當萬聖節遇上啤酒節...換成一件醉酒鬼 (King Ludwig Beerhall)

星期五，萬聖節前夕，亦踏入德國啤酒節嘅高潮。灣仔一帶嘅酒吧都充斥著嘆啤酒嘅上班一族。為朋友慶祝生日，在這特別嘅日子，當然要隨俗啤一啤。選了這地方，亦是壽星公嘅意思。

店舖內滿是鬼節裝飾物，有氣氛但毫不恐怖，「巫師」蹤影處處，加上live band，彈的雖是老調，卻令氣氛更熱鬧。筆者與太座後至，壽星公已與其他友人酒過幾巡，為這篇食評拍照嘅友人更有一點不勝酒力。

餐前麵包($30)，不太鬆軟，幸好芝士嘅酥香及鵝肝醬嘅鮮味補救，當然所謂鵝肝醬，鵝肝嘅成數不會很高的了。

食德國菜，冇，理由唔食肉腸，一客sausage sampler($198)，肉腸種類有五、六款之多，每款風味不同，有豬有牛，除了最易認嘅慕尼黑白肉腸之外，其他的都講不出是什麼東西。配上薯仔粒，十分可口；

另外一款餐前小食是薯餅併牛肉丸($95)，薯餅是切成絲才炸的，咬落還保持薯仔肉嘅爽脆，外表炸成金黃色，十分香口，令人有添食嘅衝動。至於肉丸，以牛肉打造而成，牛肉味淡淡的，沒有牛油嘅酥香，味道平平而已；

再加一碟什菇沙律($70)，適度嘅醋及蔬菜，為之後嘅肉類主食先清一清腸胃。

主菜有wiener schnitzel ($185)，是吉列牛仔肉，屬奧地利一帶嘅菜色。吉列豬扒食得多，以吉列配牛肉，倒還是第一次。牛仔肉是薄切的，冇乜牛肉味，但勝在肉質嫩滑。可惜牛仔肉不上粉，用刀切之下，吉列皮分崩瓦解，食得頗論盡，不甚討好；

是晚主角當然是德國鹹豬手($145)，侍應先替客人分成幾份才上枱。肉質鮮嫩不在話下，豬手皮炸得香脆可口，加上豐腴嘅豬肉甘香，是難以抗拒嘅誘惑。最後筆者索性用手品味豬腳骨，將最好食的、連在骨及關節上嘅筋肉一併吃下，什麼儀態擱於腦後。食本應如此，不拘小節，大快朵頤。

附送嘅忌廉薯粒，用sour cream混上半打爛嘅薯仔肉，有效刺激食慾，也不錯。

飯後甜品有甜品併盤($120)、黑森林蛋糕($50)及心太軟($60)。甜品併盤有六款甜品，造得很精緻，味道不太濃烈，多帶生果嘅酸甜味，幫助消化；黑森林蛋糕是正宗做法，朱古力蛋糕夾層中是櫻桃而非啫哩，朱古力味香濃，忌廉又不太多，合乎心意；心太軟蛋糕有果仁餅底，配合暖暖的朱古力軟心，都幾出色。

一行八人，共費一千八百六十三蚊(人均消費二百三十三蚊)。撇開酒精類飲品，實質是一千三百七十三蚊(人均消費一百七十二蚊)。一班朋友，嘻嘻哈哈，為壽星公歡度了一個愉快嘅晚上。

味道：4 (以5分最高)
環境：4
服務：3
衛生：4
價錢：3

用餐日期：2009年10月30日


地址：灣仔皇后大道東183號合和中心地下1-2號舖