西環爐瑞燒 (本陣)

星期六，天氣還是十分潮濕。筆者與太座為響應地球環保日，於晚上八時半至九時半關燈，所以結伴出外用膳。太座話好耐冇食過日本菜了，還利用網上搜尋引擎搵到一間位於西環七號差館斜對面嘅「本陣」。

此食店以港式經營，有一般日式食品供應，如壽司、魚生及爐端燒等。舖面大約可以容納三十人，但樓底頗高，唔覺太侷促。在星期六晚生意都不俗。筆者與太座冇預約，服務員問介唔介意坐吧枱，當然歡迎之至啦，因為可以第一手問師傅邊種食品最好最抵食。

難得冇揸車，太座提議喝點清酒。筆者自問唔係飲酒專家，問服務員有乜好介紹，她說house sake係日本盛，質素不俗。筆者聽從其建議，點了一支三百毫升庄凍飲($88)，與爐端燒一冷一熱，效果應該唔錯。此清酒水準幾好，清新嘅米香味直撲入鼻，清酒中還有一點甘甜味。我們首先品嚐嘅係數款串燒，之後係壽司及魚生。

燒鹿兒島黑豚($55)/牛舌($25) – 簡單的用鹽、黑椒吊味，外表燒得香脆，剛好封住肉汁。一咬入口，肉汁傾瀉而出。不過牛舌有點燒燶了，使那部分味道變苦，係失手之作。

燒鵝肝($98)/日本蠔($26) – 係咁多款串燒中最令人留下深刻印象。鵝肝用料唔算頂級，鵝肝中有點根，不過師傅火喉控制技術高超，使鵝肝表面煎得香脆之餘，內裡如豆腐般滑，當然鵝肝嘅氣味永遠那麼突出。同樣高超嘅技術也表現在燒蠔上，蠔嘅表面亦是煎得香脆，一咬入口，蠔肉中帶奶白色嘅肉汁唧出，肉質鮮嫩無渣，感覺偏向爽口。

煙肉露筍($24) – 外表切得很有心思，由長至短排列。露筍唔會因為燒得耐而變得乾癟，仍保持鮮嫩，露筍本身亦無渣，選料一點也不馬虎。

燒羊架($64) – 令一款重點推介，首先選料上乘，肉質十分嫩滑，幾乎像5A和牛般，而且羊肉味濃郁，配合師傅嘅手勢，有串燒香味之餘還保留豐富肉汁。

燒飯團($30) – 外表燒得脆卜卜，如食煲仔飯焦一般，不過味道偏鹹。

魚生 – 經師傅介紹，是晚嘅油甘魚腩($70)及鱲魚($65)來貨比較好，食落果然冇花假。油甘魚腩油脂甘香，魚肉嫩滑如豆腐般。鱲魚肉質煙韌鮮甜，與油甘魚肉嘅香滑係截然不同嘅風味。

壽司 – 同樣係師傅介紹，嗌了一客北海道海膽壽司($100)及BB吞拿魚腩壽司($60)。海膽係太座嘅至愛，當師傅放緊海膽於飯團上，太座不斷輕聲說放多一點，師傅果然亦從善如流。海膽十分鮮甜，BB吞拿魚腩也很嫩滑，比起成年吞拿魚腩少了一份魚脂味，用壽司嘅方法食合適，如食魚生的話，還是toro好。

埋單合共七百七十五蚊，平均每人三百八十八蚊，如此質素十分超值。

味道：4 (以5分最高)
環境：4
服務：3
衛生：4
價錢：4

用餐日期：2009年3月28日

地址：西環皇后大道西356號俊庭居地下2-3號舖

紅豆冰變壞了 (祥利冰室)

星期天，雨停止了，但天還是陰陰的。人體內嘅生理時鐘亦攪亂了，所以筆者與太座瞓到一點幾先起床。


梳洗完畢已差唔多兩點鐘，仲差半個鐘就可以食下午茶。利用網上搜查器，發現電器道附近有一間歷史悠久嘅茶餐廳，紅豆冰係其中嘅名物。太座一聽到紅豆冰便雙眼發光，於是便驅車前往。

舖面除了堂座之外，還有閣樓座位，係一派舊式茶餐廳格局。到達時只是兩點四，仲差十分鐘先到下午茶時間，不過服務員話不要緊，時間只差少少，都幫我地落單。太座嗌了一份豬扒麵餐轉紅豆冰，筆者則叫了雞蛋鹵水牛展治烘底及奶茶。

