2010年1月26日星期二

早來了的歲晚夜宴 (香宮)

星期四,氣溫非常涼快。日前接到某雜誌嘅電話,獲邀出席是晚嘅宴會,一嚐新科二星總廚嘅手藝。有食神當然是一件美事,不過離小女預產期非常接近,一頓免費嘅美宴,隨時會因為小女提前幾天出世而泡湯。筆者當然想小女能夠早一點與父母見面;另一方面又十分期待是次香宮宴,弄得心情十分矛盾。

日子一天一天的過,終於等到了這夜,小女亦似乎想食埋呢餐先出世。獲邀嘅食客,連筆者在內,總共有五對夫婦。大家皆準時於七時四十五分抵達現場。經大會安排了獨立廂房,方便是次聚會,亦方便雜誌社職員拍照及做訪問。





筆者家在港島區,平日甚少往九龍區用膳,「香宮」更是筆者之前未幫襯過。取名「香宮」,氣派果然不凡,如宮廷般華麗。樓底十分高,裝修富有中式格調。牆上嘅字畫、餐牌,以至桌布及食具,不論真膺,均是漂亮嘅藝術品。筆者最愛便是餐牌上嘅鴛鴦圖。

是提早了的春茗,故轉盤上也應節地放了錦盒,裝滿多款賀年食品,其中以笑口棗糖蓮子最受歡迎。前者是炸得香而不膩,咬落是十分鬆化可口;後者一入口是一股清甜湧向喉頭,令人回味。





宴會開始之前,「香宮」嘅總廚葉志祥師傅特地抽時間為各食客講解鮑魚這食材及幾種簡單的,在家中也能做到的煮鮑魚嘅方法,還即席示範是晚第一道菜色牛油果涼伴南非鮑




據葉師傅所講,這道菜嘅設計是經過多次反覆嘅嘗試才完成。是將南非罐頭鮑切片,再梅花間竹的放進牛油果肉。這個配搭看來十分奇怪,不過食落嘅效果卻是出奇地好。牛油果香濃嘅果肉味,將鮑魚嘅鮮味帶了出來。由於是涼伴嘅關係,如果將之當作日式刺身來吃,加一點新鮮芥辣,味道嘅層次便會更加豐富。



第二道菜色是蟹皇燴生翅,單看其金黃色的外表,以及濃稠嘅湯底,加上陣陣蟹黃香,可知蟹皇嘅份量絕非敷衍了事。出於鯊魚是瀕危動物,加上對魚翅這種冇本身味道嘅東西,筆者從來都不太好,故已戒吃了。記憶中食過嘅蟹皇翅,這裡算是數一數二了。不過,用上了粒粒蟹黃嘅「龍景軒」,其驚喜程度尤甚。



見筆者只是望著魚翅而不動碗筷,餐廳經理即時前來問個究竟,心恐筆者有什麼不滿意嘅地方。筆者向他解釋了因由後,經理立即到廚房為筆者安排一碗北茋燉竹絲雞。此湯清澈見底,味道微甘,頗滋補的。



第一道主菜是頭抽煎青衣球,青衣肉質本細軟黏膠,並非筆者那杯茶,幸好以頭抽泡製嘅薄茨汁,特別香純濃郁,配合煎得小小脆嘅魚肉表面,味道不俗。相比之下,筆者還是屬意肉質爽脆嘅海斑類。



之後便是竹笙露筍卷。每枝露筍均以竹笙包裹著,而且十分嫩滑無渣,鮮嫩碧綠,是一等嘅貨色。加上南瓜汁嘅香甜,雖然清淡,但依然可以維持味蕾嘅活躍程度。


緊接的是生菜包蠔豉崧,是一道頗費功夫嘅菜色。是將蠔豉及馬蹄切成細粒再爆香,用生菜葉包起來,加一點醬汁來吃。蠔豉本身已經濃縮了蠔嘅鮮香味,再切成細粒。由於與空氣接觸嘅面積大咗,所以更加「蠔」氣干雲,未上枱,陣陣蠔香已撲鼻而來。加入馬蹄,令口感添上爽脆。



