於小店歡送09 (菖蒲亭)

星期四，大除夕，辛勞了一年，嚟到這一天，是終結，也是開始。天氣有點凍，風亦頗大，太座想慰勞一下大家，想食好一點。大時大節，出外食飯，要麼就是明俾人斬到一頸血，要麼便是提前不知多少天預約。事前沒有安排，臨急臨忙醒起這店，便匆匆的打電話，幸好二人位不需怎麼特別安排。約定七時半，早了十分鐘到達。

店子是地鐵站出口後嘅街角，由日本藉師傅主理。地方不大，節日裡有更多客人，顯得更加狹小。店員見太座腹大便便，便安排了近走廊嘅座位，方便太座出入。安頓後，店員隨即簡介是日精選。筆者本來想吃一點刺身，可是店員說臨近除夕，日本魚市場提早收市，刺身質素不是最好的。也罷，還有其他美食。

先來一杯巨峰提子果酸梳打，入口冰涼，有濃烈巨峰提子嘅酸甜味。太座則是白桃果酸梳打，也相當美味。是除了凍啤酒以外，最佳伴炸物嘅飲品。

前菜是厚燒玉子，煮得稍稍老了一點，不過入口軟滑，蛋香充沛，鹹甜味適中，而且做得比較乾身，比起「一門」嘅濕漉漉，這裡嘅玉子無疑是勝一籌的。

沒有刺身，代之而來是燒物。太座不喜食鱔，但對鰻魚卻情有獨鍾。這一道燒鰻魚，份量雖然不多，但鰻魚肉甘香豐腴，配合一點甜的燒汁，是絕佳嘅配搭。

燒鰻魚之後，便是店員介紹的鹿兒島幸福麥豚串燒。此豚肉肥瘦均稱，脂肪與瘦肉層層相間，故入口充滿豬肉嘅甘香，毫無懸念。這裡嘅串燒充分發揮了此豬肉嘅特質，肉汁固然保留了下來，肉質是鮮美嫩滑的；一丁點嘅黑椒，更能引出豬肉鮮味。

筆者對天婦羅情有獨鍾，縱然口瘡未完全康復，也要照食如儀。這款海老天婦羅，用的是新鮮海蝦，加上蕃薯及南瓜。等了好一陣子，天婦羅才呈現眼前。看其外表，上麵漿嘅功夫真是麻麻地，時厚時薄，而且還偶爾掉下一大塊炸麵漿，似乎師傅不是這一方面嘅專家。幸好，海蝦鮮甜味十足，而且蝦頭附近膏甚多，食落寧舍香口，是整個蝦頭也可以食落肚。

要裹腹，麵食是少不得。太座至愛是稻庭湯烏冬，此烏冬質地幼滑如絲，很對辦。味道欠缺了一點麥氣，比起位於圓方嘅「稻庭」，是稍稍遜一籌。

最後是拉麵沙律，是這裡的名物。各食材雪得冰凍，但無半點倒汗水，一讚。拉麵十分彈牙，入口隱約有小麥香氣。混和了自製沙律醬，既有芝麻香，也有酸甜味，味道豐富。蔬菜也很新鮮爽口，深得筆者嘅心，估唔到最後一道沙律，會令人留下如此深刻印象，是必吃之物。

十多二十名人客，由兩名店員負責招呼，繁忙時段有點顧此失彼，但均能仔細為客人講解。服務一欄，是值得較高嘅分數。

食店沒有趁火打劫，仍舊收平日價錢，有良心。駛費六百多元，平均每人大約三百二十蚊。在居酒屋食飯，沒有喝酒，也要這般價錢。加上節日考慮，也可說是物超所值吧。見坐在吧枱邊嘅日藉人士，皆要了一客關東煮。其後到來嘅熟客，也有相同嘅要求，是首個沽清嘅菜色，想必是得意之作。下次再來，一定要試。

味道：4 (以5分最高)
環境：2
服務：4
衛生：4
價錢：4 (以節日計)

用餐日期：2009年12月31日

地址：鰂魚涌涌芬尼街26-28號海暉大廈G&H舖

連唯一有吸引力嘅chocolate thunder 都變差了 (Outback Steakhouse)

