2009年12月11日星期五

鐵板燒大滿貫尾站 (花盃日本料理)

星期六,陽光充沛。太座摯友來港,想起年前於「和三昧」食過嘅鐵板燒,記憶猶新,希望再次回味一下。太座提議與其重回舊地,不如試一試同樣級數嘅「花盃」,有比較方知好嘅鐵板燒應該是怎麼樣。


幾乎相同嘅人馬,五個大人跟一個細路,由太座負責訂位。店員安排了其中一個有偏廳仔嘅嘅大房,座位十分舒適,食具亦放得整潔,工工整整,是日本餐廳應有嘅井井有條。午市嘅鐵板燒套餐有「松」、「竹」、「梅」外,也有二人前套餐(鮑魚或龍蝦)。太座問了店員嘅意見,認為叫兩份二人前加兩隻日本大海蝦最抵食,意見都幾中肯。於是按照店員嘅建議,點了兩份鮑魚鐵板燒二人前,其中一份要了和牛厚切($1,200),另一份則是黑豚肉($880),還有兩隻日本大海蝦(每隻$240)。





沒多久,衣著儀容整潔的鐵板燒師傅便進場,準備「開show」了。席中嘅小朋友,肚子餓了,靦腆的向媽媽撤嬌,師傅見狀便輕聲問小朋友喜不喜歡食多士,小朋友點了點頭。師傅便三兩下手便拿了幾片方包,先弄幾塊油沙多士。見師傅純熟地將麵包翻了又翻,加了點牛油,又加了點白糖,一份熱辣辣嘅多士便呈上來。未入口已聞到香噴噴嘅牛油味,入口香脆微甜,令人滿意。而且此多士是無償的,價值雖非連城,但誠意可加。



之後,食材便一一整齊地擺在眼前。吃鐵板燒,是先吃海鮮,接著是肉類,最後是飯及菜。先來鮑魚,先加點熱,令肉稍為與殼離身。師傅先剝殼,挑去內臟,過程一氣呵成,之後店員再取回廚房清洗後再上枱。第一道正式嘅餸係銀鱈魚,加點海鹽,燒至表面微黃。入口肉質爽脆,魚油豐富,啖啖甘香可口,不用加任何調味料已經是非常好吃了。




海蝦size足有近十吋長,件頭十足。師傅由去蝦殼、開邊、烹調到切粒上枱,從容不迫,看似簡單,但「台上一分鐘,台下十年功」,是功多藝熟嘅結果。最不得了當然是燒蝦頭,用白酒、牛油去煮,結合蝦頭內多到差點漏出來的蝦羔,最好嘅形容詞也不能足本形容其美味,只能說一聲oeshi。

沒有要鵝肝,換來白酒煮蜆,點火是指定動作,看得小朋友津津樂道。爽脆嘅蜆肉,加上清甜嘅湯底,也是一絕;鮑魚切成一片片,整齊地放在鐵板上燒,加點鹽及黑椒,很美味。




所選用嘅和牛嘅脂肪分佈不是太吸引,是比較遜色嘅食材。和牛肉嫩但肉味不濃,宜厚切或切成粒去處理;相反,美國牛相對肉味較濃,但冇咁嫩滑,宜薄切處理。叫了五成熟,上枱時還有血水滲出,火喉掌握技術良好,入口鬆化,可惜食到一條根,要費點勁咀嚼,是整餐美中不足之處。




跟著是炒飯,先用牛羔燒香鐵板,再放上飯,打幾隻蛋,之後跟方才炒好嘅火腿、洋蔥、香蒜粒等撈埋一起炒,成套動作毫不拖泥帶水。見飯粒於鐵板上一蹦一跳的,充滿動感。飯粒炒得粒粒分明,乾身結實有咬口,是上佳之作。最後嘅炒芽菜,雖是下欄食物,但師傅依然一絲不拘,將芽菜排得整齊才上碟,賣相已經一流。臨完結前還特地為小朋友再弄一片油沙多,逗得小朋友滿心歡喜。



甜品以一片綠茶芝士蛋糕作結,芝士味不濃,配合綠茶嘅香味,為整餐午飯劃上完美句號。正宗鐵板燒,飯後茶應往偏廳享用,可能是為了避開油煙味,「和三昧」有此安排,但「花盃」冇類似安排。不過其咖啡,香濃有加,本已吃得有點昏神嘅筆者,精神為之一振。

吃鐵板燒,師傅與客人嘅互動是很重要的,此師傅掌握與客人保持適當嘅交流,令人食得更開心。而且店員適時嘅照料,服務一欄沒有理由冇滿分的。

共銀二千八百多,平均每人(以五人計)差不多五百八十蚊,不便宜,但食物水準高,加上冇得彈嘅服務,是物有所值的。

味道:4 (以5分最高)
環境:5
服務:5
衛生:5
價錢:4

用餐日期:2009年10月31日


地址:銅鑼灣新寧道8號民安廣場2期2樓

沒有留言:

發佈留言

Related Posts with Thumbnails