新年飯,一碟生炒臘味糯米飯是少不了。臘味種類繁多,而且有蝦干、冬菇粒、芝麻、香蔥等,吃起來幾種香氣共冶一爐,那有不香之理;糯米炒得粒粒分明,色澤如一,入口軟糯,也是沒有可批評嘅地方。唯一可挑剔之處,只是吃到最後味道太濃重,開始吃不消,還感覺鹹了一點。


有生炒糯米飯,又怎會少得其孖生兄弟 - 炆伊麵呢?蟹肉炆伊麵,蟹肉是一絲絲的,絕不吝嗇。這當然了,否則又怎樣配合其食肆嘅身份、級數!炆伊麵常有油膩嘅弊病,這裡沒有犯上,是關乎火喉嘅問題。伊麵條理分明,咬落有如吃意大利粉那種 al dente 嘅質感。無容置疑,這碟炆伊麵是星級之作。



最後嘅甜品環節,先來一碟煎堆。外貌看似普通不過,但當一口咬下,便知此非凡品。其一是非常香口之餘,完全沒有油膩感;此外口感軟糯,但不會黏著牙齒間,影響咀嚼及口腔衛生。




令一道甜品是新產品,宴會當晚尚未正式推出市面。取名為黃金萬兩,其實是將南瓜糕,面頭放上一層燕窩,再將之塑造成千足金條嘅模樣。選用嘅南瓜嚟自日本,比大陸南瓜更香,果肉更甜。所以,每一口南瓜糕都容易嘗得到南瓜嘅香甜味。包裝禮盒十分精緻,看起來也很貴重的了。本想訂購幾盒,可惜負責人可能冇預計在座食客會買,做完一會display便拿走了禮盒。



最後是每人一客的凍芒果蛋白,芒果鮮甜多汁,蛋白亦滑溜。不過兩者走在一起,是格格不入的。芒果甜味太突出了,完全掩蓋蛋味。

由大雜誌社安排嘅飯局,服務當然不會失場的。一圍枱十個人,已經有三名服務員侍候。而且餐廳經理亦經常在席旁,準備隨時解答各食客嘅疑難。在座各食客皆認為,如果主廚葉師傅可以多一點走出來與大家交流煮食心得會更好。可惜的是,中菜嘅烹調比西式的費時費勁,大廚要經常在廚房內打點,那有時間走出廚房呢。這困難筆者是了解的,所以無損服務一欄嘅滿分評級。

吃飽以後,大家暢談一番對來年香港嘅展望、對雜誌嘅感想及建議。唔少得的是對身為準媽媽嘅太座,傳授一些教子心得。既滿足了食慾,又增進了不少為人父母嘅知識,是令人難忘嘅一個晚上。

後記:

宴會翌日晚,太座開始感覺陣痛,隨即進了醫院,於星期六下午誕下小女。筆者嘅小女真識食,要食完好嘢先出世。筆者一定會更加努力工作,給家人更多美食體驗。


味道:4 (以5分最高)
環境:4
服務:5
衛生:5
價錢:3 (宴會由雜誌社安排,費用全免)

用餐日期:2010年1月14日

地址:尖沙咀麼地道64號九龍香格里拉大酒店地下1層

2010年1月24日星期日

三名大肚之人聚首一堂 (泰爽甜)

星期三,太座好友P到新居拜訪,分享懷孕嘅經驗。正考慮如何安頓兩名大肚婆,加一名大肚公嘅吃飯問題,忽然想起舅仔日前提起電氣道街市嘅泰國菜館,在沒有反對嘅情況下,三人行便朝街市進發。

位處於熟食中心,衛生情況稍欠妥善是預計之內,最担心反而係濕滑嘅地面,三個人,五條命,是一步一步,顫顫驚驚的。舖位不大,只有幾張枱。其中一張大枱被一班外形豪邁嘅中年漢佔據著,一邊飲酒,一邊猜枚,聲量比其外形更加「豪邁」。




由泰藉人士主理,取名「泰爽甜」,筆者感到好奇,似乎泰國菜與甜味唔係太有關聯,最多是形容蝦肉爽脆鮮甜而已,有點是為了食個「泰」而已。再望一望周圍,原來森美小儀都推介這裡。筆者一向都唔係太相信名人效應,原因好簡單:口味各人不同,你認為好食並不代表啱佢口味。食嘢,只有忠於自己條脷罷了。



