散叫試得多, 套餐又如何? (泰豊廔酒家)

星期一，同學聚舊。超過十年之後再聚頭，或事業有成，或已組織家庭，樣貌雖然冇大變，但大家已不是當年讀書時嘅黃毛小子。比起十數年嘅情誼，今次聚會嘅地點「泰豐樓」嘅歷史，可謂小巫見大巫。舉頭一望天花上嘅掛燈，刻著「一九六一年」嘅字樣，差不多五十年嘅歷史，當中不知多少次成為老友聚舊之處。


「泰豐樓」係老字號京菜館，與附近嘅「鹿鳴春」可謂齊名。著名菜色有紫銅爐涮羊肉、魚、羊餃子等傳統北方菜式。每次嚟到都會散叫，反而呢度嘅套餐，今趟還是第一次。

三色拼盤 – 包括醉雞、海蜇及五香牛展。醉雞完全冇酒香味，似冰鎮雞多啲，不過口感都算嫩滑。至於雞味，在香港已經好難食得到有雞味嘅雞了；海蜇爽脆彈牙，口感可以；五香牛展也算入味，咬落隱發甘香，肉質鬆軟，不費牙骹多少勁；

醋溜桂魚 – 酸甜嘅比例剛好，用了桂魚，魚肉質素有了保証，火喉恰當，魚肉亦冇蒸得過老嘅情況出現。如果桂魚本身能夠炸得更鬆化的話，分數會更加高；

鐵板宮保明蝦 – 話明係宮保，味道應以酸甜為主而又帶一點辣，可惜酸甜味是有的(其中以甜味過多了)，辣味似乎欠奉，而且蝦肉唔彈牙有少少霉霉地，似乎用料不太新鮮，食後皮膚老毛病發作，更加証明蝦肉唔新鮮；

芙蓉三鮮 – 與賽螃蟹類似嘅菜式，都係以蛋白為主，加上草菇、蝦球等「三鮮」。筆者對餸菜加上玻璃茨抱中性態度。不過以上嘅配搭，效果有點不倫不類，好似近日電視台某節目女明星自創菜式，唔知點收科就埋一個玻璃茨一樣；

北京填鴨 – 是全晚比較滿意嘅一道菜。皮烤得金黃香脆，鴨肉亦肥美嫩滑，除了近尾部位置脂肪層比較厚之外，大部分片皮鴨嘅肥瘦分佈都算適中。薄餅皮烘得比較乾身，係正統嘅做法，不是一般市面上用水蒸，令薄餅軟綿綿。而且薄餅面上還有芝麻，更加進食時嘅香口感；

紅燒鮑片 – 以罐頭鮑配生菜炆。罐頭鮑質素當然唔會寄予厚望，食落感覺更不如，因為鮑片鞋口；生菜加厚身豉油茨，也沒有什麼可討論；

鐵板炒麵 – 聲勢可真的唔小嘢，鐵板燒得火紅，一落麵，「喳喳」聲，先聲奪人。可能為避免麵條「痴」底，用了比較多油，令整度菜較為油膩，一眾友人食過一巡之後，迅速放軟手腳；

叉子燒餅拼榨菜肉末 – 叉子燒餅製作得幾出色，外表香脆，充滿芝麻香味，內裡如酥皮般重門叠戶，屬上乘之作；榨菜肉末切得十分細小，但大小如一，廚房嘅刀功可見一斑。放入燒餅內，燒餅嘅香與榨菜肉末嘅鹹、鮮味共冶一爐，為之前比較失望嘅菜式挽回少許面子；

鴨架冬瓜湯 – 服務員預先分好，一人一碗，每碗都有一舊煮得老到幾乎如「泰豐樓」一樣嘅豆腐。這麼差勁嘅豆腐，無謂舀出嚟影響食慾！筆者那一碗還附送工蟻一隻，衛生一欄要扣分；

高力豆沙 – 奉上嘅時候溫度雖然略凍，但蛋香依然，內裡嘅不太甜，十分適合盛宴過後食用，減輕味覺及腸胃負擔。

全單共銀一千二百蚊有找，一行八人，平均每人大約一百五十蚊。論套餐質素，坦白就，實在不敢恭維。與其信菜館嘅組合介紹，還是靠自己嘅經驗散叫為上。

味道：3 (以5分最高)
環境：3
服務：3
衛生：2
價錢：4

用餐日期：2009年5月18日

地址：尖沙咀漆咸道29-31號溫莎大廈