結婚兩周年(Robuchon a Galera)

星期五，天色十分好。筆者請了一天假，與太座過大海輕鬆一吓。當然輕鬆嘅方法並非過過手癮，而是口癮。今次嘅主角係今年澳門米芝蓮三星食肆，位於葡京嘅盧貝松。

是兩星期前作出的安排，有Gaddi's的珠玉在前，背負Robuchon嘅大名，令人期待。預約了十二時半午飯時段，準時到達。位於集酒色財氣於一身、但顯得老態龍鍾嘅葡京，一間講求優雅的法國餐廳，有點格格不入。餐廳主調色是藍色，是高貴典雅嘅象徵。論環境，沒有Gaddi's的華麗，空間感亦因樓底嘅限制，有所欠缺。細看之下，餐具是Christofle，可是滿臉風霜，在這種級數的餐廳，是有點出人意表。

事先做了一點資料搜集，對所想吃的東西已略知一二。不過，食法國餐沒有酒，不完滿，沒有駕車之憂，可以放肆一點。一名操法國口音的領班推著一車各式各樣的葡萄酒，向我們逐一介紹。太座喜愛口感較dry的香檳，聽從領班之介紹，一人一杯Arlaux Brut N.V.。酒香清新，帶一點麵包香，氣泡細密而長久，入口順滑，是不錯嘅介紹。

麵包籃新鮮出爐，有五、六款提供，熱辣辣，差不到那裡去。不過有點烘得過了火，表層不夠鬆脆，比Gaddi's是起碼遜一籌；牛油在餐車上呈柱狀，由服務員於客人前用刀片刮在牛油碟上。香味十分淡，入口亦沒有預期之牛奶酥香，整體來說，是有一些失望。

未上頭盤，先來一客醒胃的青蘋果mousse，雪得冰凍一點，令青蘋果的清新更加突出。除了青蘋果蓉之外，原來還將西芹切成細細粒，可口非常，亦為之後的大餐作了最好嘅準備。

Les crustacés

 太座與筆者都係揀了一客三道菜嘅午市套餐，包括前菜或餐湯，主菜一道，可選魚或肉，最後以甜品或芝士作結。太座點了海鮮湯(Les crustacés)作前奏。入口便有清甜可口嘅感覺，但清甜之中有胡椒的一點香辣，只是一丁點，令腸胃添一分暖和，ready for the next course；

L'œuf de poule japonais

筆者的前菜是釀菌(L'œuf de poule japonais)，在菌上主要釀了慢煮日本蛋，口感是出奇的creamy，味濃而不溜，嫌味太濃的，呷一口伴碟的火箭菜，平衡得恰到好處。溫度是微微凍了一點，可能是三、兩度，可以好一點。


La caille

主菜方面，太座要了烤鵪鶉(La caille)，鵪鶉肉固然是嫩滑無比，表層蘸上焦糖烤焗，加一分甜香；最重要是嫩滑的鳥肉與釀在鵪鶉內的鵝肝是出奇地合襯，一時也攪不清到底是鵪鶉肉滑如絲，還是鵝肝的細緻；鵝肝肥美無根，齒頰留香。伴碟的薯蓉也是不容錯過的。

L'agneau

筆者一如之前在Gaddi's嘅選擇，點了羊鞍肉(L'agneau)。論羊鞍嘅質素，是幾乎沒有可以挑剔之處；火喉剛好，肉色呈嫩粉紅，肉質幼滑。嗜羊嘅筆者，嫌羊鞍肉嫩滑之餘，羶味不足。相比起Gaddi's(詳情見另文)，不可說遜色，但是少了一份驚喜。

dessert trolley

女性恩物

飽嚐美食後，又是最令女士們神魂顛倒的甜品時間。dessert trolley一出，琳瑯滿目，相信沒有一位正常嘅雌性物體可以抗拒的。款款甜品皆做得十分美侖美奐，種種皆想試一口，可惜每個午餐只可選三款而已。萬個不願，也要做痛苦嘅決定。側聞鄰桌點了拿破崙蛋糕，服務員手起刀落。裂帛般的聲音，光是此也可知此甜品是必食之選。另外是選了苞芙及朱古力撻，也是可口非常，是女士們嘅天堂。

