雅。

一個小小嘅私人派對,氣氛十分融洽又唔拘謹,各賓客皆能以輕鬆嘅心情去享受及見證一對新人嘅誕生。這麼特別嘅結婚派對,定必給每一賓客留下深刻印象。


味道:3 (以5分最高)
環境:4
服務:4
衛生:2
價錢:3

用餐日期:2009年10月3日

地址:深水灣壽臣山深水灣徑18號

古有華山論劍,今有康山論辣 (聯記川王涼粉)

星期五,一號熱帶氣旋警報生效,天色一片灰蒙蒙,空氣甘極差。在這濕熱天氣,一頓麻辣宴可是一場及時雨,皆因適量嘅麻辣食品可以促進血液循環,並可以驅除困在身體裡嘅濕毒。


舅仔介紹嘅呢間舖頭位於紅磡區,老闆娘係四川人,每逢月底都會關舖,親自到四川辦貨。究其原因,係因為香港天氣比較潮濕,乾貨香料容易變壞,唔適宜儲存太多。

要預備六人份量嘅食物,點了八款唔同程度嘅辣物打包回康山外家食用。其實所謂八款,當中嘅豬、牛、魚、雞都係以同樣嘅香料泡製,只是辣嘅程度不同。由於各人嘅嗜辣程度不同,八樣餸由小辣至大辣。食濃味嘅食物,當然要由淡入濃嘅次序進食啦!

小辣類:

涼伴木耳 - 係咁多餸之中最唔辣嘅一味,亦係太座能承受嘅最大辣度。木耳爽脆帶點冰涼。辣度係極之輕微,但足以令沈睡了嘅味蕾稍為睜開惺忪嘅眼睛,消化系統亦因為木耳輕微嘅酸甜味而進入作戰狀態;


川椒皮蛋 – 辣度與木耳差不多,辣得嚟有一種清新嘅感覺,不過太座是無福消受了。皮蛋絕對係靚貨色,皆因隻隻都係溏心蛋,外邊剔透,蛋黃軟綿綿,筆者一連吃了幾口;


蒜泥白肉 – 此餸之辣非來自辣椒,而係新鮮蒜頭嘅辣味。此菜嘅製作十分出色,比起大部分一流食府所造的還好。白肉切成薄片,肥瘦比例適中,吸受了蒜泥嘅香辣及其他香料嘅麻辣,肉質可口鬆化,是一定要食嘅菜色。

中辣類:

經過小辣類嘅熱身之後,進入中辣食物。太座最早棄權,外父食中辣食品亦顯得有點吃力。舅仔及姨仔還可以跟得上步伐,筆者與外母仍面不改容。


夫妻肺片 – 以牛心、牛肺、等內臟薄切而成,再以紅油、辣椒、花椒、麻仁、胡椒粉、芹菜、芫荽等伴食。切成薄塊,方便易食,肉質也爽脆;



麻辣口水雞 – 同樣地以前文所講嘅配料泡製。用了新鮮雞肉,無論係雞腿抑或係雞胸,入口都十分嫩滑。至於有否鮮雞味,老實說,在中辣嘅環境下要食得出一點也不易;


毛血旺 – 據網上說法,正宗嘅毛血旺係以鴨血紅為主菜,豬紅也是十分普遍嘅做法。此店用了豬紅,除此之外,還有牛扒葉、大腸、豬皮等,辣油底還有芽菜、粉絲等索味食物。由於香料十足,頗有麻辣勁,再吃底下嘅粉絲,盡得精華,不過味道偏鹹。至於點解咁鹹,容後再談。

大辣類:

戰至此,味蕾全開,要挑戰大辣食物了。筆者開始感到吃力,毛孔、汗腺亦全開,食得痛快淋漓。外母則依然自得其樂,揮灑自如。


泡椒鳳爪 – 外表白雪雪,一如普通鹽水雞腳,令人毫無防範。殊不知被外表欺騙了。一入口,一股帶清新嘅辣味湧至,大出意料之外,少一點定力都會被此突如其來嘅辣味擊倒。筆者稍嫌雞腳可食用部份太少,唔夠過癮;


水煮魚 – 全晚嘅高潮在此。單以顏色論,此菜係眾多餸之中顏色最鮮紅。辣度非同小可,其刺激感係硬生生的、直接的加諸味覺感官上。用了什麼魚,以筆者耐辣嘅功力,恕難分辨。不過,從魚骨嘅數目,相信係淡水魚了。魚肉十分嫩滑,肉質層次分明。嗜辣的,此菜不可錯過。

正當筆者食得面紅耳熱、開始抵受不了嘅時候,瞥見蒜泥白肉下有數條青瓜。即時便吃了兩條。青瓜盡吸蒜泥香味,入口即有一股冰涼感覺,驅走之前殘留在舌尖上嘅辛辣感覺。所以話,青瓜幾時都係唔食得辣嘅人士嘅朋友。

六個人之中,以筆者及外母最耐辣。大家都發現每逢食川菜,都會覺得辣後嘅味道偏鹹,大感不解。大家討論一番,得出兩個結論,其一係味覺經麻辣洗禮之後,對食物嘅鹹度特別敏感;其二係川菜味濃,本偏鹹,以平衡辣味。至於孰是孰非,不得而知了。

