是晚菜式十分豐富。各餐桌中都放置一盤玫瑰花裝飾，所以各樣餸都係由侍應先分發然後先奉上。
鴻運乳豬全體 - 乳豬皮上嘅小孔如芝麻般佈滿表面，如片皮鴨般將多餘嘅脂肪刮乾淨，除了近腿部比較難控制火喉嘅地方乳豬皮比較硬身之外，入口卜卜脆，唔錯喎！乳豬肉汁也能夠保持，入口有一陣豬肉香味，唔會太濃烈，亦唔會「乾爭爭」；
錦繡炸蟹拑嘅表面炸得金黃色，不過口感唔夠鬆化，有少少硬身。中間嘅蟹拑肉雖少，但係依稀仲有海水鹹味。單就這款菜論英雄，筆者覺得還是北角嘅鳳城最好食；
百年好合炒蝦球用料新鮮，肉質亦爽脆。不過筆者與太座印象最深刻嘅，竟然係一碟蝦醬。此蝦醬本身不太鹹，但蝦醬味出奇地香。用油泡過油嘅荷蘭豆已經很香，再蘸上蝦醬，味道更上一層樓，有畫龍點睛之效。
燕帶扒時蔬嘅材料有芥蘭、帶子及燕窩絲，用料幾名貴。帶子是爽脆的，可惜用燕窩入饌，筆者覺得有點兒浪費，因為燕窩基本上冇味，再埋咗個茨汁，好難先睇到啲燕窩絲。燕窩還是用嚟做蛋撻或冰糖燕窩；
去得飲，魚翅、鮑魚、石斑及雞係常見嘅菜式。全晚最能令筆者喝采嘅就係呢度嘅紅梅蟹肉海虎翅。首先呢個翅煮得十分香，點解呢？照計好食嘅翅係靠個茨，唔會咁香架喎。侍應奉上魚翅之後，真相大白。原來魚翅入面加了蟹黃。另外蟹肉亦很鮮甜，翅身亦很粗很厚，絕唔係「揸流灘」。恕筆者孤陋寡聞，實在未食過如此出色嘅翅；
清蒸東星斑望落差唔多有兩斤，筆者認為呢個size係十分難蒸的，唔係魚中間仲有血水，就係外面嘅肉蒸得鞋恰恰。此蒸魚火喉控制上乘，任何部位嘅魚肉都保持嫩滑。不過此魚魚味欠奉，應該係養魚。這又怪得了誰，在香港可以食得到新鮮嘅海魚幾希！
同樣地，當紅炸子雞嘅烹調功夫冇什麼可以挑剔嘅地方，但係農場大量飼養嘅食用雞基因已變了，論雞味一定不及走地雞，但已在香港絕跡。
最令筆者失望嘅就係生炒糯米飯，因為混合了不少普通米，並不是全用糯米去炒的。
可幸甜品爭回唔少分數，好似上湯蒸粉果炸得甘脆，粉果皮甜甜的，浸了上湯再吃，又有鹹味亦有甜味，層次豐富。
合桃露湯圓是生磨的，合桃香味除熱騰騰嘅水氣緩緩飄入鼻孔裡。芝麻湯圓表面煙韌，內裡嘅芝麻亦炒得香，比「福元湯圓」則略遜一籌。
服務方面，除了叫咗三至四次先拿了一杯暖水之外基本上是周到的。
綜合以上所說，筆者覺得食物有讚亦有彈，整體可以俾笑臉，但冠以米芝蓮三星餐廳嘅光環，看來仲需要更多証明。
味道：4 (以5分最高)
環境：4
服務：4
衛生：4
價錢：3
用餐日期：2009年2月13日
地址：中環金融街8號四季酒店4樓
文章
沒有留言:
發佈留言