只是服務員大意了，事後才知有雪糕可供選擇，太座氣惱不已，「敦促」筆者一定要反映。除了在顧客意見卡反映之外，「服務」一欄也扣了一分。

飯後糖果偏甜

一系列偏甜嘅糖果，令味蕾有點吃不消；反而一杯看似普通嘅咖啡，只是呷了一小口，咖啡豆嘅甘香於口腔中躍然而出，良久還感覺到此香味如針般激烈地刺激著口腔中每一寸。令沉寂於筆者體內多年的咖啡癮再一次喚醒，是一生人總要有一次嘅體驗。

午市嘅3-course set是十分抵食的($398 + 10% service charge)。因為飲了香檳，每人再加多二百蚊，這種級數，都唔算貴。在此謝過多年來贊助不少嘅賭客。

整體來說，其三星級地位，撇開上述小瑕疵，也是有其原因，筆者亦相信晚市會是另一光景。如果這裡有三星，Gaddi's至少都要有三星了。

味道：4.5 (以5分最高)
環境：4
服務：4
衛生：5
價錢：5

用餐日期：2010年12月3日

地址：澳門新口岸葡京路2-4號葡京酒店第四期3樓



太座生日快樂2010 (Gaddi's)

星期六，國慶翌日，秋風漸起，悶熱天中帶有一絲爽意。也就是這一天，為太座預備了一頓盛宴。

去年於 Tuscany by H 吃了一頓令人愜意的意大利餐之後，今年再接再厲，到此城中頂級法國餐廳慶祝生日。預約於兩星期前已進行，雖然歷史超過五十年，但一點也不落伍。只消在網上按幾下鍵盤，預約手續便成，簡單方便。晚宴前一晚，餐廳給了一個溫馨提示，亦詢問客人有冇特別要求，十分貼心。

筆者無論性格或動作都比較「豪邁」，要求工整的傳統法式晚宴，與筆者好像有點格格不入。不過，為尊重餐廳別的客人，也是餐廳的其中一個要求，是晚筆挺的西服少不了。在半島酒店正門進入，是一派歐陸色彩濃厚嘅佈置，太座正躊躇餐廳的正確位置，筆者指一指旁邊嘅通道，沒有色彩班斑斕嘅霓虹燈，也沒有浮誇的擺設，餐廳嘅招牌是含蓄地掛在一旁。不過，招牌的藍色地毯，獨立的古老升降機，隱隱然散發出貴族般的優雅。

踏入升降機，雖只是一層之遙，但時間像溜得特別慢，以為咁唔好彩，碰上升降機故障，升降機門徐徐打開。享受一頓法式晚宴，兩、三個鐘少不了，慢速的升降機，好像又變得理所當然。

在門前店員稍為核對一下資料後，便被引領進這個華麗的大廳。高高嘅樓底，配上大吊燈，如一的藍地毯，桌子之間合適嘅距離，喁喁私語，不失私隱。每張桌子都擺放一套洋燭台，浪漫滿溢，果然繼承了法國人嘅浪漫。吹毛求疵的，是洋燭台有點變了形，左右不對稱，一雙洋燭不是筆直的聳立著。這個級數嘅餐廳，比分自然要嚴謹，0.5分就此扣了。

有live band及舞池，歌喉比「巨聲」好得多

是晚滴酒不沾，只點了清水，但這水卻殊不簡單，後文再交代。服務員先端上兩款牛油，分別是有鹽及無鹽的。味道呈淡乳香，入口滑溜，絕對不能錯過。配合無限量供應之包點，具畫龍點晴之效。可供任點的餐前麵包有四款，款款精緻，筆者貪心，四款也試過，麵包不僅密度高，而且鬆軟非常。想吃多一點，但恐防眼闊肚窄，也就放棄了。

點菜是頗令人費神之事，尤其是Gaddi's嘅餐牌，林林總總，款款都想試，幸得服務員為每款菜作詳細介紹，兼且會予拿不定主意的客人加入一點適當的個人意見。這些表現，不是對每款菜色了然於胸是不能做到的。筆者為自己點了四道菜，太座則點了三道。

