2010年1月2日星期六

甜品之外, 其他食物同樣出色 (小店)

星期六,風和日麗,到九龍城探望榮升父母嘅K及G兩公婆後,筆者與太座當然唔會錯過難得嘅機會於九龍城「尋幽探秘」啦。多年前太座與友人曾到「小店」作客,極力推介,如今再度光臨,身邊換成她的丈夫。


「小店」嘅格局有如一般港式西餐廳,燈光陰沉,佈置亦談不上有西式嘅典雅。惠顧嘅食客不少,所製造嘅多餘聲音也不少。中式餐館比較嘈吵,筆者尚可接受,因為熱鬧(喧鬧)係中式飲食文化一部份。相反,到西式餐廳應該要尊重西式飲食文化,即減少聲量,用心欣賞食嘅過程。

兩口子,所能食嘅嘢唔多,只簡簡單單的叫了三道菜。



凱撒沙津($46):此沙津好多地方都可以食得到,但係要整得稱心滿意唔係間間做得到。呢度嘅沙津是水準之作,首先橄欖油及黑醋份量適中,唔會為求沙津有味而拼命落醋,令沙津變得太酸。令外,芝士只是輕微的下了少許,使入口冇咁heavy。以烘麵包粒及炸煙肉點綴,使單調嘅蔬菜添上色彩。最重要係烘麵包粒唔會因太硬而界口,大小適中,絕對勝任主菜之前醒胃之效。



意大利風乾火腿芝士蕃茄焗釀大鮮菌($78):大鮮菌,即portabello,以蕃茄釀之,無可避免會因蕃茄受熱出水而濕漉漉。筆者比較怕呢種食法,太座則十分喜歡。話雖如此,菇嘅香味、蕃茄嘅鮮甜味及芝士嘅香濃味配合得算唔錯,其中以蕃茄鮮甜味較為突出,風乾火腿質素亦合格。要挑剔嘅話,只可說portabello唔夠香。



香草焗乳鴒配鮮什菌意大利飯($118):先講飯,煮法源自意大利北部,飯粒顆顆結實有咬口,而且配以芝士,整個texture十分creamy。加上什菇粒嘅幫助之下,除咗有乳酪香味之外,還有菇嘅香味。水準可說是筆者食過最好嘅其中一間。至於乳鴿,外表燒得金黃,入口肉質鮮嫩滑溜,而且肉汁十分豐富,一點都沒有在烹調中浪費掉。睇落份量小小,食完先知原來都幾飽肚。此道菜令筆者留下深刻印象。

飯後看網上食評,才得知網友一致讚賞這裡嘅甜品。筆者相信除咗甜品之外,仲有不少菜式都係「小店」嘅強項。

服務員態度親切殷勤,但又唔會俾太大壓迫感,而且結賬不另收加一服務費,係一個得分點。

全單共銀二百四十二蚊,平均每人一百二十一蚊,以這個大眾化嘅價錢,可以享受這麼出色嘅菜式,實在物超所值。

味道:4 (以5分最高)
環境:2
服務:4
衛生:3
價錢:4

用餐日期:2009年5月2日

地址:九龍城侯王道2B地下

沒有留言:

發佈留言

Related Posts with Thumbnails