星期五，天陰陰，還好並冇落雨。筆者與太座到灣仔家計會攞驗身報告，醫生除咗叫筆者減肥之外，一切都正常。雖則被要求減肥，筆者非必要唔會犧牲味覺嘅享受，唯有做多啲運動補數。


記得讀書年代好喜歡去西式扒房，如Tony Roma’s、Dan Ryan、Ruby Tuesday等。太座則對這些食店興趣有限，唯一例外就係Outback嘅雲呢拿雪糕朱古力軟餅(chocolate thunder)。太座咁欣賞呢款甜品，筆者冇理由會錯過。為求有泊車優惠，於是乎朝著康怡Outback進發。

星期五晚市都有幾多人幫襯，恰巧有二人座位，所以筆者與太座不須為等位而大費周章。未點菜，先來一客免費嘅黑糖麵包配牛油。麵包奉上時還是暖暖的，入口可感受到清香嘅小麥味，再蘸上牛油，係裹腹嘅良品。由太座發辦點菜，包括香脆薯條混芝士 (Aussie Cheese Fries)、燒肉醬味豬肋骨(半份) (Ribs on the Barbie)及燒雞凱撒沙津 (Grilled Chicken Caesar Salad)。

薯條本身係由新鮮薯仔批出嚟，本身炸得香脆之中不失薯仔味。芝士嘅作用不大，可能係過鹹嘅關係。不過點上sour cream之後味道登時精彩起來；

豬肋骨嘅燒肉醬濃淡適中，印象中冇Tony Roma’s來得那麼激烈，夾在肋骨中嘅豬肉，嫩滑是預期之內，但這亦非必然。有些餐廳會用水將豬肋骨煮至大約六、七成熟，再用grill嘅方法煮至全熟，肉質會變得鬆散。此豬肋骨豬肉纖維仍緊密，可惜豬肉味偏淡；

最令筆者驚訝的是燒雞凱撒沙津，燒雞嘅份量比蔬菜多出很多，失去沙津嘅精神。

最後當然輪到是晚嘅主角出場 - 雲呢拿雪糕朱古力軟糕。成個甜品嘅構造係忌廉最上層，中間係雲呢拿雪糕，最底下係朱古力軟糕。據太座嘅記憶，以前嘅份量比較大，而且朱古力軟糕偏向有少少咬口。如今此軟糕果仁太多，令整個軟糕組織十分鬆散。這種做法雖然加重成本(果仁一定比麵粉貴)，但吃力不討好，影響整個甜品嘅質素。

服務員雖然勤力，在舖面內遊走不停，但顧客太多，筆者要多番催促才有暖水奉上。除了此，上菜速度還是不怠，頃刻所點了嘅菜式都已奉上。

埋單結賬，共銀四百元正，平均每人二百蚊。老實話，筆者對呢種中檔美式扒房食品嘅熱情已經冷卻了不少，非必要都唔會响筆者嘅選擇名單之內。不過以此種食品評之，筆者還是覺得Outback係做得比Tony Roma’s、Dan Ryan好。
 
味道：3 (以5分最高)
環境：3
服務：2
衛生：4
價錢：3

用餐日期：2009年4月17日

地址：鰂魚涌康山道1號康怡廣場地下1號舖

差別就是那兩杯水 (Pizza Express)

星期三，與一班朋友預祝聖誕節。因早前嘅安排有點倉卒，幾間心儀嘅食府都爆滿，幸好太座呢一期想食薄餅，在眾多連鎖薄餅店中，Pizza Express可謂表表者。

預訂了七個座位，亦強調有大肚婆在其中，需要大一點的空間，結果只是安排了近窗嘅圓枱。一來位置小，不方便太座出入，二來枱嘅面積實在太細了，直徑大約只有一米，那能容得下七份餐具及菜色呢！友人與店員一番交涉，不得要領，也只好硬著頭皮坐下去。及至餐廳經理察覺安排不善，才安排一張長枱。

