2009年12月12日星期六

水準穩定 (越華會)

星期日,天氣時晴時雨,筆者外家趕在清明之前回祖家拜祭年前已仙遊嘅太夫人。响呢個難得嘅家族聚會,作為長子嘅岳父當然號召全家人於拜祭結束後一起食飯。一行十數人,有老有嫩,為免大費周章去配合各人口味,於是決定到水準十年如一日嘅越華會晚膳。


大家鍾意食越華會,一來價錢實惠,而且水準十分穩定,雖無驚喜,但一定唔會撞板。太座家族點菜,每每由太座操刀,今次亦唔例外,一共叫了十一款菜式,包括燒乳鴒、脆皮豆腐、豉汁炒蟶子、椒絲腐乳炒通菜、油鹽水煮蜆、上湯浸白菜、羌蔥雞、豉汁蒸魚雲、羌蔥砵酒焗蠔、豉油王炒麵及岳父自創菜式 – 芝士焗伊麵。



燒乳鴒 – size雖唔大,但燒得頗入味。外表燒得香脆,肉質亦能保持鬆軟可口,肉汁亦相當豐富;脆皮豆腐 – 脆皮炸得金黃,厚度均一,且唔會太厚,味道甘香之中帶適中嘅鹹味,內裡嘅豆腐滑得吹彈欲破,蘸上少許酸辣汁,頗為醒胃;




豉汁炒蟶子 – 茨汁底唔太辣,少許甜甜酸酸的,令人食慾大振,可惜蟶子炒得略嫌太老,肉質少少韌及鞋口;椒絲腐乳炒通菜 /上湯浸白菜 – 大路家常小炒,火路穩當,味道對辦;



油鹽水煮蜆 – 蜆肉新鮮,味道鮮甜肥美,湯中加了適量嘅胡椒,喝一口暖胃亦佳;



羌蔥雞 – 羌蔥舖滿整隻白切雞,雞並不特別肥大,皮薄不油膩。雞腿肉固然嫩滑,雞胸肉很唔覺粗鞋,佐以少少羌蔥,令筆者食完一舊再一舊;豉汁蒸魚雲 – 魚雲爽滑是必然的,配上豉汁送飯一流,不過豉汁並未能夠完全掩蓋魚雲不十分新鮮嘅事實,隱隱然有一點淡魚腥味;



羌蔥砵酒焗蠔 – 選料新鮮,蠔肉鮮嫩,既能食到蠔嘅鮮味亦經過烹調處理,比較衛生;




豉油王炒麵 – 係每一次到越華會必食之選,麵炒得乾身均勻,每條麵線色澤如一,配合芝麻、韮菜、洋蔥等香口配料,沒有甚麼可以投訴的了;



芝士焗伊麵 – 其實係芝士龍蝦伊麵走龍蝦,係岳父想像出嚟考一考這裡嘅廚師。出嚟嘅效果亦不俗,雖說是芝士焗,其實用上不少奶油,故整個伊麵充滿奶油香味。價錢經調整變成四十八蚊一碟。

總共十一樣餸菜,可說是十分豐盛嘅一餐,不過代價十分超值,總共都係一千蚊有找,平均每人只係八十七蚊,價錢一欄冇理由唔俾滿分。

味道:4 (以5分最高)
環境:3
服務:3
衛生:4
價錢:5

用餐日期:2009年3月22日

地址:筲箕灣望隆街5-11號合隆工廠大廈地下

沒有留言:

發佈留言

Related Posts with Thumbnails