筆者嘅頭盤是水煮帶子配魚子 (lightly-poached scallops with Oscietra caviar in a bouillabaisse dressing)。水煮帶子，火喉拿揑得恰到好處，用餐刀切開，感覺到「黏」刀嘅感覺，原來除了鮑魚可以溏心外，帶子也可以。旁邊加了幾片薄塊，是龍蝦湯之精華，中間的帶子，釀滿了矜貴的鱘魚子，有淡而長久嘅鹹香。

太座嘅頭盤是其中一款signature dish龍蝦雲吞 (roasted lobster ravioli in its own bisque with herb puree)。龍蝦肉固然爽脆鮮甜，廚師嘅功夫顯露在醬汁中，以龍蝦湯肴製，配上菠菜茸 (非餐牌所寫之香草茸，可能大廚臨陣轉章啩？)，儘管完成了雲吞，也不禁以麵包去蘸畢之。

筆者比太座多一道菜，就是這味龍蝦湯 (creamy lobster soup with sliced poached lobster)。服務員甫打開蓋著碟嘅金屬蓋，濃烈鮮味即時四射。配合這股濃烈氣味，味道一定是對應地濃郁吧，入口卻意外地清甜。當然，這裡的龍蝦湯沒有如凡品一般，微微有白酒的苦澀；也沒有煮得過了火，如沙紙般鞋口的龍蝦肉。

主菜方面，筆者是乳飼烤羊 (roasted milk fed Aveyron lamb with gratinated potatoes and Provencale vegetables)。烤羊是筆者最愛的菜色，在家中、在外頭都吃過不少。可以說，這烤羊是令筆者最難忘之烤羊。首先，選料上乘，阿維朗之羊肉，脂肪分佈十分平均，故入口是啖啖甘香豐腴；肉質幼細非常，彷彿在每條肌理中都洋溢著羊肉之酥香。大廚嘅烤羊功夫一流，表面是煎得甘香，但只是一層之隔，已經是medium rare，像是將兩種唔同生熟羊肉貼在一起，不愧是煮羊高手，也是Gaddi’s的signature dish。Side dish係gratinated potatoes，無論賣相、氣味一流，但真的已擠不進肚裡了。

太座之燒乳豬拼血腸 (grilled suckling pig with poached loin and home-made sausage, calvados jus)，是服務員介紹的，是不錯嘅意見。燒得金黃的外皮，味道香脆可口，肉質嫩滑如豬頸肉。

羊肉及豬肉有幾嫩滑？是筆者及太座事後不需用牙簽或牙線清理牙縫可知一二。

吃得有點過了火，筆者以生果配雪笆 (citrus fruit salad with mint, pink grapefruit-vanilla sherbet)中和。果肉包括橙、柚子、西柚等，上面放上雪芭，用乾冰保持冰凍，最後淋上薄荷汁，令感覺更加冰涼。果肉粒粒結實多汁，味道鮮甜；雪芭甜而不膩，減輕胃部壓力；

太座要的是mascarpone mousse with caramel ice cream，忌廉芝士打得起泡，細密如絲。焦糖濃而不膩，伴碟嘅烘麵包，正好用好「清理」碟內的焦糖。還有精緻的petit four作結，每件也做得一絲不苟，打從生理到心理都十分滿足。食物質素、烹調技巧皆無懈可擊，「味道」一欄那有不滿分之理。

太座生日快樂

服務十分妥貼。每一位服務員對餐牌瞭如指掌，是基本要求，難得的是每一位都有足夠的知識，能蠻有信心地為客人提供合適的建議，是專業的表現。離開餐廳、在升降機等待時，華藉領班從老遠趕到店前送行，「服務」一項也「只能」給予滿分。

未論及價錢，先回應前文提到的清水。不是賣廣告，比起什麼乜乜能量水，這清水更清純，代價就是每支(大約750毫升)，盛惠八十五蚊。全程喝了三支水，也就是二百五十五蚊。可想而知，這頓晚餐消費不菲。不過，連太座也同意，這裡是值得一來再來的。