三個人,嗌四樣嘢。大肚婆需要葉酸,一碟綠色嘅餸必不可少,便先來一碟馬拉盞炒芥蘭。馬拉盞不是呈蝦糕狀,而是像蝦干般有大有細的。吃落鹹香味足夠,菜亦是爽脆多汁。



之後是筆者到泰國菜館必點嘅柚子蝦沙律,這裡嘅柚子肉不是搣成一粒粒嘅果肉,而是一「楷楷」的,感覺是做得比較匆忙。柚子味道過於酸澀,幸好椰絲下得頗慷慨,吃落是啖啖嘅椰香,算是一點補償。蝦肉也算爽脆,但當然是食唔出什麼鮮味了。




大家原以為菠蘿炒飯是用菠蘿盛載著的,結果與一般炒飯無異。論香氣雖仍聞得到淡淡嘅菠蘿香,但總比用菠蘿裝載的遜色一點。炒飯本身濕了一點,不過炒得十分均勻,有洋蔥粒及肉鬆吊味,味道不太濃,十分易入口。



最後是泰式燒雞,外皮是燒得有點微焦,可是吃落非但沒有苦澀味,還有一點椰子嘅甜味,原來是經過椰奶醃浸過的,而且有一種沙爹嘅香味。這種烹調手法實在出色。打開雞肉至骨,是剛好的熟,所以肉質嫩滑 ;亦可能浸過椰奶,效果有如敷過 mask般,只是說笑,作不得準。這一道菜,是筆者嘅推介菜。

大家吃得飽飽的,但代價只是二百一十蚊,友人P初時還以為聽錯了。待回過神之後,友人P決定萬歲,筆者與太座不需付出分毫。後來翻查網上其他評論,可堪一試嘅菜色還真不少,值得找一個時間再嚟一次。


味道:4 (以5分最高)
環境:2
服務:3
衛生:3
價錢:4

用餐日期:2010年1月6日

地址:北角電氣道229號電氣道市政大廈2樓C1舖

2010年1月20日星期三

留不住溫度 (住吉日本料理店)

星期六,新一年嘅第二天,一個矇矓下雨夜。新居還是一片混亂,那裡有心情留在家中食飯呢?參考網上嘅資料,位於銅鑼灣威菲路道嘅Jacky's Kitchen受到不少好評。沒有事先籌劃,沒有位子是意料中事。就在隔壁,開了一間日本料理,是否與多年前結業的「利休」屬同一個舖位,筆者記不得。



微風冷雨夜,客人稀疏。安頓過後,店員隨即端來兩碟餐前小食,是一些蘋果等切粒,加一點芥辣、糖及醋等,吃落是冰涼醒胃的。





天氣無疑是凍了一點,但筆者並無排除冷盤。打頭陣嘅係蕎麥麵什菜沙律 ($50)。蔬果算是新鮮選料,不過可能放得耐咗一啲,流失了部份水份,食落沒有預期般爽脆。最奇怪的是,沙律上殘留了一些冰塊,一遇上室溫便逐漸溶掉,沖淡了食材本身嘅新鮮味,而且食落變得水汪汪般,大打折扣。要令食材保持低溫,並不是求其用冰冷凍便可過關的。沙律dressing調配本來可以,可惜也是被食材上嘅溶冰水沖淡了。蕎麥麵嘅口感同樣被溶冰水影響,沒有什麼彈性。是完全不合格嘅出品。



吃過失望嘅冷盤之後,便是軟殼蟹牛油果卷 ($120)。先不論味道,單憑外表,心裡暗自涼了半截。包在壽司卷上嘅牛油果肉一夾起便散開,望落是將切得不公整嘅牛油果肉東拼西湊的鋪在壽司卷上。飯嘅握得不那麼緊密,亦冇帶醋酸嘅米氣。筆者相信炸軟殼蟹嘅味道,各食店嘅分別都不會太大,壽司卷嘅決勝間取決於師傅做卷嘅功力。明顯地,這壽司卷也是被比下去的。