豬扒麵用上福字麵，故味精感覺比較少，湯亦相對清淡。豬扒醃得相當鬆但唔化，並非用梳打粉嘅效果，外表煎得金黃，咬落亦肉汁豐富，相當對辦。

三文治以炒蛋及牛展作配搭，對筆者嚟講係新嘗試。蛋炒得香滑，鹵水牛展亦醃得入味，肉質亦唔韌。鹵水汁被烘底麵包吸收，很美味。

奶茶冇叫減奶，但水吧出手亦唔重。奶茶香滑，入口良久齒頰亦冇奶茶遺下嘅鞋口感。始終茶餐廳有一定歷史，茶胆顯然亦係經過千錘百鍊的。

紅豆冰賣相不俗，所用嘅紅豆亦大大粒，可惜入口有一股變壞嘅酸味，太座即時向服務員提出，經調查發現師傳早一晚煮完紅豆之後冇將之放進冰箱以致變壞了。太座唯有轉凍華田。

豬扒麵餐廿四蚊，凍飲加二。雙拼三文治餐二十蚊，轉牛展加兩蚊，烘底再加一蚊。共銀四十九蚊，平均每人二十四蚊。


味道：4 (以5分最高)
環境：3
服務：3
衛生：2
價錢：3

用餐日期：2009年3月29日

地址：北角電氣道120號地下

香軟鹵水鵝片 (阿鴻小吃)

星期四，天氣陰晴不定，人亦變得懶散。筆者與太座一家兩口子，嫌在家玩煮飯仔煩，還是外出用膳罷了。


家在港島區，生活費支出比九龍高，可幸家在北角區，附近特式食肆都不少，這算是付出較高昂生活費嘅少少回報。此食店雖然舖面小小，但廣為人知，好多知名人士都有嚟過，兼且讚不絕口，蔡瀾仲將此店列為一百五十間經常幫襯嘅食肆之一。究竟此店有乜嘢魔力，筆者與太座一於探求一下。

舖面大約可容納三十多人，雖然如此，不過就筆者觀察，生意冇乜受到影響。因為此店以鹵水食品聞名，好多人都會選擇外賣。筆者到達時，需要輪候十五分鐘。

菜式有頗多選擇，以潮州鹵水食品為主。筆者與太座點了三樣招牌菜，分別係南乳炆齋(俗稱粗齋)、去骨鴨舌及蔡瀾(即豬油)撈麵。當中出了一點意外，蔡瀾撈麵變成鵝片豬脷撈粗加蛋，太座一時唔為意嚐了一口，呢次與豬油撈麵無緣，唯有等下次。

粗齋南乳味、鹹淡適中，材料豐富，計有紹菜、枝竹、金針、雲耳、冬菇、雪耳等，仲有切成心形嘅紅蘿蔔，十分別致。各款材料唔會炆得糜爛，還保留咬口。

去骨鴨舌係一款冷點，鴨舌去骨後配以麻醬，入口又香又爽，最適宜佐酒。太座則認為用鹵水比較好。

蔡瀾撈麵變成撈粗，初時有啲失望，但試了之後原來水準亦唔差。首先鵝片嫩滑，鹵水醃得入味，其香味在口中不斷滲出嚟，水準之高，不比城中數一數二嘅潮州打冷店如尚興遜色。豬脷也炆得十分腍，鹵水味亦滲入每一條纖維中，可惜呢份豬脷唔見有最嫩嘅脷尖，有少少遺憾。粗麵撈得均勻，麵條有嚼勁，還有一股豬油香味，是故筆者與太座食得乾乾淨淨。

粗齋及去骨鴨舌各四十五蚊一碟，鵝片豬脷撈粗加蛋四十八蚊，共銀一百三十八蚊，平均每人六十九蚊。

如前文所講，蔡瀾撈麵變成撈粗，傳遞出錯，本要扣分，不過埋單之時，正在舖面忙得團團轉嘅老闆誠懇地講咗聲多謝，算是互相抵消。

味道：4 (以5分最高)
環境：3
服務：4
衛生：4
價錢：3

用餐日期：2009年3月26日

地址：北角和富道84-94號銀輝大廈地下4號舖