燒肉別有一番風味 (芽莊越式料理)

第一次去芽莊已是數年前嘅事，那時筆者同當時尚未成為筆者太座嘅阿K到中環店粗略地食咗啲河粉及小吃，未能試出此店嘅真實力。今次與另外兩位朋友，連同太座共四人到灣仔店，可以order多幾款菜式，真真正正可以試一試此店嘅實力。四人共點了八道菜。

食越式美食，清远蒸粉卷可謂指定動作，另一樣就係炒得金黃嘅蒜片。呢度嘅蒸粉卷皮唔係太薄，筆者認為甚是對辦，因粉皮就係粉卷嘅靈魂，與蒜片一齊食，又香又有咬口，再點上醋，令人食慾大振。粉卷餡料十分豐富，將整個粉卷撐得脹卜卜，筆者雖然口比平常人大，亦不能一次過鯨吞一整件粉卷。

燒肉卷用嘅粉皮比較薄，雖則叫做肉丸卷，但內裡包著嘅卻係一塊塊豬肉，此命名令筆者有點兒混淆。不過，豬肉肉汁豐富，加上經過香草醃製，與豬肉味相得益彰。

兩道菜都有以蝦入饌，其中蜆港大蝦煎薯餅上嘅蝦炸得通透，連蝦殼都可食落肚；至於邊和燒大蝦柚子沙律嘅大蝦雖然size不是十分大，但蝦肉鮮甜有彈力，一點都唔會「酶」。幾種煎炸食物，以香茅燒魚最令人失望，主要原因係魚唔夠新鮮，魚肉已經有點兒變腥了。

最令小夥兒有驚喜嘅就係呢度嘅燒乳豬，一般中式燒豬講求「芝麻」燒豬皮，用針棒在烘乾了嘅豬殼上拮針，令燒豬皮變得金黃鬆化；葡式燒豬嘅燒豬皮就薄薄一片脆脆的；呢度嘅燒豬有點兒似葡式，但燒豬皮唔可以用脆來形容，不過燒得十分香口，而且完全能夠發揮鎖死肉汁嘅功效，當咬開燒豬皮之後，可以發現內裡肉汁豐盈，就算係比較瘦嘅位置一樣冇走樣，近豬排嘅則比較肥，不大適宜愛美嘅女士。一碟只有五舊，有點少。

肥膩嘢太多，以越式煮雜菜調和，有木耳、蘿蔔、冬菇、枝竹等，似一味中國菜多啲。最後以gelato及咖啡作結。

此飯局共銀七百八十多，平均每人二百蚊，其中燒豬已經係一百多元，雖說有點貴，但值得一試。

味道：4 (以5分最高)
環境：4
服務：3
衛生：4
價錢：3

用餐日期：2009年2月5日

地址：灣仔皇后大道東213號胡忠大廈2樓2號鋪