味道：5 (以5分最高)
環境：4.5
服務：5
衛生：5
價錢：5
 
用餐日期：2010年10月2日
 
地址：尖沙咀彌敦道19-21號半島酒店1樓

曲奇八重奏 (Jenny Bakery)

孩提時代很喜歡食藍罐牛油曲奇，遇上過年時節，各家各戶好多時都擺番一罐招呼朋友。一塊接一塊咁食，幾個細路仔好快就食完一罐。年紀漸長，對曲奇餅嘅渴求減退了。是日嚟到赤柱，聽聞此店嘅曲奇唔錯，應太座所願，買了一點試吓。

精美曲奇罐

店內嘅裝飾十分簡潔光鮮，由兩位一男一女、相信已退休人士睇舖。太座想jenny會唔會係此女士，抑或佢地係jenny嘅父母或家翁姑呢？他們態度十分友善，也難怪。赤柱係遊客區，生活節奏冇咁急速，人都寬容一點。他們仔細介紹了各款餅點。太座也買了幾罐與家人、同事分享，有純味4 mix，也有果仁8 mix。臨行前問建議食用日期，男士答話一個月內食掉就冇問題，他再加一句話唔會擺一個月咁耐，幾日都食晒啦！好，對自家產品那麼有信心。

八款不同果仁組合嘅曲奇

回家路上，太座忍唔住打開一罐果仁8 mix。一打開，罐內嘅香味傾瀉而出，正在揸車嘅筆者都分一分神。果仁曲奇有榛子、合桃、腰果、朱古力果仁，還有一款咖啡味的共八款。香味嘅緣由係曲奇中嘅牛油嘅芳香。入口嘅感覺與藍罐曲奇大不同：牛油味香而不膩，食多一、兩件都唔會覺得滯胃；曲奇本身亦烘得十分鬆化，唔會烘得過硬，尤如藍罐曲奇般。咖啡味那一款除了牛油香之外，還有濃郁嘅咖啡香，但兩種味能平起平坐，十分可口。個人而言，有咬口嘅果仁曲奇會比純味嘅多一種享受；包裝罐用了得意嘅熊仔，觀賞性再加添幾分。

包裝分4 mix、8 mix、細罐及中罐四種組合。4 mix (細)六十蚊；8 mix (細) 八十八蚊；8 mix (中)一百四十蚊。買了一罐4 mix (細)、一罐8 mix (細)及兩罐8 mix (中)，共銀四百二十八蚊。雖然比藍罐曲奇貴，但質素嘅分野絕對超過兩者嘅差價。睇嚟過年又多一樣禮物選擇了。

味道：5 (以5分最高)
環境：4
服務：4
衛生：4
價錢：3

用餐日期：2009年7月12日

地址：赤柱新街11號1樓

時間在這裡凝固了 (時新快餐店)

筆者小時候住在紅磡，記得當時碼頭位於現在半島豪庭。那時，仲夏之夜冇宜家那麼悶熱，飯後到碼頭一帶海邊散步，十分寫意。夜晚睡在藤蓆上，開一把風扇就已經好舒服了。廿幾年後嘅今天重遊舊地，套用一句老套嘅話，真是滄海桑田。


「時新快餐店」貴為十大開飯熱點，嚟到紅磡，又怎能不嚟到朝聖！行吓行吓，終於搵到。門面是那麼的面善。咦！這不是兒時幫襯過的快餐店嗎？還記得那時美式連鎖快餐店牡丹樓並未登陸，「lur」父母去快餐店食薯條係童年時代嘅指定動作。今天，小朋友腦海中只有牡丹樓了，未免冇口福。

門口有老有嫩，排住隊去點選心頭好。有些慕名而來的年輕人，以好奇嘅眼光四處張望，拍照留念的也不少。入到裡面，時間好像凝固了，無論座位佈置，餐牌樣式，甚至連外賣袋，咁多年都冇變，當然價錢都唔變嘅話更好！懷舊(應該係不變)嘅裝修，令筆者嘅服飾顯得份外格格不入。廚房嘅員工閑熟地落單嘅落單，煎漢堡嘅煎漢堡，烘麵包嘅烘麵包，廿數年如一日，泡製獨到嘅漢堡包。