豬扒蛋飯 ($70)係太座嘅選擇。很多年前公仔箱做過一齣卡通片叫「伙頭智多星」,片中主角「味吉陽一」最拿手嘅菜色便是豬扒蛋飯。這裡嘅蛋飯,沒有打開碗蓋便如壓力煲湧出嘅蒸汽,更加冇令「味王」口生金光嘅味道。不知何故,飯只是微暖而已,溫度未如陳奕迅那首「沙龍」般留得住。縱是豬扒炸得不差,肉汁豐富,蛋亦香甜嫩滑;不熱嘅食物,味道及感覺已經不是那回事了。



最後是燒池魚 ($130),是廚師推介之一。魚身上灑滿了鹽,沒有半分油膩,不過一點也不入味。魚肉嫩滑,但味道是非常之清淡,只有近魚肚位才有魚鮮夾雜一點魚腥味。若非筆者好魚,相信大早已經放棄了。池魚還是比較適合做刺身;燒魚的話,還是魚脂豐富如鰻魚或鯖魚比較好。

可能是晚客人不多,或者是見太座粗身大細,服務是預期以外的殷勤。當筆者拍照時,店員也主動幫手將杯碟擺好,方便拍照。「服務」一欄,是值得加分的。洗手間十分整潔,沒有一堆堆用過嘅廁紙;洗手間地下也合理地保持乾爽,衛生也值得加分的。

埋單共銀四百零七蚊,平均每人二百多一點,收費合理。不過其食物既然留不住溫度,所以也留不住筆者。

味道:2 (以5分最高)
環境:3
服務:4
衛生:4
價錢:3

用餐日期:2010年1月2日

地址:天后威非路道11號地下A舖

2010年1月12日星期二

一年將至,聚首一堂 (西苑酒家)

星期日,是搬家嘅大日子,適逢外家提早做節,是過去幾年最攰嘅一天,有一種生命在燃燒著的感覺。

外家嘅家族聚會,一向是太座負責策劃的。是次聚會是太座最後一次負責策劃,之後負任便落在舅仔身上。作為做節嘅聚會點,地方一定要大路,以迎合各人不同口味,不是一件容易嘅事。思前想後,太座決定了銅鑼灣嘅「西苑」。

十八個人,分兩圍就座,於七時多陸續到達。是晚菜色十分豐富,慰勞大家過去一年所作出嘅努力。


首先出場是西菜中煮嘅黑松露醬炒野菌 ($68),野菌以秀珍菇為主。當端到面前時,是感受到一股淡淡清香飄來,入口菌味更見濃烈。雖以黑松露醬入饌,但其香氣冇想像般濃烈,而且野菌上沾滿了油光,感覺油膩。你說味道不好嗎?不是。你說這道菜造得好嗎?又算不上。起碼,印象中於意大利餐廳食過混有松露醬嘅菜色,既無沾滿油光嘅俗氣,香氣更是傾瀉而出。

 

接著是堂剪大茶豬 ($368),是「西苑」其中一道拿手小菜。大茶豬其實是乳豬,特別在不是片皮,而是由店員在顧客面前當場剪開奉上,是謂「堂剪」。這樣做嘅好處顯然易見,乳豬最嫩滑嘅部份,即是連著骨那一小塊肉,會同烤得金黃香脆嘅乳豬皮一起吃。酒店中式飲宴只吃脆皮不吃肉,簡直是暴殄天物。



講到燒味,又怎能不提這裡的蜜汁叉燒 ($118例)呢!筆者初遇這裡的叉燒,是多年前一次行山聚會後嘅飯局。可能是特別肚餓嘅原因,又或是其他緣故,一吃之下驚為天人。用嚟做叉燒的是最好嘅部位脢頭肉,所以吃起來特別軟腍有肉味。可惜,是晚嘅蜜汁下得非常重手,味道太甜了。既令叉燒太濕身,又掩蓋了不少原有嘅香味。是退步了嗎?還是轉了師傅?

