2009年12月14日星期一

時限茗茶 (利苑酒家)

星期日,天晴。晚上需出席宴會,於是與筆者父母中午嘆茶。

眾多「利苑」分店皆摘星,斯人猶憔悴,國金被摘星,是日幫襯嘅沙田分店更星都唔星。早幾天電話預留座位,分頭(十一點半至十二點九)、二輪(十二點九打後)。心想,頭輪雖然較早,但係唔駛等交枱,就算食過了時,也不會迫人客交枱啩,於是便留了頭輪四位。

早了十分鐘到達,還未開門營業,但店外已經有數十人等候,好不熱鬧。十一點半準時開門營業,各店員整齊排列左右兩行,「歡迎光臨」之聲此起彼落,走高格調嘅食肆,這種「聲勢」必不可少。午市點心選擇繁多,四個人只是點了些經典的一盅兩件。



飽類首先試了蠔汁叉燒包($16),小小打破傳統,以蠔油汁非蜜汁製叉燒。熱辣辣新鮮出籠,但味道頗鹹,是蠔油汁太重手了。叉燒配蠔汁,有創意,不過筆者還是喜歡蜜汁加叉燒這配搭;



雪頂餐包($22)外貌似墨西哥包,外表嘅酥皮焗得甘香鬆脆,餡料亦暖和香甜,是不錯嘅甜包點;



香糯鹹水角($19)入口煙韌唔肥膩,包裹著幾款餡料,食落亦十分搶味,最重要嘅係新鮮製成,味道是不會差到哪裡去的;





甜點中馬拉千層糕($19)味道比較普通,而且蒸得亦不是鬆軟非常,水準中等;至於鬆脆麻花($18)令人驚喜,麻花脆卜卜,蘸上溶化了的麥芽糖,既香且甜美,是不俗的甜點。





家鄉蒸粉果($19)吃起來十分論盡,粉果皮黏在一起,想夾起一件,連皮帶餡料跌到一籠都係,印象分打了折扣;燒賣蝦餃(同樣是$22),是嘆茶必吃之點心。燒賣以蝦肉及豬肉製成餡料,比例大約是四六之比,無論是蝦肉嘅鮮味,抑或是豬肉味均比較淡,不是上佳嘅水準;同樣地,蝦餃蝦肉味雖爽脆但也是淡了一點,幸好有肥肉幫幫手惹一點味。





蜜汁叉燒腸($26)腸粉皮比較厚身,不是正宗的晶瑩剔透,咬落亦感受不到米氣,普通貨色而已,叉燒用了蜜汁點綴而非蠔汁,找回了熟悉嘅叉燒味道;炸兩($22)嘅質素被平凡嘅腸粉影響,油條亦非新鮮炸的。畢竟,要新鮮炸兩,由開米漿,去蒸,接著是炸油條,工序時間所費也不少,不是在酒樓匆忙中便能吃到。





沙薑鳳爪($28)醃得幾入味,而且是撈了一點沙薑油,不需點任何醬料已經可口非常;芋絲脆春卷($19)亦是即叫即炸,春卷皮炸得香脆,沒有翻熱後那種油益味,餡料份量適中,不是一味追求大件夾抵食般不斷將餡料塞進春卷裡。



珍珠雞($22)雖用荷葉包裹著,但感受不到荷葉香氣。煎蘿蔔糕($19)也是上茶樓必吃點心之一,真正好味嘅蘿蔔糕,蘿蔔嘅比例要絕對多數,據太座祖母生前所講,最少要八份蘿蔔一份粉,誇張嗎?一點也不,可想而知要花幾多人力去刨蘿蔔。這個程度嘅人力投入,絕對不合經營成本,十九蚊嘅蘿蔔糕,與一般市面食到嘅蘿蔔糕無異。

用膳後離開時,側聞二輪籌已派完,這種以籌限制顧客人數,雖有倒自己米之嫌,但也是控制食品質素的一個方法。

茶芥十蚊一位,共銀四百蚊有找,平均每人一百蚊。點心出品,勝在大都是新鮮製造,即叫即蒸。點心嘅水準,屬中等級數,以點心論,無星不足為奇。


味道:3(以5分最高)
環境:4
服務:4
衛生:4
價錢:3

用餐日期:2009年12月6日

地址:沙田沙田正街18號新城市廣場一期6樓628

沒有留言:

發佈留言

Related Posts with Thumbnails