筆者只簡單地點了一個雙層芝士蛋漢堡及一罐飲品，漢堡包係即叫即整嘅，所以要花一點耐性等待。等了大約十分鐘，新鮮熱辣嘅漢堡包終於完成。外層嘅麵包用上嘉頓麵包，雖然經過烘焗，但質感比較乾及鬆散。漢堡扒牛肉味十分濃郁，肉汁亦很豐富，相信係經過高溫油將肉汁鎖死，再加上洋蔥粒，香軟嘅芝士及自製嘅沙津汁，互相配合得無懈可擊。麵包與漢堡扒大小配合亦得宜，每一口都能嚐到麵包及漢堡扒。雖然麵包有少少瑕疵，但瑕不掩瑜，漢堡包值最高評價。

價錢一點也不貴，雙層芝士蛋漢堡十五蚊一個，在牡丹樓齋食最大嘅巨無霸都係差唔多價錢，但味道何止好味數倍！筆者還記得炸雞脾也是十分好吃，下一次必定攜同太座一齊試吓是否能維持水準。
 
味道：5(以5分最高)
環境：2
服務：3
衛生：3
價錢：4

用餐日期：2009年4月11日

地址：紅磡黃埔街1A地下

記憶中最好食嘅紅豆沙 (一品齋甜品屋)

經過一整天嘅活動之後，筆者與太座都覺得有點累。送了太座嘅祖父回家後，與舅仔一齊到銅鑼灣食糖水。


此店搬進現址之前正正响對面舖位，新舖位比舊舖位光鮮很多，但有一樣嘢冇變嘅就係舖位依然咁細。筆者與太座到達後即時已決定食紫白及紅白，舅仔第一次嚟，經考慮後點了腐竹糖水。

紫白即是紫米霑加豆腐花，豆腐花又香又滑，唔會比幾間叫做阿婆豆腐花遜色，紫米露亦十分足料，與其話係紫米露，叫做紫米粥更加貼切，足料情況可想而知；紅白即是紅豆沙加豆腐花，紅豆大大粒，而且已經煲到出沙，濃淡適中。蓮子並冇去衣，係傳統紅豆沙所用嘅有衣蓮子，而且加咗百合，材料豐富。同樣地，腐竹糖水足料，不過白果太多，所以有少少怪味。少啲白果應可解決此問題。

據太座所講，她是此糖水舖多年擁躉，此情不變是因為這裡出品嘅糖水最接近已仙遊嘅祖母所煮嘅愛心糖水。每次幫襯，都能勾起她對祖母嘅美好回憶。

紫白十七蚊一碗，紅白十三蚊一碗，腐竹糖水十一蚊一碗，係經濟抵食甜品店嘅不二之選。

味道：5 (以5分最高)
環境：3
服務：4
衛生：3
價錢：4

用餐日期：2009年3月22日

地址：銅鑼灣希雲街8號

芝麻湯圓寧舍唔同 (福元湯圓)

此小店在筆者家左近，在區內頗有口碑，尤以芝麻湯圓最耍家。是晚專程造訪，太座要了一碗喳喳，筆者則叫了鴛鴦湯圓。

這裡嘅喳喳味道不是很甜，嗜甜者可能未必啱口味，不過材料就認真豐富，除咗一般嘅紅綠豆、芉頭、西米之外，特別之處就係有薏米同埋眉豆，喳喳加咗薏米之後，整個糖水頓時變得有咬口得多，咁多豆類在一起，亦無怪乎喳喳嘅營養價值咁高；

鴛鴦湯圓有芝麻及花生餡，其中以芝麻令筆者留下深刻印象，芝麻十分香口，一咬穿湯圓皮就感到有一股芝麻香氣傾瀉而出，不似一般坊間貨色，只有甜而沒有香味。花生餡亦做得十分仔細，花生粒唔會太大，夾雜白芝麻，亦是另一番味道。據太座所說，是晚嘅湯圓皮不是太煙韌，比平時遜色了一點。筆者覺得這亦無傷大雅。