 

出外工作辛勞,需要湯水滋潤一下,這盅杏汁花膠炖白肺湯 ($298),是十分滋陰養顏的。湯水傳出淡淡嘅杏汁香氣,入口如絲般滑溜。筆者本來十分疲乏嘅身軀,經此湯水灌溉之後,彷彿春回大地,原本乾涸嘅喉頭立刻復元了七、八分。豬肺亦煮得入味,入口十分嫩滑。正想尋找魚肚之時,發現已被掃光了,留下的只有筆者一點遺憾。



相比起滋潤嘅杏汁豬肺湯,西洋菜燉陳腎湯 ($298)是令一番風味,是下火良物。入口是鹹中帶一點清甜,是下了足夠嘅陳腎及蜜棗嘅緣故。火喉十足,但夾起一舊陳腎咀嚼,既不韌兼且留有餘韻,可見是鴨腎當真是經過時間洗禮的。



雖然是晚氣溫已回升,始終是冬節,來一碟生炒糯米飯 ($128)是算合時宜的。糯米炒得既乾身又均勻,是可以用筷子一口一口夾起來吃的。以此度之,是水準以上之作。而且鑊氣充足,各樣臘味嘅香味已迫入糯米中,單單是筆者已吃了三碗之多。



主菜出場了。一來是重頭戲生炆老虎斑翅 ($588一份)。斑翅者,就是魚鰭嘅骹位。由於係全條魚郁得最多嘅部份,所以肉質是特別脆滑鮮美的。這亦是比較難烹調得好嘅部位,弄不好便會腥得可以。這道菜一點也不腥之餘,火喉嘅控制也不差。魚肉味不是很濃烈,應該是養魚吧。蘊藏最多奧米加三嘅魚皮,也沒吃上多少。畢竟養魚嘅鮮味比起野生的不可比;換一個角度,不去捕捉野生大魚,也為這星球嘅健康盡了一點棉力。



另一道主菜也是海鮮類西苑一品煲 ($328),材料有蝦、花膠、海參、冬菇、雞腳等,扣得是很入味的。這類菜色,只要用料好,火喉足,味道是不會差到那裡去的。




大時大節,有魚必有雞,以瓦煲豉油浸雞 ($300)做代表。豉油是加了糖,所以鹹鹹甜甜的。雞肉入味程度有異,近雞胸嘅部分由於不是浸在豉油裡,炆得不太入味;放在煲底嘅雞腿則入味非常。雞肉有彈性,是新鮮雞嘅証明。不用新鮮雞嘅話,在這種地方、這般消費,是難以交待的。可惜的是此雞肥得有點過份,雞皮半厘米厚並不鮮見,是人工催谷嘅結果?




是晚唯「一點五」(為何不是一,稍後分曉) 嘅清淡菜色是鴛鴦腸炒芥蘭 ($128例)及竹笙炒莧菜 ($138)。「一點五」嘅原因,是前者有臘腸及膶腸,連芥蘭一齊食,毫不清淡也。獨立來說,芥蘭新鮮爽脆,入口清甜多汁,不錯。


飲飽食醉,是時候食甜品了。呢款杏汁包,有一個很美麗嘅名字,叫雪影杏汁包 ($148/十八個),是這裡嘅名物之一。熱辣辣的新鮮出爐,面頭嘅酥皮十分香脆,一咬之下,暖笠笠嘅杏漿緩緩流出,是清香的杏仁味,如同正在品嚐杏仁露一樣,相當出色。


最後是完整的、每圍一底嘅古法馬拉糕 ($100一底)。打開大蒸籠嘅一剎那,水氣一湧而出,眾人不約而同齊齊「嘩」一聲,引起了一陣小哄動。一嗦之下,是充滿了蔗糖嘅甜香,入口十分鬆軟,令人回憶起小時候與家人到茶樓食馬拉糕嘅境況。各人縱是吃得八、九分飽,也無法抗拒其魅力,伸手就拿起一件。

令人愜意嘅一個飯局,太座亦隨之功成身退,家族飯局召集人一職正式傳給舅仔。埋單是七千蚊左近,平均每人大約三百九十蚊。期待下次嘅團年飯局,不知會否令人留下美好回憶呢?