大家參與了點菜環節，各自點了心頭好，首先出場是麵包類前菜。

焗四色芝士麵包($49)，是將一份蒜蓉包，鋪上四種芝士，包括 gorgonzola、emmental、gouda及 mozzarella 一起烘焗。所以食落既有芝士嘅乳酪香，也有mozzarella 嘅藕斷絲連。要分得出味道是那款芝士，筆者尚未有這般嘴尖，麵包烘得鬆軟可口，倒是無容置疑的。

牛油果雞肉焗麵包條($56)除了雞肉及牛油果外，麵包上還可以找到車厘茄。此配搭對筆者嚟講是頗「特別」的，特別在配料與麵包有點格格不入。食起上嚟亦幾論盡，經常是天一半、地一半，料有料食，包有包食嘅情況。

反而伴隨著沙律嘅焗麵包球，簡簡單單的，沒有什麼配料，光是蘸上一些牛油，又或者是香草汁/蕃茄醬，已經很美味了。

沙律點了兩款，前者是牛油果雞肉沙律($105)。同樣的配料，相比起焗麵包，將雞肉及牛油果造成沙律，效果是自然很多。牛油果肉軟腍香滑，生菜嘅爽甜及沙律菜嘅芳香，是不錯嘅配搭；雞肉凱撒沙律($102)嘅醬料份量剛好，不會令沙律太過酸。

最後一款前菜是焗蘑菇($68)，在蘑菇上釀上mozzarella、白汁及香草汁，不能裹腹，但細細件容易入口，未待筆者拍照，大家已清了一半。入口感覺是濃郁嘅香草味及淡淡嘅芝士味，蘑菇始終不是菌王，其味道是比下去了。伴碟嘅焗麵包球更受歡迎，從圖中剩餘數量可知一二。

意粉類有點了三款，先是大蝦海鮮意粉($105)，配料有蝦、蜆、青口及魷魚。筆者一向對海鮮嘅新鮮度比常人敏感，是晚除了魷魚以外，沒有吃下其他海鮮。魷魚肉幾爽口，味道淡薄；意粉煮得可算挺身，唯韌度不足，感覺是意粉本身嘅麵粉質素問題。

之後是白汁肉醬千層寬麵($105)，層次做得分明，而且寬麵不是坊間一般煮得太軟，有足夠嘅韌度，切一格放在碟上，還能大致保留原先嘅層次；parmesan芝士味道濃郁，接著是蕃茄醬嘅酸甜，再下一層是肉醬嘅鮮美，繁花似錦，層出不窮，是不錯嘅水準。

意式野菌螺絲粉($105)用了意大利野菌加了一點松露油製成，螺絲粉軟韌度嘅控制比之前嘅意粉好，而且入口有菌香。大致相同嘅食材及配料，在Tuscany也試過，水準是兩碼子嘅事。沒有未入口已芳香撲鼻嘅松露香，也沒有porcini嘅濃郁菌香，這便解釋了為何前者索價幾乎只是後者嘅四份之一了。

打開門叫做Pizza Express，薄餅是少不了嘅選擇。先由馬上諾薄餅 La Marzano ($118)開始。配料有意大利肉腸、燈籠椒及紅洋蔥，是那波里薄餅底。餅底是鬆軟有餘，香脆不足。比印象中Pizza Express應有嘅水準差了。另一款是帕爾馬薄餅($130)，特色是配料用上意大利風乾火腿，餅底加了迷迭香。火腿大概是風乾了九個月，故肉味呈淡香。餅底加了香料，入口味道更豐富，而且鬆脆度是預期嘅水準，比起前者無疑是傻勝了。

最後以甜品點綴，計有朱古力蛋糕($55)及芝士蛋糕($60)，兩者皆有XTC gelato配襯，為是晚飯聚劃上句號。

整晚飯局，筆者只喝了兩杯水。第二杯水也是筆者出聲，店員才為筆者添加的。食至尾聲，其中一名店員以機械式的口吻問是晚食物是否滿意，眾人也只是「行貨」地點了點頭而已。沒有人性化嘅服務，只有公式的詢問客人意見是徒然。客人早已在心中留下了不能磨滅嘅分數。

是次人均消費是一百六十蚊，可算抵食之選。

味道：4 (以5分最高)

環境：3

服務：1

衛生：3

價錢：4

用餐日期：2009年12月23日

地址：太古太古城高安閣G517號舖