價錢十分合理，喳喳十一蚊一碗；鴛鴦湯圓十四蚊一碗。下次再光顧時會淨選芝麻湯圓。
 
味道：5 (以5分最高)
環境：3
服務：3
衛生：3
價錢：4

用餐日期：2009年2月5日

地址：北角炮台山福元街7號利都樓地下I-1舖

救命酥皮叉燒包 (添好運點心專門店)

星期日，天氣唔好，太座嘅心情更差。近日網上熱爆討論由前任龍景軒大廚主理嘅「添好運」點心，筆者躍躍欲試，於星期日之前已決定前往一試。不過太座多番明示暗示唔想去，怕人多焗到頭暈，但不果。


筆者與太座大約十二點半鐘到達，店外已經人頭湧湧。店子小，食客流轉速度慢是預期之內。出乎筆者意料之外嘅係要足足等咗差唔多一粒鐘，而身旁嘅壓迫力及凌厲嘅眼神亦不斷增加。太座企到有點頭眩，筆者都只好偷偷地看望情況，不敢直視。

坐嘅地方係二人位，十分狹窄，可幸到坐得落。點了五款點心及一碟油菜($10)，已足夠兩口子嘅胃納。

首先係鳳爪排骨盅頭蒸飯($17)，此盅頭飯雖未有於各大雜誌提及，不過也是頗惹味的。第一，排骨嘅肥瘦適中，肉質鮮嫩；筆者尤其喜歡其飯粒蒸得飽滿，冇一般酒樓般索滿從排骨流出嘅豬油，令飯粒變得太腍身。有畫龍點睛之效嘅豉油汁令飯與肉嘅香味更特出，不錯！

食一盅兩件，蝦餃($16)與燒賣($16)是少不了的。兩者都是大約一大啖嘅大小，不追求大件夾抵食嘅精神。用料新鮮，蝦餃新鮮清甜多汁，蝦餃皮猜得晶瑩剔透，既有煙韌口感，但又唔會黏著筷子；燒賣用料豐富，除了豬肉之外還有香菇等材料，令味道更有立體感。呢兩款點心與一般最大嘅分別就係味道比較清淡易入口，沒有堆砌出來嘅味道(即是味精也)。

豬膶腸粉($14)也是值得一試嘅點心之一，腸粉皮拉得十分薄且半透明，功夫一流；豬膶係黃沙肝，解甜爽脆，也是沒有可挑剔之處。

食至此，筆者已偷望太座數遍，見面色稍為寬容，才稍稍問一問點心如何。太座答曰點心是高水準的，不過都唔值得等咁耐。好似腸粉，渡船街嘅「堂記」都一樣咁好食，兼且唔駛等；蝦餃、燒賣是好食，但冇特色，其他地方都可以食得到。太座一路講，筆者不停標冷汗，心想太座火氣未消，唯有希望鎮店之寶 – 「酥皮叉燒包」可以爭氣一點。

等咗幾分鐘，萬眾期待嘅叉燒包($12)終於新鮮出爐。酥皮嘅牛油香味已撲鼻而來，一咬入口，酥皮不太厚，甘香鬆脆，不是外界部分人所講嘅一般牛油蛋撻皮，應該還下了豬油才會咁香；酥皮底下嘅麵包焗得鬆軟，入口微甜；餡料不多，有數顆叉燒粒，但叉燒醬汁也是高水準的。食完一個叉燒包之後，心神稍定，再望一望太座，面色終雨過天清。太座再開金口，話此包內外都做得十分出色，而且很特別，未能於其他地方食得到，所以值得一等的。直至此筆者才完全釋懷，多謝叉燒包「救命」之恩。

兩人共銀八十九蚊，平均每人四十五蚊。味道一欄，是值得拿滿分的，可惜不知道是什麼緣故，外賣暫停，想食就一定要有耐性，服務一欄要扣分了。

(註：以上對太座心情之論述，只是筆者以誇張嘅手法表達。太座絕對係一位十分好嘅賢內助，各位完全不用為筆者嘅「終生幸福」担心，一笑。)


味道：5 (以5分最高)
環境：2
服務：3
衛生：3
價錢：4

用餐日期：2009年6月28日

地址：旺角廣華街2-20號翠園大樓2期地下8號舖

做咗大半日泰仔 (旺泰特食)