味道:4 (以5分最高)
環境:3
服務:3
衛生:3
價錢:3

用餐日期:2009年12月20日

地址:銅鑼灣恩平道28號利園2期1樓101-102號舖

2010年1月9日星期六

於小店歡送09 (菖蒲亭)

星期四,大除夕,辛勞了一年,嚟到這一天,是終結,也是開始。天氣有點凍,風亦頗大,太座想慰勞一下大家,想食好一點。大時大節,出外食飯,要麼就是明俾人斬到一頸血,要麼便是提前不知多少天預約。事前沒有安排,臨急臨忙醒起這店,便匆匆的打電話,幸好二人位不需怎麼特別安排。約定七時半,早了十分鐘到達。

店子是地鐵站出口後嘅街角,由日本藉師傅主理。地方不大,節日裡有更多客人,顯得更加狹小。店員見太座腹大便便,便安排了近走廊嘅座位,方便太座出入。安頓後,店員隨即簡介是日精選。筆者本來想吃一點刺身,可是店員說臨近除夕,日本魚市場提早收市,刺身質素不是最好的。也罷,還有其他美食。



先來一杯巨峰提子果酸梳打,入口冰涼,有濃烈巨峰提子嘅酸甜味。太座則是白桃果酸梳打,也相當美味。是除了凍啤酒以外,最佳伴炸物嘅飲品。


前菜是厚燒玉子,煮得稍稍老了一點,不過入口軟滑,蛋香充沛,鹹甜味適中,而且做得比較乾身,比起「一門」嘅濕漉漉,這裡嘅玉子無疑是勝一籌的。



沒有刺身,代之而來是燒物。太座不喜食鱔,但對鰻魚卻情有獨鍾。這一道燒鰻魚,份量雖然不多,但鰻魚肉甘香豐腴,配合一點甜的燒汁,是絕佳嘅配搭。



燒鰻魚之後,便是店員介紹的鹿兒島幸福麥豚串燒。此豚肉肥瘦均稱,脂肪與瘦肉層層相間,故入口充滿豬肉嘅甘香,毫無懸念。這裡嘅串燒充分發揮了此豬肉嘅特質,肉汁固然保留了下來,肉質是鮮美嫩滑的;一丁點嘅黑椒,更能引出豬肉鮮味。




筆者對天婦羅情有獨鍾,縱然口瘡未完全康復,也要照食如儀。這款海老天婦羅,用的是新鮮海蝦,加上蕃薯及南瓜。等了好一陣子,天婦羅才呈現眼前。看其外表,上麵漿嘅功夫真是麻麻地,時厚時薄,而且還偶爾掉下一大塊炸麵漿,似乎師傅不是這一方面嘅專家。幸好,海蝦鮮甜味十足,而且蝦頭附近膏甚多,食落寧舍香口,是整個蝦頭也可以食落肚。



要裹腹,麵食是少不得。太座至愛是稻庭湯烏冬,此烏冬質地幼滑如絲,很對辦。味道欠缺了一點麥氣,比起位於圓方嘅「稻庭」,是稍稍遜一籌。



最後是拉麵沙律,是這裡的名物。各食材雪得冰凍,但無半點倒汗水,一讚。拉麵十分彈牙,入口隱約有小麥香氣。混和了自製沙律醬,既有芝麻香,也有酸甜味,味道豐富。蔬菜也很新鮮爽口,深得筆者嘅心,估唔到最後一道沙律,會令人留下如此深刻印象,是必吃之物。

十多二十名人客,由兩名店員負責招呼,繁忙時段有點顧此失彼,但均能仔細為客人講解。服務一欄,是值得較高嘅分數。

食店沒有趁火打劫,仍舊收平日價錢,有良心。駛費六百多元,平均每人大約三百二十蚊。在居酒屋食飯,沒有喝酒,也要這般價錢。加上節日考慮,也可說是物超所值吧。見坐在吧枱邊嘅日藉人士,皆要了一客關東煮。其後到來嘅熟客,也有相同嘅要求,是首個沽清嘅菜色,想必是得意之作。下次再來,一定要試。

味道:4 (以5分最高)
環境:2
服務:4
衛生:4
價錢:4 (以節日計)

用餐日期:2009年12月31日

地址:鰂魚涌涌芬尼街26-28號海暉大廈G&H舖
Related Posts with Thumbnails