老闆係性格巨星,在炎熱天氣,火氣可能會比較猛。輪候時間有時都幾耐,不過是值得等的。筆者建議外賣打包,因現場只有幾張枱,半露天,冇空調,大熱天時都幾辛苦。

價錢十分超值,八款餸菜都係三百幾蚊,平均每道菜四十幾。

味道:4 (以5分最高)
環境:2
服務:3
衛生:2
價錢:4

用餐日期:2009年7月10日

地址:紅磡黃埔街1號地下

曲奇八重奏 (Jenny Bakery)

孩提時代很喜歡食藍罐牛油曲奇,遇上過年時節,各家各戶好多時都擺番一罐招呼朋友。一塊接一塊咁食,幾個細路仔好快就食完一罐。年紀漸長,對曲奇餅嘅渴求減退了。是日嚟到赤柱,聽聞此店嘅曲奇唔錯,應太座所願,買了一點試吓。


精美曲奇罐


店內嘅裝飾十分簡潔光鮮,由兩位一男一女、相信已退休人士睇舖。太座想jenny會唔會係此女士,抑或佢地係jenny嘅父母或家翁姑呢?他們態度十分友善,也難怪。赤柱係遊客區,生活節奏冇咁急速,人都寬容一點。他們仔細介紹了各款餅點。太座也買了幾罐與家人、同事分享,有純味4 mix,也有果仁8 mix。臨行前問建議食用日期,男士答話一個月內食掉就冇問題,他再加一句話唔會擺一個月咁耐,幾日都食晒啦!好,對自家產品那麼有信心。

八款不同果仁組合嘅曲奇

回家路上,太座忍唔住打開一罐果仁8 mix。一打開,罐內嘅香味傾瀉而出,正在揸車嘅筆者都分一分神。果仁曲奇有榛子、合桃、腰果、朱古力果仁,還有一款咖啡味的共八款。香味嘅緣由係曲奇中嘅牛油嘅芳香。入口嘅感覺與藍罐曲奇大不同:牛油味香而不膩,食多一、兩件都唔會覺得滯胃;曲奇本身亦烘得十分鬆化,唔會烘得過硬,尤如藍罐曲奇般。咖啡味那一款除了牛油香之外,還有濃郁嘅咖啡香,但兩種味能平起平坐,十分可口。個人而言,有咬口嘅果仁曲奇會比純味嘅多一種享受;包裝罐用了得意嘅熊仔,觀賞性再加添幾分。

包裝分4 mix、8 mix、細罐及中罐四種組合。4 mix (細)六十蚊;8 mix (細) 八十八蚊;8 mix (中)一百四十蚊。買了一罐4 mix (細)、一罐8 mix (細)及兩罐8 mix (中),共銀四百二十八蚊。雖然比藍罐曲奇貴,但質素嘅分野絕對超過兩者嘅差價。睇嚟過年又多一樣禮物選擇了。

味道:5 (以5分最高)
環境:4
服務:4
衛生:4
價錢:3

用餐日期:2009年7月12日

地址:赤柱新街11號1樓

2010年2月11日星期四

這一刻,我們沉默了(越南人)

星期五,太座入院了,亦預示了小女於母體內,經過差不多十個月嘅發育之後,已經按奈不住要走出來望一望呢個世界。一班太座嘅摰友於晚上嚟到醫院,希望以第一身與太座一起經歷呢個重要一刻。可是,對第一胎嘅孕婦嚟講,整個生育嘅過程是漫長的。過了探訪時間,太座未有進一步嘅動靜,筆者與友人只好離開醫院,往東大街祭五臟廟。




Madam好像是第一次嚟到東大街食嘢,顯得格外興奮。至於筆者及另一友人J,已留下不少腳毛,所以選擇權落在Madam身上。這次中選的是位於「安利」舊舖位嘅一間越南菜館。




時值差不多九點鐘,大家已餓得剩下半條人命。約略看來餐牌之後,便飛快地點了幾款比較容易烹調嘅菜色。香茅豬扒檬粉外表似模似樣,豬扒味道可口,肉質鬆軟。其實要令豬肉鬆軟,一點也不難,不需要用梳打粉,只要用生粉及生抽去醃,肉質便自自然鬆軟之餘,又不失彈性。至於檬粉質素普通而已;香茅雞翼與豬扒同樣地可口,也不錯。


肉燥紅米飯雖然做法簡單,但不知為何弄得水汪汪的,而且肉燥一點也不香,只有肥膩嘅份兒。原意是畫龍點睛的一塊煎蛋,做得馬馬虎虎,既不熱,也神秘地濕漉漉的,是一大敗筆;



越式春卷同樣是乏善可陳,春卷皮十分韌,也不可口,就算餡料豐富也是枉然,欠佳嘅春卷皮,已失去其神髓;最後是蒸粉皮,該是如薄膜般、呈半透明嘅粉皮,變得厚墊墊的。望上去,心已涼了半截。筆者與J有密契地相視一刻,再埋頭苦吃,心想如不是餓得瘋了,決不會在這裡浪費quota。

埋單每人五十二蚊,價錢雖相宜,但叫筆者回頭,難矣。

味道:2 (以5分最高)
環境:3
服務:3
衛生:3
價錢:3

用餐日期:2010年1月15日

地址:筲箕灣東大街55號地下
Related Posts with Thumbnails