星期天，做咗大半日泰仔。首先與友人J到旺角打泰拳，倦極；其後入再到西貢與V會合，刷一餐泰國菜。做完運動，出了一身汗，再享受美食，一樂也。


一提起食泰國菜，筆者嘅第一選擇必然係位於西貢嘅「旺泰特食」。在西貢有兩間同名嘅店舖，一間位於萬年街，另一間位於西貢大廈地下巷內，筆者嘅心頭好係後者。幫襯了呢間舖頭已好幾年了，平均一年都會幫襯幾次，尤其係住在西貢區嘅V，連老闆都認得她。

眾人一坐下，服務員便遞上餐牌。不過對J及V嚟講，睇餐牌係多餘的。老闆親自落單，J及V以準確嘅泰文一一講出想食嘅菜式，老闆初則詫異，繼而露出會心微笑。三人行，六款餸，每人再加一個椰青。椰青清甜多汁，椰青肉亦香爽，是消暑佳品，也能中和辣味。

鹹魚炒芥蘭 – 通常用馬拉盞或蝦醬炒，今次特別少少，用鹹魚炒。芥菜配上鹹魚，效果一樣出色。芥菜爽脆，加上鹹魚嘅鹹香，增加味道嘅層次感；

生蝦 – 以新鮮蝦開邊再用冰保持鮮味，加上蒜片及椒絲，蘸上特製嘅酸辣醬，蝦嘅鮮味、蒜片香味、酸辣味混成一體，味道層次豐富，筆者都忍唔住食了一隻再一隻；

柚子沙津 – 論街外嘅柚子沙津，不是太酸，就是味道過於濃烈，與沙津這稱呼格格不入。這裡嘅柚子沙津，酸、甜、辣、香皆比較含蓄，唔會給味蕾太大負荷。除了柚子肉之外，還有椰絲、香蒜、蔥頭等香口東西，難怪乎入口能感到多種香味交融；

冬蔭公 – 這裡嘅冬蔭公可說是全港數一數二的了。一來冬蔭公嘅酸辣剛好，而且香料選用一絲不苟，香茅、指天椒、檸檬葉、乾蔥頭、南薑、芫茜等一樣都冇少，而且份量十足。味道結構十分豐富，層次分明，不是一般只識落辣油、檸檬汁嘅可比擬。另外，冬蔭公裡有一隻開邊大蝦連殼一起煮，酸辣香嘅湯底之中有一絲蝦嘅鮮甜；

蝦醬炒飯 – 飯身乾爽，炒得粒粒分明，配以蛋香、肉鬆香及蝦醬嘅鹹香，加一片臘腸，感覺一流；

黃咖哩雞 – 黃咖哩一點也不辣，其特式係咖哩醬配以蛋花做汁，既有咖哩香味又有蛋香味，無論係豬、牛、雞也好，通通淪為配角。雖有蝦醬少飯在前，但不叫白飯送咖哩汁簡直暴殄天物，最後V叫了一碗白飯，大家一起分享當前美食。

筆者食過嘅泰國菜館不多，唯只有此地才能叫筆者一來再來。由於食品由泰國人主理，充滿泰國地道色彩，亦只有此地味道最接近泰國當地味道。味道一欄，是滿分了。由於係半街邊檔，唔係所有座位都有冷氣，所以環境及衛生會較為遜色一點。

六餸加三個椰青，共銀三百二十一蚊，平均每人一百零七蚊。味道出色，一百蚊左右就吃得飽飽，實在經濟抵食。


味道：5 (以5分最高)
環境：2
服務：3
衛生：2
價錢：4

用餐日期：2009年5月17日

地址：西貢福民路58-72號高富樓地下15號舖

時光荏苒，已經一年了 (Tuscany by H)

星期天，結婚一周年，充沛嘅陽光中還有一絲涼意。

近日為覓新居而奔波，事情到了這天終於解決了。半個月之前已訂了位，可惜實在為太多事而操心，冇時間與餐廳manager傾一傾personalized menu，結果變成a la carte。幸好得太座體諒，亦吃得很滿意。

