2009年12月12日星期六

赤口濠江美食團 (安東尼奧餐廳)

初三,又稱為「赤口」,相傳呢一日特別容易有口角,俾人「開年」。我和太座同一班朋友為咗避免比人「開年」,較早前決定初三一齊過大海避「赤口」。結果証明傳統智慧不可睇少,同行中人終歸被開咗年。


呢次活動要特別鳴謝A先生全力贊助是次澳門之旅嘅壓軸晚宴,亦係呢篇食評嘅主題,位於氹仔嘅安東尼奧餐廳。另外,多得在澳門工作嘅「有種」先生嘅推介,我地先至冇錯失此餐廳嘅必食之選。

發現呢間餐廳,可以話係一個巧合。話說我地响官也街附近行吓逛吓嘅時候,本來想去全氹仔唯一嘅酒吧稍為休息一會。點知行行吓路經此店,見店外寫住「recommended by Michellin」,且裝修雅致,如一般歐式民居風格,本著有食為大嘅宗旨,大會贊助人陳生往裡面一探,迎面而來竟是此店東主,亦是主廚安東尼奧先生 (Mr. Antonio)。Antonio十分健談,平易近人,對我地嘅提問與要求都盡量迎合。

此店地下係dining area,二樓就係廚房同埋洗手間,還有未完全裝修好嘅天台。他解釋今日有private party,所以地下已經full house。不過他補充話天台只是未裝好玻璃窗,暫時只有帆布遮蓋,可能會有點風及冷,但還可以用嚟招呼我地,我地當然唔會介意啦,仲順道參觀二樓嘅廚房,廚師們正忙碌地準備當晚嘅甜品,Antonio仲介紹佢所用嘅食材比我地認識,真令我地大開眼界。

天台地方唔大,只可容納六至八個人,但係因為咁一班好朋友先可以好close咁一齊分享美食,此時此刻,夫復何求!審視菜譜一輪,再經「有種」先生介紹,選了以下八道菜及四款甜品:


葡式陶盤燒葡國腊腸:侍應小姐用手提氣爐將用陶製嘅盤燒熱,將葡國腊腸嘅表皮煎得卜卜脆。葡式腊腸比中式嘅淋,質地有少少似潤腸;味道係鹹鹹地,與中式嘅少許甜味各有千秋。


白酒蒜蓉炒蜆:蜆肉雖小,但肉味是鮮甜的,最重要嘅係那些汁,十分惹味,能輕易食出有蒜蓉及不同香草嘅香味,佐以附上嘅新鮮麵包,比單純以橄欖油及醋更佳。


葡式焗鴨飯:個人認為到葡式餐廳必食嘅一道菜,首先係鴨肉係拆成絲後與飯一起焗,神奇嘅地方就係鴨肉雖然經過高溫烘焗,但係入口好鬆軟,質感如糜肉一般,完全唔需要大力咀嚼。


椰汁非洲雞配焗薯及雜菜沙律:這道菜係「有種」先生嘅誠意推介,炸雞肉配上椰絲,雞肉嘅香脆中帶有絲絲椰香,令人食慾大振。


炭燒鱸魚(配烚薯仔及時蔬):鱸魚嘅缺點就係多骨,個人來說對多骨嘅魚印象麻麻,不過此魚燒得恰到好處,魚肉爽脆,雖然說吐骨很麻煩,但此道菜還可算得上喜出望外。


燒羊排配薯條及菠菜蓉:相反,我對燒羊排有點期望,結果顯示與期許有少許出入。事先聲明,我對羊肉要求頗高,可能係食憤友人訂購嘅羊架實在質素太好。這裡嘅羊肉雖能夠保持其獨特嘅肉味,可是肉質偏韌,與友人訂購的差一班。


燒pianola鮮豬肋骨配薯菜:豬肉基本上係穩健之選,只要唔係好似港式餐廳般用梳打粉醃淋,難食極有個譜。這裡嘅豬肋骨亦係一道喜出望外嘅菜色,肉質鬆軟之餘不失應有嘅質感,而且肉汁豐盈,係上乘之作。


海鮮雜燴配烚薯仔:葡國位處大西洋東岸,海產豐富,所以烹調海鮮應不賴。此店嘅海解雜燴十分出色,湯料有蝦(連殼及唔連殼)、帶子、蟹、青口、魚肉等,用一個大黃銅鍋裝起,利用銅導熱快嘅特點,用最短嘅時間煮熟湯料,減少肉質因長期受熱而受到破壞。湯底鮮甜(這是因為蝦連殼一齊煮),其中尤以魚肉出奇地爽脆,魚骨附近更有煙韌嘅感覺,有如鯇魚腩般。


雲呢拿雪糕配火焰櫻桃汁火焰蘭姆酒香蕉同樣由Antonio親自操刀,一面欣賞其烹調技術,一面等待,集視覺、嗅覺、味覺於一爐;牛奶忌廉:即是焦糖燉蛋,難得之處係燉蛋保留蛋香味,而且texture係纖幼,十分出色;朱古力摩士:不是很甜,很mild,是十分恰當嘅濃度,過甜反而會令人覺得有點滯,尤其是大快朶頤之後。

除咗上列美食之外,我地仲點了一支紅酒,價錢大約係二百多元。整體價錢共二千一百多,好食嘅嘢我永遠覺得物有所值。順帶提一點,這裡有一缺點,就係廚房門開關經常bang bang 聲,都幾擾人,要扣分。

味道:4 (以5分最高)
環境:3
服務:5
衛生:4
價錢:5

用餐日期:2009年1月28日

地址:氹仔客商街3號地下

沒有留言:

發佈留言

Related Posts with Thumbnails