早來了半個鐘，是晚市最早到嘅一枱人。稍為安頓之後，店員奉上餐牌之餘，亦順道介紹special menu 及其tasting menu。琳瑯滿目，一時不知點樣揀，只好by elimination去作決定。首先，太座懷孕，避開海鮮類；另外，筆者戒吃牛肉，可選的只餘下豬羊雞等。最後是沙律、意粉、烤豬肉各一。店員亦將上菜嘅次序簡介給筆者，經同意後才一一上菜。

晚餐由bread basket 開始，有四款麵包。除了plain bread之外，還有grissini、其餘兩款名稱不詳。Grissini是摸上去熱辣辣，入口香脆，芝士味恰到好處，一邊搣一邊吃，唔駛三兩下已經掃光。另外一款是烤餅，混有橄欖片，比grissini嘅味道更濃烈，十分香口。其他麵包皆烘得鬆軟，但暫且擱下，留待稍後會有更好嘅發揮。

前菜是rocket salad ($148)，果如其名，全是火箭菜，加了幾粒鮮甜多汁嘅蕃茄仔。火箭菜故然有其獨有嘅清新芳香，沙律dressing味道特別醒神，與一般的dressing有所不同。究其所以，原來用了陳年balsamic vinegar，配合parmesan cheese切片，味道層次感頓時豐富起來。


Pasta揀了是日special menu 內的 home-made fettuccine ($328)，闊條麵中加了porcini mushroom 及黑松露醬。此店嘅pasta一向是出名的，是晚一會果然名不虛傳，造得很有咬口，冠之以al dente，當之無愧；porcini切片，煮得剛好，咬落爽脆，隱發鮮菌香味；精華部份當然是黑松露醬汁，黑松露嘅香味，無須多講，與porcini嘅香味交錯，合譜完美嘅樂章，配上闊身嘅fettuccine，麵條身上蘸滿醬汁，固然好吃，以麵包做媒介，也是一件人間美食，飯後良久仍齒頰留香。索價超過三百蚊，有點嚇人，但吃過以後，那有抗拒嘅理由。再來十次，也會毫不猶疑落order。

主菜是慢煮豬架($368)，豬肉是用上了西班牙的black Iberian pig，常見是用嚟做風乾火腿。此豬脂肪分佈平均，肉味香濃，是本地豬不能比擬的。看其橫切面，外表蓋著一層芝士，烤得香；內裡白中帶一點粉紅，火喉控制一流。咬落是肉汁豐富，肉質嫩滑，伴上切粒鮮菌嘅醬汁，味道更加多元化。連著骨的肉，筆者當然不會放過，也顧不了什麼儀態，徒手張口便齒開。幸好是意大利餐，冇咁拘謹，如果換了是法國餐，便「有辱國體」了。

飯後甜品，太座要了朱古力蛋糕配以開心果雪糕($128)，筆者是朱古力奶凍($98)。朱古力蛋糕其實是心太軟，督開香軟嘅蛋糕表面，熱騰騰嘅朱古力漿緩緩流出。蛋糕入口香濃但不太甜，加上熱朱古力漿，有幸福嘅感覺；奶凍上加了忌廉泡沫，當中藏有杏仁脆餅粒及latte gelato，縱然已飽了八、九分，三扒兩撥，也清理得一乾二淨。
最後以一杯香濃嘅cappuccino ($42)作結，完滿地完成整個晚餐。

服務非常好，餐廳嘅manager會逐一詢問意見。店員亦十分醒目，十分留意客人動靜，只要客人舉頭一望，店員已站在面前，準備接order。見太座大肚，坐得不甚舒適，未出聲已即時拿了cushion。凡此種種，是值得一個滿分嘅服務評級。埋單一千二百多，平均每人超過六百蚊，以這樣嘅水準，這樣服務質素，絕對物有所值。年底外家一系列生日飯，此店是必然是心水選擇之一。

味道: 5 (以5分最高)
環境: 4
服務: 5
衛生: 5
抵食: 5

用餐日期：2009年11月22日


地址：中環蘭桂坊德己立街58-62號地下